ବୁଗୁଡ଼ା,୫ା୯(କାଳି ଚରଣ ଦାଶ): ବୁଗୁଡ଼ା ବନାଞ୍ଚଳ ଅନ୍ତର୍ଗତ ତାକରଡ଼ା ଗ୍ରାମରେ ୧୩ ଟିକିଆ ହାତୀପଲ ବ୍ୟାପକ ମକା ଫସଲ ନଷ୍ଟ କରିଛନ୍ତି। ଶନିବାର ମଧ୍ୟରାତ୍ରରେ ହାତୀପଲ ତାକରଡା ଗାଁର ବିଭିନ୍ନ ମକା କିଆରିରେ ପଶି ଫସଲ ନଷ୍ଟ କରିବା ସହ ବିକ୍ରି ପାଇଁ ତୋଳାଯାଇ ଗଦାକରି ରଖାଯାଇଥିବା ମକାଗୁଡିକୁ ଖାଇ ଦେଇଛନ୍ତି। ଏଥିସହ ଗାଁ ମୁହାଁ ହାତୀପଲ କିଛି ଚାଷୀଙ୍କ ଧାନ ବିଲ ଦେଇ ଆସିଥିବାରୁ ସେମାନଙ୍କ ଧାନ ତଳିକୁ ମଧ୍ୟ ଦଳି ଚକଟି ନଷ୍ଟ କରି ଦେଇଛନ୍ତି। ଏ ନେଇ ତାକରଡା ଗ୍ରାମର କ୍ଷତିଗ୍ରସ୍ତ ଚାଷୀ ସନ୍ୟାସୀ ପ୍ରଧାନ ରବିବାର ମାଣିତରା ଫରେଷ୍ଟ ସେକ୍ସନରେ ଅଭିଯୋଗ କରିଥିବା ବେଳେ ସୋମବାର ଫରେଷ୍ଟର ସୁନୀତା ପାତ୍ର ପହଞ୍ଚି କ୍ଷୟକ୍ଷତିର ଆକଳନ କରି ଫେରିଛନ୍ତି। ସୂଚନାଯୋଗ୍ୟ, ଏହି ୧୩ ଟିକିଆ ହାତୀପଲରେ ୩ଟି ମାଈ ଓ ଅଣ୍ଡିରା ହାତୀ ଏବଂ ୭ଟି ଛୁଆ ହାତୀ ରହିଥିବା ବେଳେ ଏମାନେ ଓଡଗାଁ ଜଙ୍ଗଲରୁ ପ୍ରଥମେ ପଞ୍ଚଭୁତି ଜଙ୍ଗଲ ଏବଂ ପରେ ମାଣିତରାର ସେନାପତି ଜଙ୍ଗଲ ଦେଇ ତାକରଡାରେ ପ୍ରବେଶ କରି ଉପଦ୍ରବ ମଚାଇ ସଂପ୍ରତି ସମଲେଈ ଜଙ୍ଗଲରେ ରହିଥିବାରୁ ପୁଣି କେତେବେଳେ ସେମାନେ ଫେରିଆସି ଫସଲ ନଷ୍ଟ କରିଦେବା ଭୟରେ ଚାଷୀମାନେ ନିଆଁ ହୁଳା ଓ ବାଣ ଧରି ରାତି ଉଜାଗର ରହୁଥିବା ସରପଞ୍ଚ ଦିଲ୍ଲୀପ କୁମାର ପ୍ରଧାନଙ୍କଠାରୁ ଜଣାଯାଇଛି।
