ମସ୍କୋ,୨୫।୧୧: ଆର୍କଟିକ ସାଗରରେ ଦେଇ ୟୁରୋପ ଏବଂ ଏସିଆରେ ପହଞ୍ଚିବା ଏବେ କଷ୍ଟକର ହେଉଛି। ରୁଷିଆର ଗଣମାଧ୍ୟମ ରିପୋର୍ଟ କରିଛି ଯେ ଅତି କମରେ ୨୪ ଟି ଜାହାଜ ବରଫରେ ଫସି ରହିଛନ୍ତି। ତୁଷାରପାତ ହେତୁ ସମଗ୍ର ଉତ୍ତର ସାଗର ମାର୍ଗ ବନ୍ଦ ହୋଇଯାଇଛି। ବର୍ତ୍ତମାନ ଅଟକି ରହିଥିବା ଜାହାଜଗୁଡ଼ିକୁ ହଟାଇବା ପାଇଁ ରୁଷିଆକୁ ବରଫ କାଟିବା ଜାହାଜ ପଠାଇବାକୁ ପଡିଛି।
ଉତ୍ତର ସାଗର ମାର୍ଗ ପାଇଁ ରୁଷିଆ ବହୁ ଟଙ୍କା ଖର୍ଚ୍ଚ କରିଛି। ଏହି ମାର୍ଗରେ ବ୍ୟବସାୟ ସୁବିଧା ହେବ ବୋଲି ରୁଷିଆ ଅନୁମାନ କରିଥିଲା। କିନ୍ତୁ ବରଫପାତ ଯୋଗୁ ମାର୍ଗ ବନ୍ଦ ହୋଇ ସମସ୍ତ ଆକଳନ ବିଫଳ ହୋଇଛି। ନଭେମ୍ବର ମାସ ସାରା ଏହି ରାସ୍ତା ଖୋଲା ରହିବ ବୋଲି ରୁଷିଆର ଅଧିକାରୀମାନେ ପୂର୍ବରୁ ଘୋଷଣା କରିଥିଲେ। ଜଳବାୟୁ ପରିବର୍ତ୍ତନ ଏବଂ ଗ୍ଲୋବାଲ ୱାର୍ମିଂ ଯୋଗୁ ଗତ କିଛି ବର୍ଷ ମଧ୍ୟରେ ଆର୍କଟିକ୍ ସାଗରରେ ବରଫ ଜମିବାରେ ଅତ୍ୟଧିକ ବିଳମ୍ବ ହୋଇଯାଇଥିଲା। ତେଣୁ ବିଶେଷଜ୍ଞମାନେ ଏଭଳି କହିଥିଲେ। ଅକ୍ଟୋବର ଶେଷରେ ଲାପଟଓ୍ବେ ସାଗର ଏବଂ ପୂର୍ବ ସାଇବେରିଆ ସାଗରରେ ଏତେ ଶୀଘ୍ର ଅକ୍ଟୋବର ପରେପରେ ବରଫ ଜମିଥିବାରୁ ଉତ୍ତର ସାଗର ମାର୍ଗର ଅପରେଟରମାନେ ଆଶ୍ଚର୍ଯ୍ୟ ହୋଇଯାଇଛନ୍ତି।
ଅଧିକାରୀମାନେ ବର୍ତ୍ତମାନ ରୁଷିଆର ରାଜଧାନୀ ମସ୍କୋରେ ସର୍ଚ୍ଚ ଓ ଉଦ୍ଧାର କାର୍ଯ୍ୟରେ ନିୟୋଜିତ ରହିଛନ୍ତି। ବରଫ କାଟିବା ପାଇଁ ଦୁଇଟି ପରମାଣୁ ଶକ୍ତିରେ ଚାଳିତ ଜାହାଜକୁ ପଠାଯାଇଛି। ତେବେ ବରଫରେ ଫସିଥିବା ଜାହାଜ ଆସନ୍ତା କିଛି ମାସ ପାଇଁ ସେଠାରେ ରହିବାକୁ ବାଧ୍ୟ ହେବେ।
ଅଧିକାରୀମାନେ କହିଛନ୍ତି ଯେ ଏହି ଅଞ୍ଚଳର ପାଣିପାଗ ଦ୍ରୁତ ଗତିରେ ବଦଳିଗଲା। ଭୁଲ ପାଣିପାଗ ରିପୋର୍ଟ ଯୋଗୁ ଜାହାଜଗୁଡ଼ିକ ବରଫରେ ଅଟକି ରହିଛନ୍ତି।
ଅଧିକାରୀ କହିଛନ୍ତି ଗତ ୭ ବର୍ଷ ମଧ୍ୟରେ ପ୍ରଥମ ଥର ଲାଗି ସମୁଦ୍ର ବରଫ ପାଲଟି ଯାଇଛି। ଅଟକି ରହିଥିବା ଜାହାଜଗୁଡ଼ିକ ମଧ୍ୟରେ କାର୍ଗୋ ଏବଂ ଦୁଇଟି ତେଲ ଟ୍ୟାଙ୍କର୍ ଅଛି। ୟୁରୋପ ଏବଂ ରୁଷିଆକୁ ସଂଯୋଗ କରିବାରେ ଉତ୍ତର ସାଗର ମାର୍ଗ ଏକ ପ୍ରମୁଖ ଭୂମିକା ଗ୍ରହଣ କରିଥାଏ। ଏହି ମାର୍ଗରେ ସମୁଦ୍ର ଯାତ୍ରାର ପଥ ବହୁ କମି ଯାଇଥାଏ।
