ତୁମୁଡିବନ୍ଧ,୭।୬(ଦୀପକ କୁମାର ପରାସେଠ): କନ୍ଧମାଳ ଜିଲା ତୁମୁଡିବନ୍ଧ ଅଞ୍ଚଳରେ ମେ ୨୯ ତାରିଖ ଶନିବାର ହୋଇଥିବା କାଳବୈଶାଖୀର ତାଣ୍ଡବରେ ବହୁ ଘର କ୍ଷତିଗ୍ରସ୍ତ ହେବା ସହ ବଡ଼ ବଡ଼ ଗଛ ଉପୁଡ଼ି ବିଦ୍ୟୁତ ଖୁଣ୍ଟ ଉପରେ ପଡ଼ିଥିଲା। ଫଳରେ ବିଦ୍ୟୁତ ତାର ଛିଣ୍ଡିଯିବା ସହ ଅନେକ ଖୁଣ୍ଟ ଭାଙ୍ଗିଯାଇଥିଲା। ପରେ ବେଲଘର ଅଞ୍ଚଳରେ ଦୀର୍ଘ ଦିନ ଧରି ବିଦ୍ୟୁତ ସରବରାହ ବନ୍ଦ ରହିଛି।ବିଦ୍ୟୁତ ବିଚ୍ଛିନ୍ନ ଯୋଗୁଁ ଅଞ୍ଚଳବାସୀ ନାନା ସମସ୍ୟାର ସମ୍ମୁଖୀନ ହୋଇ ଅତିଷ୍ଠ ହୋଇପଡ଼ିଛନ୍ତି। ଏହାକୁ ନେଇ ବାରମ୍ବାର ବିଦ୍ୟୁତ ବିଭାଗ କାର୍ଯ୍ୟାଳୟକୁ ଯାଇ ଅଭିଯୋଗ କରିଥିଲେ ମଧ୍ୟ କୌଣସି ସୁଫଳ ମିଳି ନ ଥିବା ବେଲଘର ଅଞ୍ଚଳବାସୀ ଅଭିଯୋଗ କରିଛନ୍ତି।
ଗତ ଶନିବାର ଏକ କାର୍ଯ୍ୟକ୍ରମ ଅବସରରେ ତୁମୁଡିବନ୍ଧ ବିଦ୍ୟୁତ ବିଭାଗର ଯନ୍ତ୍ରୀ ବେଲଘର ଅଞ୍ଚଳକୁ ଯାଇଥିଲେ। ଖବର ପାଇ ଅଞ୍ଚଳବାସୀ ତାଙ୍କୁ ଅଟକ ରଖି ବିଦ୍ୟୁତ ସରବରାହ କେବେ ସ୍ୱାଭାବିକ ହେବ ବୋଲି ପଚାରିଥିଲେ। ଯନ୍ତ୍ରୀଙ୍କ ଉତ୍ତରରେ ସନ୍ତୁଷ୍ଟ ନ ହୋଇ ଅଞ୍ଚଳବାସୀ ତାଙ୍କଠାରୁ ଲିଖିତ ପ୍ରତିଶ୍ରୁତି ଦାବି କରିଥିଲେ।
ପରେ ଯନ୍ତ୍ରୀ ଏକ ଲିଖିତ ପତ୍ର ପ୍ରଦାନ କରି ନିଜ ଦସ୍ତଖତ କରିଥିଲେ। ସେହି ପତ୍ରରେ ବେଲଘର ଅଞ୍ଚଳରେ ୪୮ ଘଣ୍ଟା ମଧ୍ୟରେ ବିଦ୍ୟୁତ ସରବରାହ ସ୍ୱାଭାବିକ କରିବା ସହ ବିଭିନ୍ନ ବିଦ୍ୟୁତ ସମସ୍ୟାର ସମାଧାନ କରିବାକୁ ପ୍ରତିଶ୍ରୁତି ଦେଇଥିବା ଜଣାପଡ଼ିଛି। ଏପରିକି ବିଦ୍ୟୁତ ସଂଯୋଗ ସ୍ୱାଭାବିକ ନହେବା ପର୍ଯ୍ୟନ୍ତ ବେଲଘର ଛାଡ଼ି ଯିବେ ନାହିଁ ବୋଲି ମଧ୍ୟ ଉଲ୍ଲେଖ ଥିବା ସୂଚନା ମିଳିଛି।
ଏହାପରେ ଅଞ୍ଚଳବାସୀ ବିଦ୍ୟୁତ ନ ଆସିବା ପର୍ଯ୍ୟନ୍ତ ଯନ୍ତ୍ରୀଙ୍କୁ ସୁରକ୍ଷିତ ଭାବେ ଥାନାରେ ରଖିବାକୁ ଥାନା ଅଧିକାରୀଙ୍କୁ ଅନୁରୋଧ କରିଥିଲେ। କିନ୍ତୁ ପରଦିନ ସକାଳେ କିଛି ଯୁବକ ଥାନାକୁ ଯାଇ ଯନ୍ତ୍ରୀ ସେଠାରେ ନଥିବା ଦେଖିଥିଲେ। ଏହି ଘଟଣା ପ୍ରଚାରିତ ହେବା ପରେ ଅଞ୍ଚଳବାସୀ ଉତ୍ୟକ୍ତ ହୋଇ ଥାନା ଆଗରେ ହୋହଲ୍ଲା କରିଥିଲେ। ଖବର ଲେଖାଯିବା ପର୍ଯ୍ୟନ୍ତ ଥାନା ସମ୍ମୁଖରେ ଉତ୍ତେଜନା ଲାଗି ରହିଥିବା ସୂଚନା ମିଳିଛି।
