ନୂଆଦିଲ୍ଲୀ,୬।୯(ପି.ଟି.): ୨୦୨୦ ଜାତୀୟ ଶିକ୍ଷା ନୀତି ଏକବିଂଶ ଶତାବ୍ଦୀରେ ଏକ ବୈପ୍ଳବିକ ସଂସ୍କାର ଆଣିପାରିଛି। ଏହି ଶିକ୍ଷା ନୀତି ଦ୍ୱାରା ଆସନ୍ତା ୧୦ବର୍ଷ ମଧ୍ୟରେ ନାମଲେଖା ଅନୁପାତ ୨ଗୁଣ ହେବାର ଆଶା କରାଯାଉଛି ବୋଲି ଶନିବାର କେନ୍ଦ୍ର ସୂଚନା ଓ ପ୍ରସାରଣ ମନ୍ତ୍ରୀ ପ୍ରକାଶ ଡାଭଡେକର କହିଛନ୍ତି। ନୂତନ ଶିକ୍ଷା ନୀତିରେ ଉଚ୍ଚ ଶିକ୍ଷା ଅନୁଷ୍ଠାନର ବିସ୍ତାର ଭାବେ ସମ୍ପ୍ରସାରଣ ବିଶେଷକରି ଗ୍ରାମାଞ୍ଚଳରେ ଉଚ୍ଚ ଶିକ୍ଷାର ପ୍ରସାର ଏବଂ ଚାହିଦା ବୃଦ୍ଧି ଆଗାମୀ ଦିନରେ ଦେଶରେ ନାମଲେଖା ଅନୁପାତକୁ ବୃଦ୍ଧି କରିବାରେ ବେଶ୍ ସହାୟକ ହେବ ବୋଲି ବମ୍ବେର ପାର୍ଲେ ତିଲକ ବିଦ୍ୟାଳୟର ଶତବାର୍ଷିକୀ ଗୁରୁ ଦିବସ ପାଳନ ଅବସରରେ ଭିଡିଓ କନ୍ଫରେନ୍ସରେ ଯୋଗଦେଇ ଜାଭଡେକର କହିଛନ୍ତି। ଦେଶରେ ବର୍ତ୍ତମାନ ପିଲାମାନେ ଅଧିକରୁ ଅଧିକ ଶିକ୍ଷା ପ୍ରତି ମନୋନିବେଶ କଲେଣି। ଜାତୀୟ ଶିକ୍ଷା ନୀତି ୨୦୨୦ ଉଭୟ ଶିକ୍ଷା ଏବଂ ଶିକ୍ଷଣ ପଦ୍ଧତି ଏକ ପ୍ରକାର ନୂତନ ଅନୁଭୂତି ଆଣିବ। ଏହା ଯୁବଗୋଷ୍ଠୀକୁ ବେଶ୍ ସଶକ୍ତ କରିପାରିବ। ନୂଆ ଶିକ୍ଷା ନୀତି ମୌଳିକ ଏବଂ ଗାଣିତିକ ସାକ୍ଷରତା ଉପରେ ଗୁରୁତ୍ୱ ଦେଇଛି। ଏଥିସହିତ ନ୍ୟାଶନାଲ ଇନ୍ଷ୍ଟିଚ୍ୟୁଟ୍ ଅଫ୍ ଓପନ୍ ସ୍କୁଲିଂ ବ୍ୟବସ୍ଥା ସମସ୍ତଙ୍କ ନିକଟରେ ଶିକ୍ଷା ପହଞ୍ଚାଇବାରେ ସହାୟକ ହେବ ବୋଲି ଜାଭଡେକର କହିଛନ୍ତି। ଜାତୀୟ ଶିକ୍ଷା ନୀତିରେ ପ୍ରାକ୍ ଶିକ୍ଷା ବ୍ୟବସ୍ଥାକୁ ଅଧିକ ଗୁରୁତ୍ୱ ଦିଆଯାଇଛି। ୩ରୁ ୮ବର୍ଷର ପିଲାମାନଙ୍କ ମଧ୍ୟରେ ବୌଦ୍ଧିକ ଜ୍ଞାନ ଶକ୍ତି, ପାଠପଢ଼ା ପ୍ରତି ଆଗ୍ରହ ବୃଦ୍ଧି ଏବଂ ମାନସିକସ୍ଥିତି କିପରି ଠିକ୍ଭାବେ ବଢ଼ିପାରିବ ତାହା ଉପରେ ବିଶେଷ ଧ୍ୟାନ ଦିଆଯାଇଛି ବୋଲି ଜାଭଡେକର କହିଛନ୍ତି।
