ଅନୁଗୋଳ ଅଫିସ, ୧୧ା୯: ଅନୁଗୋଳ ଚମ୍ପତ୍ତିମୁଣ୍ଡାସ୍ଥିତ ଜବାହର ନବୋଦୟ ବିଦ୍ୟାଳୟ (ଜେଏନ୍ଭି)ରେ ଏକାଦଶ (ଯୁକ୍ତ୨ର ପ୍ରଥମ ବର୍ଷ)ରେ ନାମ ଲେଖାକୁ ନେଇ ଅଡ଼ୁଆରେ ପଡ଼ିଛନ୍ତି ୨୦ ଜଣ ଛାତ୍ରୀଛାତ୍ର। ଶେଷ ମୁହୂର୍ତ୍ତରେ ବିଦ୍ୟାଳୟ କର୍ତ୍ତୃପକ୍ଷ ବିଜ୍ଞାନରେ ନାମ ଲେଖାଇ ହେବ ନାହିଁ ବୋଲି କହିବାରୁ ଛାତ୍ରୀଛାତ୍ର ଓ ଅଭିଭାବକମାନେ ଚିନ୍ତାରେ ପଡ଼ିଛନ୍ତି। ଅନ୍ୟ କଲେଜରେ ନାମ ଲେଖା ତାରିଖ ଶେଷ ହୋଇଯାଇଥିବାରୁ ସେମାନଙ୍କ ଭବିଷ୍ୟତ ଏବେ କ’ଣ ହେବ, ତାହା ସନ୍ଦେହରେ। ଏ ନେଇ ଛାତ୍ରୀଛାତ୍ର ଓ ଅଭିଭାବକମାନେ ଅନୁଗୋଳ ଜିଲା ପ୍ରଶାସନର ଦ୍ୱାରସ୍ଥ ହୋଇଛନ୍ତି।
ଅଭିଯୋଗ ଅନୁଯାୟୀ, ଢେଙ୍କାନାଳ ଜିଲା ପରଜଙ୍ଗସ୍ଥିତ ସରାଙ୍ଗ ଜେଏନ୍ଭିରେ ଷଷ୍ଠରୁ ଦଶମ ଶ୍ରେଣୀ ପର୍ଯ୍ୟନ୍ତ ପଢ଼ିଥିବା ଢେଙ୍କାନାଳ ଓ ଅନୁଗୋଳ ଜିଲାର ଏହି ୨୦ ଛାତ୍ରୀଛାତ୍ରଙ୍କ ନାମ ଲେଖା ହୋଇପାରୁ ନାହିଁ। ମେଧାବୀ ଛାତ୍ରୀଛାତ୍ରମାନେ ଦଶମ ଶ୍ରେଣୀ ବୋର୍ଡ ପରୀକ୍ଷାରେ ୮୫ରୁ ୯୦ ପ୍ରତିଶତ ମାର୍କ ରଖିଥିଲେ ମଧ୍ୟ ସରାଙ୍ଗ ଜେଏନ୍ଭିରେ ଥିବା ୪୦ଟି ସିଟ୍ରେ ସେମାନଙ୍କ ମେରିଟ୍ ଆସିଲା ନାହିଁ। ଫଳରେ ସେମାନେ ଅନୁଗୋଳ ଚମ୍ପତ୍ତିମୁଣ୍ଡା ଜେଏନ୍ଭିରେ ଯୁକ୍ତ ୨ ବିଜ୍ଞାନରେ ନାମ ଲେଖାଇଥିଲେ। ପୂର୍ବରୁ ଚମ୍ପତ୍ତିମୁଣ୍ଡା ଜେଏନ୍ଭିରେ ୪୦ଟି ସିଟ୍ ଥିବାବେଳେ ଚଳିତବର୍ଷ ୨୦ଟି ସିଟ୍ ବୃଦ୍ଧି କରାଯାଇଥିବା କୁହାଯାଇଥିଲା। କିନ୍ତୁ ଗତ ୬ ତାରିଖରେ ଚମ୍ପତ୍ତିମୁଣ୍ଡା ଜେଏନ୍ଭି କର୍ତ୍ତୃପକ୍ଷ ବିଜ୍ଞାନ ପାଠ୍ୟକ୍ରମରେ ଏହି ଛାତ୍ରୀଛାତ୍ରମାନେ ପଢ଼ିପାରିବେ ନାହିଁ ବୋଲି କହିଥିଲେ। ସରକାର ବଢ଼ାଇବାକୁ ଥିବା ୨୦ଟି ସିଟ୍ ବୃଦ୍ଧି କରି ନ ଥିବାରୁ ଆଡମିଶନ କରିଥିବା ଏହି ଛାତ୍ରୀଛାତ୍ରମାନେ ପଢ଼ିପାରିବେ ନାହିଁ। ଯଦି ପଢ଼ିବେ କଳା ଓ ବାଣିଜ୍ୟରେ ଆଡମିଶନ କରିବେ। ନଚେତ୍ ଟିସି ନେଇ ଅନ୍ୟତ୍ର ଯିବେ ବୋଲି ବିଦ୍ୟାଳୟ କର୍ତ୍ତୃପକ୍ଷ କହିଥିଲେ। ଏଭଳି ଶୁଣିବା ପରେ ଛାତ୍ରୀଛାତ୍ର ଓ ଅଭିଭାବକଙ୍କ ମୁଣ୍ଡରେ ଚଡ଼କ ପଡ଼ିଥିଲା। ଅନ୍ୟପକ୍ଷରେ ରାଜ୍ୟ ସରକାରଙ୍କ ବିଭିନ୍ନ ବିଦ୍ୟାଳୟରେ ନାମଲେଖା ପାଇଁ ଶେଷ ତାରିଖ ଗତ ୫ ତାରିଖ ଥିଲା। ତେଣୁ ଏହି ୨୦ ଜଣ ମେଧାବୀ ଛାତ୍ରୀଛାତ୍ରଙ୍କ ଭବିଷ୍ୟତ କ’ଣ ହେବ ତାହାକୁ ନେଇ ଅଭିଭାବକମାନେ ଚିନ୍ତିତ ହୋଇପଡ଼ିଛନ୍ତି। ଆର୍ଥିକ କ୍ଷେତ୍ରରେ ସେମାନେ ସ୍ବଚ୍ଛଳ ନ ଥିବାରୁ ଘରୋଇ କଲେଜରେ ପଢ଼ାଇବା ସମ୍ଭବ ନୁହେଁ ବୋଲି ସେମାନେ କହିଛନ୍ତି। ତେଣୁ ସମସ୍ତ କଲେଜରେ ଆବେଦନ ତାରିଖ ଶେଷ ହୋଇଯାଇଥିବାରୁ ଚମ୍ପତ୍ତିମୁଣ୍ଡା ଜେଏନ୍ଭିରେ ୨୦ଟି ସିଟ୍ ବୃଦ୍ଧି କରିବାକୁ ଛାତ୍ରୀଛାତ୍ର ଓ ଅଭିଭାବମାନେ ଅନୁଗୋଳ ଜିଲାପାଳ ସିଦ୍ଧାର୍ଥ ଶଙ୍କର ସ୍ବାଇଁଙ୍କୁ ଭେଟି ଦାବିପତ୍ର ପ୍ରଦାନ କରିବା ସହ ଏହାର ନକଲ ପ୍ରଧାନମନ୍ତ୍ରୀ, କେନ୍ଦ୍ର ଶିକ୍ଷାମନ୍ତ୍ରୀ, ମୁଖ୍ୟମନ୍ତ୍ରୀ ଓ ଚମ୍ପତ୍ତିମୁଣ୍ଡା ଜେଏନ୍ଭି କର୍ତ୍ତୃପକ୍ଷଙ୍କୁ ପ୍ରଦାନ କରିଛନ୍ତି।
