ନୂଆଦିଲ୍ଲୀ, ୧୬।୭ : ଭାରତର ପ୍ରଧାନ ବିଚାରପତି ଜଷ୍ଟିସ ଏନ.ଭି ରମନା ଶନିବାର କହିଛନ୍ତି ଯେ ରାଜନୈତିକ ବିରୋଧକୁ ଶତ୍ରୁତାରେ ପରିଣତ କରିବା ଏକ ସୁସ୍ଥ ଗଣତନ୍ତ୍ରର ସଙ୍କେତ ନୁହେଁ। ସେ କହିଛନ୍ତି ଯେ ସରକାର ଏବଂ ବିରୋଧୀ ମଧ୍ୟରେ ଥିବା ପାରସ୍ପରିକ ସମ୍ମାନ ବର୍ତ୍ତମାନ ହ୍ରାସ ପାଉଛି। ପୂର୍ବରୁ ସରକାର ଏବଂ ବିରୋଧୀ ମଧ୍ୟରେ ପାରସ୍ପରିକ ସମ୍ମାନ ରହିଆସୁଥିଲା। ଦୁର୍ଭାଗ୍ୟବଶତଃ ବିରୋଧୀଙ୍କ ପାଇଁ ସ୍ଥାନ ହ୍ରାସ ପାଉଛି। ବ୍ୟାପକ ବିଚାର ବିମର୍ଷ ଏବଂ ଯାଞ୍ଚ ବିନା ଆଇନ ପ୍ରଣୟନ କରାଯାଉଛି।
କମନୱେଲଥ ସଂସଦୀୟ ଆସୋସିଏଶନର ରାଜସ୍ଥାନ ଶାଖା ଅଧୀନରେ ୭୫ ବର୍ଷର ସଂସଦୀୟ ଗଣତନ୍ତ୍ର ଉପରେ ଏକ ସେମିନାରକୁ ଜଷ୍ଟିସ ରମନା ସମ୍ବୋଧିତ କରି ଏଭଳି କହିଛନ୍ତି। ଜଷ୍ଟିସ ରାମାନା କହିଛନ୍ତି, ଦୁଃଖର ବିଷୟ ଯେ, ବିଧାନସଭା ପ୍ରଦର୍ଶନରେ ଗୁଣାତ୍ମକ ମାନର ଅବନତି ଘଟୁଛି। ଏହା ଗଣତାନ୍ତ୍ରିକ ପଦ୍ଧତି ପାଇଁ ଉପଯୁକ୍ତ ନୁହେଁ।
