ପଟ୍ଟାମୁଣ୍ଡାଇ, ୮ା୧୧ (କଳ୍ପତରୁ ନାୟକ):ସରକାରୀ ଜମିରୁ ଜବରଦଖଲ ଓ ଏହାର ସୁରକ୍ଷା ପ୍ରସଙ୍ଗରେ ରାଜ୍ୟ ସରକାର ନୀତିଗତ ନିଷ୍ପତ୍ତି ନେଇଛନ୍ତି। ଏହି ପ୍ରସଙ୍ଗକୁ ସରକାର ପ୍ରାଥମିକତା ଦେଇ ବେଆଇନ ଜବରଦଖଲ ଉଚ୍ଛେଦ ପାଇଁ ଫଳପ୍ରଦ ପଦକ୍ଷେପ ନିଆଯାଉଛି ବୋଲି ଅକ୍ଟୋବର ୨୯ରେ ଏକ ଜନସ୍ବାର୍ଥ ମାମଲାରେ ସରକାରଙ୍କ ପକ୍ଷରୁ ହାଇକୋର୍ଟରେ ଦର୍ଶାଯାଇଛି। ହେଲେ କେନ୍ଦ୍ରାପଡ଼ା ଜିଲା ପଟ୍ଟାମୁଣ୍ଡାଇ ଅଞ୍ଚଳର କେତେଜଣ ଦୁର୍ନୀତି ଖୋର ଅଧିକାରୀଙ୍କ ପାଇଁ ବିଭିନ୍ନ ସ୍ଥାନରେ ବହୁ ମୂଲ୍ୟବାନ୍ ସରକାରୀ ଜମି ଜବରଦଖଲ କରାଯାଇ ବେଆଇନ ଭାବେ ଲୋକେ ନିଜ ନାମରେ କରି ନେଉଛନ୍ତି। ରାଜ୍ୟ ସରକାରଙ୍କ ନିର୍ଦ୍ଦେଶକୁ ଅଧିକାରୀମାନେ ଫୁ କରି ଉଡ଼ାଇ ଦେଉଛନ୍ତି। ଜବରଦଖଲ ଥିବା ବିଭାଗୀୟ ଜାଗାକୁ ସରକାରୀ ଅଧୀନକୁ ଆଣିବାକୁ ମାଲି ମକଦ୍ଦମା ହେଉଥିଲେ ମଧ୍ୟ ପ୍ରମାଣ ଅଭାବରୁ ବାଦ୍ ଦିଆଯାଇ ଜବରଦଖଲକାରୀଙ୍କ ସପକ୍ଷରେ ଆଦେଶ ହେଉଛି। ଏପରି ପଟ୍ଟାମୁଣ୍ଡାଇ ସହରରେ ସରକାରୀ ଜମି ଜବରଦଖଲ ବଢ଼ି ଚାଲିଥିବା ବେଳେ କେନ୍ଦ୍ରାପଡ଼ା ଜିଲା ପ୍ରଶାସନ ଓ ପଟ୍ଟାମୁଣ୍ଡାଇ ତହସିଲ କି ପୌର କାର୍ଯ୍ୟାଳୟର ଉଦାସୀନତା ପାଇଁ ତାହା କାର୍ଯ୍ୟକାରୀ ହୋଇପାରୁନାହିଁ ବୋଲି ଜନ ଅସନ୍ତୋଷ ବୃଦ୍ଧି ପାଇଛି।
ଆଇନଜୀବୀ ଶତ୍ରୁଜିତ ନାୟକ କହିଛନ୍ତି, ପଟ୍ଟାମୁଣ୍ଡାଇ ମ୍ୟୁନିସିପାଲିଟିର ବହୁ ମୂଲ୍ୟବାନ୍ ସରକାରୀ ଜମି ବିଭିନ୍ନ ସାମାଜିକ ସଂସ୍ଥା ଆଳରେ ଜମି ବ୍ୟବସାୟୀମାନେ କବ୍ଜା କରି ନେଉଛନ୍ତି। ପ୍ରଶାସନ ପକ୍ଷରୁ ଲଗାଯାଇଥିବା ସରକାରୀ ନିଷିଦ୍ଧାଞ୍ଚଳ ଫଳକକୁ ବି ଓପାଡ଼ି ଫୋପାଡ଼ି ଦେଉଛନ୍ତି। ସରକାରୀ ଜମିକୁ ଜବରଦଖଲ କଲା ପରେ ଘର କରି ବିକ୍ରି କରିଚାଲିଛନ୍ତି। ରାସ୍ତା ଉପରେ ବି ଘର କରି ଭଡ଼ା ଲଗାଯାଉଛି। ଯିଏ ପ୍ରତିବାଦ କରୁଛନ୍ତି ତାଙ୍କୁ ବିଭିନ୍ନ ପ୍ରକାର ଧମକ ଦିଆଯାଉଛି। ସାବିକ ନକ୍ସାରେ ବିଭାଗୀୟ କାର୍ଯ୍ୟାଳୟ ଓ ରାସ୍ତା ଅଛି। ମାତ୍ର ହାଲ୍ରେ କେତେଜଣ କୁଚକ୍ରୀ ଚକବନ୍ଦୀ ଓ ତହସିଲ ଅଧିକାରୀ ସରକାରୀ ଜାଗାଗୁଡିକୁ ଜମି ବ୍ୟବସାୟୀଙ୍କ ଅଧୀନକୁ ଟେକି ଦେଇଛନ୍ତି। ଅନ୍ୟପକ୍ଷରେ ସେ ଅଧିକାରୀ ନିଜନିଜ ନାମରେ ଜମି ଜବରଦଖଲ କରି ରଖିଛନ୍ତି। ଏ ନେଇ ପ୍ରଶାସନ ପାଖରେ ସବୁ ଖବର ରହିଥିଲେ ମଧ୍ୟ ସରକାରୀ ବାବୁମାନେ ଚୁପ୍ ହୋଇ ବସି ରହୁଛନ୍ତି। ପରିଣାମ ସ୍ବରୂପ ସରକାରୀ ଜମି ଶାଗମାଛ ଦରରେ ବିକ୍ରି ଚାଲିଛି। ସାମଜିକ କର୍ମୀ ଅନନ୍ତ ଦାଶ, କ୍ଷୀରୋଦ ମଲିକ, ବୁଦ୍ଧିଜୀବୀ ପ୍ରଫୁଲ୍ଲ ଦାଶ କହିଛନ୍ତି, ୧୯୮୦ ମସିହାରେ ହୋଇଥିବା ବନ୍ଦୋବସ୍ତରେ କେତେଜଣ ପ୍ରଭାବଶାଳୀ ଲୋକ ସ୍ଥାନୀୟ ତହସିଲଦାର ଓ ଚକବନ୍ଦୀର ଜଣେ ଅମିନଙ୍କୁ ହାତକରି ବହୁ ଏକର ସରକାରୀ ଜମି ନିଜ ନାମରେ କରାଇ ନେଇଛନ୍ତି। ବିଶେଷକରି ପୋତା ଗୋବରୀ ନଦୀ କିସମ ଥିବାବେଳେ ଏହା କିପରି ନାମକୁ ଗଲା ତାହା ପ୍ରଶ୍ନବାଚୀ ସୃଷ୍ଟି କରିଛି। ଅପରପକ୍ଷରେ ଅକ୍ଟୋବର ୨୯ରେ ଯାଜପୁରର ଦର୍ପଣ ତହସିଲ ଅଞ୍ଚଳର ହୋଇଥିବା ଏକ ଜନସ୍ବାର୍ଥ ମାମଲାରେ ସରକାରଙ୍କ ପକ୍ଷରୁ ଅତିରିକ୍ତ ସରକାରୀ ଓକିଲ (ଏଜିଏ) ଦେବାଶିଷ ତ୍ରିପାଠୀ ଦର୍ଶାଇଥିଲେ, ସରକାରୀ ଜମି ଜବରଦଖଲ ପ୍ରସଙ୍ଗରେ ରାଜ୍ୟ ସରକାର ଶୂନ୍ୟ ସହନଶୀଳ ନୀତି ଅବଲମ୍ବନ କରୁଛନ୍ତି। ସରକାରୀ ଜମିରୁ ଜବରଦଖଲ ଉଚ୍ଛେଦ ଓ ଏହାର ନିରାକରଣ ପାଇଁ ସରକାର ନୂଆନୀତି ପ୍ରଣୟନ କରିଛନ୍ତି। ଆକ୍ସନ ପ୍ଲାନ୍ କାର୍ଯ୍ୟକାରୀ କରିବାକୁ ନିର୍ଦ୍ଦେଶନାମା ଜାରି କରାଯାଇଛି। ଏ ନେଇ ରାଜସ୍ବ ଓ ବିପର୍ଯ୍ୟୟ ପରିଚାଳନା ବିଭାଗ ପକ୍ଷରୁ ସବୁ ଜିଲାପାଳଙ୍କୁ ଅଗଷ୍ଟ ୨୨ରେ ନିର୍ଦ୍ଦେଶନାମା ଜାରି କରାଯାଇଛି ବୋଲି ସେ ଦର୍ଶାଇଥିଲେ। ମାତ୍ର ପଟ୍ଟାମୁଣ୍ଡାଇ ଅଞ୍ଚଳରେ ପରିବହନ ବିଭାଗ ରାସ୍ତା, ପୂର୍ତ୍ତ ବିଭାଗ ଜାଗା, ବିଦ୍ୟୁତ୍, ରାଜସ୍ବ, ନଦୀ, ଜଳାଶୟ, ଅନାବାଦୀ, ଗୋଚର, ରଖିତ ଓ ଶ୍ମଶାନ ଜାଗା ଜବରଦଖଲରେ ଥିଲେ ମଧ୍ୟ କେନ୍ଦ୍ରାପଡ଼ା ଜିଲାପାଳ କି ସ୍ଥାନୀୟ ତହସିଲ ଓ ପୌରପାଳିକା କୌଣସି ପଦକ୍ଷେପ ନ ନେଇ ବଡବଡିଆଙ୍କୁ ଅନୁକମ୍ପା ଦେଖାଇ ଛାଡ଼ି ଦେଉଛନ୍ତି। ହେଲେ ଦୁର୍ଗାପୂଜା ପୂର୍ବରୁ ପେଟପାଟଣା ପାଇଁ ବସିଥିବା କେତେଜଣ ଗରିବ ଉଠା ଦୋକାନୀଙ୍କ ଉପରେ ସରକାରୀ ବଳ ଜାହିର କରି ତାଙ୍କ ଦୋକାନ ଭାଙ୍ଗିଦେଇଛନ୍ତି। ଏହା ସରକାରୀବାବୁଙ୍କ ପାରିବା ପଣିଆକୁ ପଦାରେ ପକାଇଥିବା ବେଳେ ସରକାରଙ୍କ ଗରିବଙ୍କୁ ପ୍ରତାରଣା ନୀତି ବୋଲି ସାଧାରଣରେ ଚର୍ଚ୍ଚା ହେଉଛି। ଏ ସମ୍ପର୍କରେ ଉପଜିଲାପାଳ ଅରୁଣ କୁମାର ନାୟକଙ୍କୁ ପଚାରିବାରେ ଏ ପର୍ଯ୍ୟନ୍ତ କୌଣସି ପିଟିଶନ ହସ୍ତଗତ ହୋଇନାହିଁ, ହେଲେ ତଦନ୍ତ କରିବି ବୋଲି ସେ କହିଛନ୍ତି।
Dharitri – Odisha’s No.1 Odia Daily
