ଓ୍ବାଶିଂଟନ୍,୨୬।୪: ଅନେକ ଦିନର ଚର୍ଚ୍ଚା ପରେ ଶେଷରେ ଟୁଇଟର୍ ଦୁନିଆର ମାଲିକାନା ହାସଲ କରିଛନ୍ତି ବିଶ୍ୱର ସବୁଠାରୁ ଧନୀ ବ୍ୟକ୍ତି ଏଲନ ମସ୍କ। ଟୁଇଟର ଇଙ୍କ୍ ୪୪ ବିଲିୟନ ଡ଼ଲାରରେ ଟୁଇଟର୍କୁ ବିକ୍ରି କରିଛି। ଏ ବାବଦରେ କମ୍ପାନୀ ବୋର୍ଡ ଅନୁମୋଦନ ଦେଇଛି। ସେହି ଅନୁଯାୟୀ, ମସ୍କଙ୍କୁ ଟୁଇଟର୍ର ଶେୟାର ପିଛା ୫୪.୨୦ ଡଲାର ମୂଲ୍ୟ ଦେବାକୁ ପଡିବ। ଟୁଇଟର୍ର ସ୍ବାଧୀନ ବୋର୍ଡର ଚେୟାରମ୍ୟାନ ବ୍ରେଟ ଟେଲର ସୋମବାର ରାତି ୧୨ଟା ପରେ ଏକ ପ୍ରେସ ବିଜ୍ଞପ୍ତିରେ ମସ୍କ ସହିତ ହୋଇଥିବା ଡିଲ ବିଷୟରେ ସୂଚନା ଦେଇଛନ୍ତି। ଏହି ଡିଲ ୨୧୭ ନିୟୁତ ୟୁଜର୍ସ ସହିତ ଟେସଲା କମ୍ପାନୀର ସିଇଓ ମସ୍କଙ୍କୁ ମାଲିକାନା ପ୍ରଦାନ କରିଛି।
ଏହି ଡିଲ ଘୋଷଣା କରି ଏଲନ ମସ୍କ କହିଛନ୍ତି, ସ୍ବାଧୀନତା ହେଉଛି କାର୍ଯ୍ୟ କରୁଥିବା ଗଣତନ୍ତ୍ରର ମୂଳଦୁଆ। ଟୁଇଟର୍ ହେଉଛି ଡିଜିଟାଲ ଟାଉନ ସ୍କୋୟାର, ଯେଉଁଠାରେ ମାନବିକତାର ଭବିଷ୍ୟତ ପାଇଁ ଗୁରୁତ୍ୱପୂର୍ଣ୍ଣ ବିଷୟ ବିତର୍କ ହେଉଛି। ମୁଁ ଉତ୍ପାଦରେ ନୂତନ ବୈଶିଷ୍ଟ୍ୟ ଯୋଗ କରି ଟୁଇଟରକୁ ପୂର୍ବାପେକ୍ଷା ଉନ୍ନତ କରିବାକୁ ଚାହୁଁଛି। ଟୁଇଟର୍ରେ ବହୁ ସମ୍ଭାବନା ରହିଛି। ମୁଁ କମ୍ପାନୀ ଏବଂ ଏହାର ୟୁଜର୍ସ ସମୁଦାୟ ସହିତ କାମ କରିବାକୁ ଉତ୍ସୁକତାର ସହ ଅପେକ୍ଷା କରିଛି।
ନିଜ ଉଦ୍ୟମରେ ଟୁଇଟର୍କୁ କିଣିବା ଲାଗି କିଛି ଦିନ ହେଲାଣି ମସ୍କ ଜୋରଦାର ଉଦ୍ୟମ କରୁଥିଲେ। ପୂର୍ବରୁ ମଧ୍ୟ ସେ କମ୍ପାନୀର ଦ୍ୱିତୀୟ ବଡ଼ ଅଂଶଧନକାରୀ ଥିଲେ। ଚଳିତ ମାସ ୧୪ ତାରିଖରେ ଟୁଇଟର୍ କିଣିବା ପାଇଁ ପ୍ରଥମ ପ୍ରସ୍ତାବ ଦେଇଥିଲେ। ସେ କମ୍ପାନୀର କିଛି ଅଂଶଧନକାରୀଙ୍କୁ ଭେଟି ଆଲୋଚନା ମଧ୍ୟ କରିଥିଲେ। ଶେଷରେ ସେ ଏଥିରେ ସଫଳ ହୋଇଛନ୍ତି। ମସ୍କ ହେଉଛନ୍ତି ଟୁଇଟର୍ର ଜଣେ ଅତ୍ୟନ୍ତ ସକ୍ରିୟ ୟୁଜର୍ସ। ବିଭିନ୍ନ ପ୍ରସଙ୍ଗରେ ସେ ଟୁଇଟ କରି ମତ ଦିଅନ୍ତି।
