ନୂଆଦିଲ୍ଲୀ, ୮।୭: ଇଂଲଣ୍ଡ ବିପକ୍ଷରେ ଟିମ ଇଣ୍ଡିଆକୁ ତାର ଟି-୨୦ ଇତିହାସର ସବୁଠାରୁ ଲଜ୍ଜାଜନକ ପରାଜୟର ସାମ୍ନା କରିବାକୁ ପଡ଼ିଛି। ତୃତୀୟ ଟି-୨୦ ମ୍ୟାଚରେ ଇଂଲଣ୍ଡ ହାତରୁ ଭାରତୀୟ ଦଳ ୧୨୫ ରନ୍ର ଏକ ବଡ଼ ପରାଜୟ ଭୋଗିଛି। ଏହି ମ୍ୟାଚରେ ଟିମ ଇଣ୍ଡିଆର ଉଭୟ ବୋଲିଂ ଏବଂ ବ୍ୟାଟିଂ ଅତ୍ୟନ୍ତ ନିରାଶାଜନକ ରହିଥିଲା। କିଛି ପ୍ରମୁଖ ଖେଳାଳିଙ୍କ ଉପରେ ପ୍ରଶଂସକଙ୍କ ବହୁତ ଆଶା ଥିଲା, କିନ୍ତୁ ସେମାନଙ୍କର ଖରାପ ପ୍ରଦର୍ଶନ ଯୋଗୁ ଦଳର ନାଁ ବୁଡ଼ିଯାଇଛି। ଆସନ୍ତୁ ଜାଣିବା ଭାରତର ଏହି ପରାଜୟର କିଛି ପ୍ରମୁଖ କାରଣ:
ଟିମ ଇଣ୍ଡିଆର ଷ୍ଟାର୍ ବ୍ୟାଟର ଅଭିଷେକ ଶର୍ମା ପୂର୍ବ ମ୍ୟାଚରେ ଭଲ ଇନିଂସ ଖେଳିଥିଲେ, କିନ୍ତୁ ଏହି ମ୍ୟାଚରେ ସେ ସମ୍ପୂର୍ଣ୍ଣ ଫ୍ଲପ ସାବ୍ୟସ୍ତ ହୋଇଥିଲେ। ସେ ମାତ୍ର ୧୦ ରନ କରି ପାଭିଲିୟନ ଫେରିଥିଲେ। ସେ ଆଉଟ ହେବା ପରେ ଅନ୍ୟ ଓପନର ବୈଭବ ସୂର୍ଯ୍ୟବଂଶୀଙ୍କ ଉପରେ ଚାପ ବଢ଼ିଯାଇଥିଲା।
ଗତ କିଛି ମାସ ହେବ ଜବରଦସ୍ତ ଫର୍ମରେ ଥିବା ବୈଭବ ସୂର୍ଯ୍ୟବଂଶୀ ୫ଟି ବଲର ସାମ୍ନା କରି ୨ଟି ଛକା ସହ ୧୩ ରନ କରିଥିଲେ। ସେ ଭଲ ଟଚ୍ରେ ଥିବା ପରି ମନେହେଉଥିଲେ ମଧ୍ୟ ନିଜ ଇନିଂସକୁ ବଡ଼ କରିପାରିନଥିଲେ, ଯାହା ଦଳ ପାଇଁ ଏକ ବଡ଼ ଝଟକା ସାଜିଥିଲା। ଶ୍ରେୟସ ଆୟରଙ୍କ ସମେତ ମଧ୍ୟକ୍ରମର ଅନ୍ୟ ବ୍ୟାଟରମାନେ ମଧ୍ୟ ଶୀଘ୍ର ଆଉଟ ହେବା କାରଣରୁ ଭାରତ ମାତ୍ର ୭୬ ରନରେ ଅଲଆଉଟ ହୋଇଯାଇଥିଲା। ୪୧ ରନର ୩ଟି ଉଇକେଟ୍ ହରାଇବା ପରେ ଅଭିଜ୍ଞ ବ୍ୟାଟର ଶ୍ରେୟସ ଆୟରଙ୍କୁ ସମ୍ଭାଳି କରି ଖେଳିବାର ଆବଶ୍ୟକତା ଥିଲା। ହେଲେ, ‘ସରପଞ୍ଚ ସାହେବ’ ଏକ ବଡ଼ ସଟ ଖେଳିବା ଚକ୍କରରେ ଜ୍ୟାକବ ବେଥେଲଙ୍କୁ କ୍ୟାଚ ଦେଇ ବସିଲେ। ସେ ମଧ୍ୟ ଟିମ ଇଣ୍ଡିଆର ଏହି ପରାଜୟର ସବୁଠାରୁ ବଡ଼ ‘ଭିଲେନ’ଙ୍କ ମଧ୍ୟରୁ ଜଣେ ।
ତିଲକ ବର୍ମା ଭାରତୀୟ ଦଳର ଉପ-ଅଧିନାୟକ ଅଟନ୍ତି। ଦଳ କ୍ରମାଗତ ଭାବେ ଉଇକେଟ ହରାଉଥିବା ବେଳେ ବର୍ମା ଅତ୍ୟନ୍ତ ଧିମା ବ୍ୟାଟିଂ କରିଥିଲେ ଏବଂ ୧୧ଟି ବଲରେ ମାତ୍ର ୩ ରନ କରି ଆଉଟ ହୋଇଥିଲେ। ବର୍ମା ଅଧିକ ବଲ ଖେଳି ଚାପ କମାଇବା ବଦଳରେ ଓଲଟା ବଢ଼ାଇ ଦେଇଥିଲେ, ଯେଉଁଥିପାଇଁ ସେ ୱିଲ ଜ୍ୟାକ୍ସଙ୍କ ବଲରେ ଷ୍ଟମ୍ପ ଆଉଟ ହୋଇଯାଇଥିଲେ।
ଅନ୍ୟପଟେ ଅକ୍ଷର ପଟେଲ ତୃତୀୟ ଟି-୨୦ ମ୍ୟାଚରେ ଭାରତୀୟ ଦଳ ପାଇଁ ସବୁଠାରୁ ମହଙ୍ଗା ବୋଲର ସାବ୍ୟସ୍ତ ହୋଇଥିଲେ। ପଟେଲ ୧୨.୨୫ ଇକୋନୋମିରେ ୪୯ ରନ ବ୍ୟୟ କରିଥିଲେ। ଏହା ବ୍ୟତୀତ ବ୍ୟାଟିଂରେ ମଧ୍ୟ ଅକ୍ଷର କିଛି ଖାସ କମାଲ କରିପାରିନଥିଲେ ଏବଂ ମାତ୍ର ୧୦ ରନ କରି ପାଭିଲିୟନ ଫେରିଥିଲେ।