କାଲିଫର୍ଣ୍ଣିଆ,୧୧।୪: ଟେସ୍ଲା ଓ ସ୍ପେସ-ଏକ୍ସର ସିଇଓ ତଥା ବିଶ୍ୱର ଏକ ନମ୍ବର ଧନୀ ଏଲନ ମସ୍କ ଟୁଇଟର୍ ବୋର୍ଡରେ ସାମିଲ ହେବେ ନାହିଁ ବୋଲି ଜଣାପଡିଛି। ଟୁଇଟର୍ରେ ଶେୟାର କିଣିବା ପରେ ମସ୍କ କମ୍ପାନୀ ବୋର୍ଡରେ ସାମିଲ ହେବେ କୁହାଯାଉଥିଲା। କିନ୍ତୁ ଟୁଇଟର୍ ସିଇଓ ପରାଗ ଅଗ୍ରୱାଲ ମସ୍କ ଦ୍ୱନ୍ଦ ଦୂର କରିଚନ୍ତି। ମସ୍କ ଟୁଇଟର୍ ବୋର୍ଡରେ ସାମିଲ ହେବେ ନାହିଁ ବୋଲି ପରାଗ ଅଗ୍ରୱାଲ ଟୁଇଟ୍ ଯୋଗେ ସୂଚନା ଦେଇଛନ୍ତି। ସେ ଟୁଇଟ୍ରେ ଲେଖିଛନ୍ତି, ଏଲନ ଆମ ବୋର୍ଡରେ ଯୋଗ ନ ଦେବାକୁ ନିଷ୍ପତ୍ତି ନେଇଛନ୍ତି। ବୋର୍ଡ ଓ ସେ ଏଲନଙ୍କୁ ନେଇ ଅନେକ ଆଲୋଚନା କରିଥିଲେ। ସିଧାସଳଖ ଭାବେ ଏଲନଙ୍କ ସହ ଏନେଇ ଆଲୋଚନା ହୋଇଥିଲା। ଏଲନ କମ୍ପାନୀର ଏକ ବଡ ଦାୟିତ୍ୱ ନେବେ ବୋଲି ବିଶ୍ୱାସ ଥିଲା। ସେ ବୋର୍ଡ ମେମ୍ବର ଓ ଶେୟାର ହୋଲ୍ଡରଙ୍କ ସହ ମିଶି କାମ କରିଥାନ୍ତେ। ବୋର୍ଡ ତାଙ୍କୁ ଅନେକ ଅଫର୍ ଦେଇଥିଲା। କିନ୍ତୁ ସେ ମନା କରିଦେଇଥିଲେ। ଏହା ପୂର୍ବରୁ ଏଲନଙ୍କୁ ଟୁଇଟର୍ ବୋର୍ଡରେ ନିଯୁକ୍ତି ଦିଆଯିବ ବୋଲି ପରାଗ ଟୁଇଟ୍ କରି ସୂଚନା ଦେଇଥିଲେ।
ସୂଚନାଯୋଗ୍ୟ, ଗତ ସପ୍ତାହରେ ଏଲନ ଟୁଇଟରର ୯.୨ ପ୍ରତିଶତ ଶେୟାର କିଣିଥିଲେ। ଏହାସହ ସେ କମ୍ପାନୀର ସବୁଠାରୁ ବଡ ଶେୟାର ହୋଲ୍ଡର ହୋଇଥିଲେ।
