ବଅଁରପାଳ,୨୫ା୪(ଡି.ଏନ.ଏ.): ନବରତ୍ନପ୍ରାପ୍ତ ଅନୁଗୋଳ ଜିଲା ନାଲ୍କୋ ପ୍ଲାଣ୍ଟର କାର୍ଯ୍ୟରତ କର୍ମଚାରୀମାନଙ୍କ ରହିବା ନିମନ୍ତେ ଟାଉନଶିପ୍ରେ ରହିଛି ନାଲ୍କୋ କଲୋନି। ଏଠାରେ ୫ ହଜାରରୁ ଅଧିକ କର୍ମଚାରୀ ରହୁଛନ୍ତି। ସେହିପରି ବହୁ ସରକାରୀ ଅଧିକାରୀଙ୍କୁ ନାଲ୍କୋ କ୍ୱାର୍ଟର୍ସ ଯୋଗାଇ ଦେଇଛି। କଲୋନିରେ ରହୁଥିବା କର୍ମଚାରୀଙ୍କଠାରୁ ବିଦ୍ୟୁତ୍, କେବୁଲ ଟିଭି ଓ ପାଣି ବିଲ୍ ବାବଦରେ ମାସିକ ଟଙ୍କା ନିଆଯାଉଛି। କିନ୍ତୁ କଲୋନି ମଧ୍ୟରେ ବେଆଇନ ଭାବେ ଗଢ଼ି ଉଠିଥିବା କେତୋଟି ଧର୍ମାନୁଷ୍ଠାନକୁ କର୍ତ୍ତୃପକ୍ଷ ଅନୁକମ୍ପା ପ୍ରଦର୍ଶନ କରୁଥିବାରୁ କଲୋନିବାସିନ୍ଦାଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି। କରୋନା ସମୟରେ ଏସବୁ ଧର୍ମାନୁଷ୍ଠାନକୁ ବାହାର ଅଞ୍ଚଳର ଲୋକେ ଆସୁଥିବାରୁ ସଂକ୍ରମଣ ବ୍ୟାପିବାର ଭୟ ରହୁଥିବା ଅଭିଯୋଗ ହେଉଛି। କେତୋଟି ଧର୍ମାନୁଷ୍ଠାନ କଲୋନି ଜମି ଜବରଦଖଲ କରିଛନ୍ତି। ବିନା ଦେୟରେ ବିଦ୍ୟୁତ୍, ପାଣି, କେବୁଲ ଟିଭି ସଂଯୋଗ ନେଇଛନ୍ତି। ଘରଦ୍ୱାର କରି ବାହାର ଲୋକଙ୍କୁ ଭଡ଼ା ଦେଇଛନ୍ତି। ଭଡ଼ାରେ ରହୁଥିବା କେତେଜଣ ବ୍ୟକ୍ତି ନାଲ୍କୋର ବଡ଼ ବଡ଼ ଅଧିକାରୀଙ୍କ ଘରେ କାମ କରୁଛନ୍ତି। ଏସବୁ ଧର୍ମାନୁଷ୍ଠାନରେ କରୋନା କଟକଣା ପାଳନ ହେଉ ନ ଥିଲେ ମଧ୍ୟ ବାରଣ କରିବାକୁ କେହି ସାହସ କରୁନାହାନ୍ତି। ଏ ନେଇ କଲୋନିବାସିନ୍ଦାଙ୍କ ମଧ୍ୟରେ ତୀବ୍ର ଅସନ୍ତୋଷ ପ୍ରକାଶ ପାଇଛି। ନାଲ୍କୋ ସିଏମ୍ଡି ଶ୍ରୀଧର ମହାପାତ୍ରଙ୍କ ସହ ଯୋଗାଯୋଗ କରିବାକୁ ଚେଷ୍ଟା କରାଯାଇଥିଲେ ମଧ୍ୟ ସେ ଫୋନ ଉଠାଇ ନ ଥିଲେ।
ବାରଣ କରାଯାଉନି
ନାଲ୍କୋ କଲୋନିର ଶତାଧିକ ଏକର ଜମି କେତୋଟି ଧର୍ମାନୁଷ୍ଠାନ ଜବରଦଖଲରେ ରହିଛି। ବେଆଇନ ଭାବେ ଏଠାକୁ ପାଣି, ବିଦ୍ୟୁତ୍ ସଂଯୋଗ ହୋଇଛି। ବାହାର ଲୋକେ ଆସୁଥିଲେ ମଧ୍ୟ ବାରଣ କରିବାକୁ କେହି ନାହାନ୍ତି।
-ନିର୍ମଳ ସାମଲ,
ସାଧାରଣ ସମ୍ପାଦକ, ନେସ୍
ଚାଲିଛି ଅସାମାଜିକ କାର୍ଯ୍ୟକଳାପ
କଲୋନି ପରିସରରେ ଥିବା କେତୋଟି ଧର୍ମାନୁଷ୍ଠାନରେ ବେଆଇନ କାର୍ଯ୍ୟକଳାପ ଚାଲିଥିବା ଅନେକ ସମୟରେ ଦେଖାଯାଉଛି। ଏହାକୁ ନେଇ କଲୋନିବାସିନ୍ଦାଙ୍କ ମଧ୍ୟରେ ଅସନ୍ତୋଷ ଥିଲେ ମଧ୍ୟ କହିବାକୁ ସାହସ କରୁନାହାନ୍ତି।
-ମାଙ୍ଗିଲାଲ ସାମଲ, କାର୍ଯ୍ୟକାରୀ ସଭାପତି, ନେପୁ
କେତେଜଣ ଅଧିକାରୀ ସମ୍ପୃକ୍ତ
ନାଲ୍କୋର କେତେଜଣ ଅଧିକାରୀଙ୍କ ସହାୟତାରେ କଲୋନି ଜାଗା ଜବରଦଖଲ କରାଯାଇଛି। ବେଆଇନ ଭାବେ ଘର ନିର୍ମାଣ କରାଯାଇ ଭଡ଼ା ଲଗାଯାଇଛି। ନାଲ୍କୋ କର୍ତ୍ତୃପକ୍ଷଙ୍କ ଜାଣତରେ ଏସବୁ କାର୍ଯ୍ୟ ଚାଲିଛି।
-ବିଭବ ଜେନା, କାର୍ଯ୍ୟକାରୀ ସଭାପତି, ଏନ୍ଏସ୍ସିୟୁ
କାର୍ଯ୍ୟାନୁଷ୍ଠାନ ନିଆଯିବ
ନାଲକୋ କଲୋନିରେ ବହୁ ଧର୍ମାନୁଷ୍ଠାନ ବେଆଇନ ଭାବେ ଚାଲୁଛି। ପାଣି, ବିଦ୍ୟୁତ୍, ଚୋରାରେ ସଂଯୋଗ ନେଇଥିବା ଅଭିଯୋଗ ଆସିଛି। ଏହା ବିରୋଧରେ ଖୁବ୍ଶୀଘ୍ର ନାଲ୍କୋ ପକ୍ଷରୁ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
-ଅମ୍ବିକା ପ୍ରସାଦ ପଣ୍ଡା, ଇଡି,
ନାଲ୍କୋ
