ଅନୁଗୋଳ ଅଫିସ, ୭ା୫ ଅନୁଗୋଳ ଜିଲାର ବିଭିନ୍ନ କଳକାରଖାନାରେ କାର୍ଯ୍ୟରତ କର୍ମଚାରୀଙ୍କ ସୁରକ୍ଷା, ସ୍ବାସ୍ଥ୍ୟସେବା ସୁବିଧା ଏବଂ କମ୍ପାନୀ ପକ୍ଷରୁ ନିଆଯାଇଥିବା ଜନମଙ୍ଗଳ କାର୍ଯ୍ୟର ସମୀକ୍ଷା କରିଛନ୍ତି ଜିଲାପାଳ ସିଦ୍ଧାର୍ଥ ଶଙ୍କର ସ୍ବାଇଁ। ଏ ନେଇ ଶୁକ୍ରବାର ଜିଲା କାର୍ଯ୍ୟାଳୟ ସମ୍ମିଳନୀ କକ୍ଷରେ ଏକ ବୈଠକ ଅନୁଷ୍ଠିତ ହୋଇଥିଲା। ରାସାୟନିକ ଦୁର୍ଘଟଣା, ବିପର୍ଯ୍ୟୟର ମୁକାବିଲା ଲାଗି ଗଠିତ ଦଳର ଭୂମିକା, କାରଖାନା ଓ ବାଷ୍ପିତ୍ର ବିଭାଗ ଦ୍ୱାରା କାର୍ଯ୍ୟକାରୀ ଆଇନଗୁଡ଼ିକୁ ଜିଲାପାଳ ସମୀକ୍ଷା କରିଥିଲେ।
ପ୍ରାରମ୍ଭରେ କାରଖାନା ଓ ବାଷ୍ପିତ୍ର ବିଭାଗର ଅନୁଗୋଳ ମଣ୍ଡଳ ସହ ନିର୍ଦ୍ଦେଶିକା ଅର୍ଜନା ଦାସ ବୈଠକର ଉଦ୍ଦେଶ୍ୟ ସମ୍ପର୍କରେ ଆଲୋକପାତ କରିବା ସହ ତୀବ୍ର ଜ୍ୱଳନଶୀଳ ଦ୍ରବ୍ୟ ସମ୍ପର୍କରେ ସବିଶେଷ ବିବରଣୀ ପ୍ରଦାନ କରିଥିଲେ। ବିଭାଗୀୟ ଉପନିର୍ଦ୍ଦେଶକ ଅବନୀକାନ୍ତ ନାୟକ କାରଖାନାଗୁଡ଼ିକ ସମ୍ପର୍କରେ ସମ୍ୟକ ଧାରଣା ଦେଇଥିଲେ। ଜରୁରୀ ସମୟରେ ରାସାୟନିକ ଦୁର୍ଘଟଣା ଓ ବିପର୍ଯ୍ୟୟର ମୁକାବିଲା ପାଇଁ ସର୍ବଦା ପ୍ରସ୍ତୁତ ରହିବାକୁ ଜିଲାପାଳ ପରାମର୍ଶ ଦେଇଛନ୍ତି। କମ୍ପାନୀରେ ସମ୍ଭାବ୍ୟ ଦୁର୍ଘଟଣା ସମୟରେ ତ୍ୱରିତ ସେବା ଲାଗି ଜିଲାରେ ଏକ ଆପାତକାଳୀନ ଯାନ କେନ୍ଦ୍ର ପ୍ରତିଷ୍ଠା କରିବା ଲାଗି ଆଲୋଚନା କରାଯାଇଛି। ବୈଠକରେ ଅତିରିକ୍ତ ଜିଲାପାଳ (ରାଜସ୍ବ) ସନ୍ତୋଷ କୁମାର ପ୍ରଧାନ, ଅକ୍ଷୟ କୁମାର ପଣ୍ଡା, ବିଭିନ୍ନ ବିଭାଗର ଅଧିକାରୀଙ୍କ ସମେତ ବିଭିନ୍ନ କାରଖାନାର କର୍ମକର୍ତ୍ତା ଯୋଗଦେଇଥିଲେ।
