ନୂଆଦିଲ୍ଲୀ,୨୨।୧: ଗୋଟିଏ ପଟେ ଇଂଲଣ୍ଡ ଦଳ ଭାରତ ବିପକ୍ଷରେ ଟି-୨୦ ସିରିଜ ଖେଳୁଥିବା ବେଳେ ଜଣେ ଇଂଲଣ୍ଡ କ୍ରିକେଟର ଅବସର ଘୋଷଣା କରି ଚମକାଇଛନ୍ତି। ସେ ହେଲେ ଲିଆମ ଥମାସ। ଲିଆମ୍ ତାଙ୍କ ୧୪ ବର୍ଷର କ୍ୟାରିଅରରେ ପୂର୍ଣ୍ଣଚ୍ଛେଦ ପକାଇଛନ୍ତି। ତେବେ ସେ ନିଜର ଅବସର ନେଇ ଘୋଷଣା କରିବା ପରେ, ଇଂଲଣ୍ଡ କ୍ରିକେଟ ବୋର୍ଡ ତାଙ୍କୁ ଅଭିନନ୍ଦନ ଏବଂ ଶୁଭେଚ୍ଛା ଜଣାଇଛନ୍ତି। ଲିଆମ ଦିବ୍ୟାଙ୍ଗ ଟିମ୍ର ଜଣେ ବହୁତ ସ୍ବତନ୍ତ୍ର ଖେଳାଳି ଥିଲେ, କାରଣ ତାଙ୍କର ଗୋଟିଏ ଗୋଡ଼ ନଥିବା ସତ୍ତ୍ୱେ ସେ ଚମତ୍କାର ଫିଲ୍ଡିଂ କରୁଥିଲେ।
ଭାରତ ଏବଂ ଇଂଲଣ୍ଡ ମଧ୍ୟରେ ପ୍ରଥମ ଟି-୨୦ ମ୍ୟାଚ୍ ପୂର୍ବରୁ ଲିଆମ ତାଙ୍କର ଅବସର ଘୋଷଣା କରିଛନ୍ତି। ଇଂଲଣ୍ଡ କ୍ରିକେଟ ବୋର୍ଡ ଏହାର ଇନଷ୍ଟାଗ୍ରାମ ହ୍ୟାଣ୍ଡେଲରୁ କ୍ରିକେଟରଙ୍କର ଏକ ଭିଡିଓ ଶେୟାର କରିଛି, ଯେଉଁଥିରେ ସେ ଚମତ୍କାର ଫିଲ୍ଡିଂ କରୁଥିବାର ଦେଖାଯାଉଛି। ଏକ ମ୍ୟାଚ ସମୟରେ, ପଡ଼ିଆରେ ଫିଲ୍ଡିଂ କରୁଥିବା ସମୟରେ ଥମାସଙ୍କ କୃତ୍ରିମ ଗୋଡ ଖସି ଯାଇଥିଲା। ଏହା ସତ୍ତ୍ୱେ, ସେ ଫିଲ୍ଡିଂ ଜାରି ରଖିଥିଲେ ଏବଂ ଗୋଟିଏ ଗୋଡରେ ଦୌଡ଼ିଥିଲେ। ଏହି ଦୁର୍ଘଟଣା ୨୦୧୬ ମସିହାରେ ଏକ ମ୍ୟାଚ୍ ସମୟରେ ପଡ଼ିଆରେ ଘଟିଥିଲା। ତା’ପରେ ଖେଳ ପ୍ରତି ଥମାସଙ୍କ ଉତ୍ସର୍ଗୀକୃତତାକୁ ବହୁତ ପ୍ରଶଂସା କରାଯାଇଥିଲା।
View this post on Instagram
ଲିଆମ ଜଣେ ଉଇକେଟକିପର ବ୍ୟାଟ୍ସମ୍ୟାନ ଥିଲେ।ସେ ବର୍ଷ ବର୍ଷ ଧରି ଇଂଲଣ୍ଡ ଦିବ୍ୟାଙ୍ଗ ଟିମ୍ ପାଇଁ ଖେଳୁଥିଲେ। ସେ ୨୦୧୩ ରୁ ୨୦୧୮ ପର୍ଯ୍ୟନ୍ତ ଏହି ଦଳର ଅଂଶ ଥିଲେ। ଏହା ବ୍ୟତୀତ ସେ ସ୍କଲ୍ସ କ୍ରିକେଟ୍ କ୍ଲବ ପାଇଁ ମଧ୍ୟ କ୍ରିକେଟ ଖେଳିଥିଲେ। ଥମାସ ଜଣେ ଉଇକେଟକିପର ବ୍ୟାଟସମ୍ୟାନ ଭାବରେ ଦଳର ପ୍ରତିନିଧିତ୍ୱ କରିଥିଲେ। ହେଲେ ଏବେ ତାଙ୍କୁ କ୍ରିକେଟ ପଡ଼ିଆରେ ଦେଖିବାକୁ ମିଳିବ ନାହିଁ। ତେବେ ଏହି ଖବର ସାମ୍ନାକୁ ଆସିବା ପରେ ଲିଆମଙ୍କ ପ୍ରଶଂସକ ନିରାଶ ହୋଇଛନ୍ତି।
