ବେଙ୍ଗାଲୁରୁ, ୧୨ା୧୦(ରଏଟର୍ସ): ଚଳିତ ମାସ ୨୦ କିମ୍ବା ୨୧ରେ ରିଲାଏନ୍ସ ଜିଓ ଦେଶର ସବୁଠାରୁ ବଡ଼ ଆଇପିଓ(ଇନିସିଆଲ ପବ୍ଲିକ୍ ଅଫରିଂ) ଇସ୍ୟୁ କରିବାକୁ ଯାଉଛି। ଏହି ଆଇପିଓ ମାଧ୍ୟରେ କମ୍ପାନୀ ୧୦୬ ବିଲିୟନ ଡଲାରର ପୁଞ୍ଜି ସଂଗ୍ରହ ଲକ୍ଷ୍ୟ ରଖିଛି। କିନ୍ତୁ ଭାରତରେ ଇଣ୍ଟରନେଟ୍ ବ୍ୟବସାୟରେ ଏଲନ ମସ୍କଙ୍କ ସ୍ପେଶ୍ ଏକ୍ସ ଅଧୀନସ୍ଥ ଷ୍ଟାରଲିଙ୍କ୍ କମ୍ପାନୀ ପ୍ରବେଶ କରିବା ନେଇ ଗତ କିଛିଦିନ ହେଲା ଚାଲିଥିବା ବିବାଦ ଆହୁରି ତେଜିଥିଲାବେଳେ ଜିଓ ଆଇପିଓ ଇସ୍ୟୁ କରିବା ପୂର୍ବରୁ ମୁକେଶ ଅମ୍ବାନୀଙ୍କୁ ଟାର୍ଗେଟ କରିଛନ୍ତି ମସ୍କ। ଜିଓ ଭାରତରେ ସୁଲଭ ମୂଲ୍ୟରେ ଇଣ୍ଟରନେଟ୍ ସେବା ଯୋଗାଇ ଦେଉଥିବା ଦାବି କରୁଥିଲାବେଳେ ରିଲାଏନ୍ସ ଜିଓ ସହ ମୁକାବିଲା କରିବା ଏବଂ ସୁଲଭ ମୂଲ୍ୟରେ ସାଟେଲାଇଟ ଇଣ୍ଟରନେଟ ସେବା ଯୋଗାଇ ଦେବାକୁ ଷ୍ଟାରଲିଙ୍କ ପ୍ରସ୍ତୁତ ଅଛି ବୋଲି ମସ୍କ କହିଛନ୍ତି। ଅନ୍ୟପକ୍ଷରେ ସ୍ପେସଏକ୍ସ ମାଲିକାନାରେ ଥିବା ଷ୍ଟାରଲିଙ୍କ୍ ଭଳି ରିଲାଏନ୍ସ ଜିଓ ମଧ୍ୟ ନିଜସ୍ବ ସାଟେଲାଇଟ ସେବା ଆରମ୍ଭ କରିବାକୁ ପ୍ରସ୍ତୁତି ନେଇଥିବା କୁହାଯାଇଛି। ଏଥିପାଇଁ କେବଳ ଚୂଡ଼ାନ୍ତ ସୁରକ୍ଷା ମଞ୍ଜୁରୀକୁ ଅପେକ୍ଷା କରାଯାଇଛି।
ସୁଲଭ ଏବଂ ଶସ୍ତା ଡାଟାକୁ ନେଇ ଏବେ ଇଣ୍ଟରନେଟ୍ ବଜାରରେ ବ୍ୟବସାୟିକ ପ୍ରତିଦ୍ୱନ୍ଦ୍ୱିତା ତୀବ୍ର ହୋଇଥିଲା ବେଳେ ଭାରତରେ ଯଦି ଷ୍ଟାରଲିଙ୍କ୍ ପ୍ରବେଶ କରେ ତେବେ ପ୍ରତିଦ୍ୱନ୍ଦ୍ୱିତା ଆହୁରି ବଢିବ ବୋଲି କୁହାଯାଉଛି। କେବଳ ଇଣ୍ଟରନେଟ୍ ନୁହେଁ ସ୍ପେସଏକ୍ସ ଏବେ ମୋବାଇଲ ବଜାରରେ ମଧ୍ୟ ପ୍ରବେଶ କରିବାକୁ ଯୋଜନା କରୁଛି। ମସ୍କ କହିଛନ୍ତି, ବ୍ୟବସାୟିକ ପ୍ରତିଯୋଗିତା ଦ୍ୱାରା ଭାରତରେ ସାଧାରଣ ନାଗରିକମାନେ ଅଧିକ ବିକଳ୍ପ ପାଇ ଉପକୃତ ହେବେ। ଅମ୍ବାନୀଙ୍କ ଲାଭ ହୁଏତ କମିଯାଇପାରେ, କିନ୍ତୁ ତାଙ୍କ ବ୍ୟବସାୟ ବନ୍ଦ ହେବ ନାହିଁ।