କେନ୍ଦୁଝର,୨୯ା୬ (ନରେଶ ଚନ୍ଦ୍ର ପଟ୍ଟନାୟକ): ଚମ୍ପୁଆ ରେଞ୍ଜ ବାଲିବନ୍ଧ ବନପାଳ ଅଧିନସ୍ଥ ଲକ୍ଷ୍ମୀପଶି ବିଟ ଅଞ୍ଚଳରେ ହାତୀ ପଲ ପଶି ଘର ଭାଙ୍ଗିବା ସହିତ ଘର ଭିତରେ ଥିବା ଧାନ, ଚାଉଳକୁ ଖାଇ ଘରେ ଥିବା ଜିନିଷକୁ ଦଳି ଚକଟି ନଷ୍ଟ କରିଦେଇଥିବା ଦେଖିବାକୁ ମିଳିଛି । ଚମ୍ପୁଆ ବନଚଳରେ ରହୁଥିବା ୨୨ ଗୋଟି ହାତୀ ମଧ୍ୟରୁ ୯ ଗୋଟି ହାତୀ ଅଲଗା ହୋଇ ବାହାରି ଆସି ଝୁମ୍ପୁରା ବ୍ଲକର ମଣଦା ଗ୍ରାମରେ ପଶିଥିଲେ। ସେହି ଗ୍ରାମର ବିନତୀ ବେଟକାର, ଉଦ୍ଧବ ବେଟକାର, ନବୀନ ପୂର୍ତୀ, ବିନୋଦ ବେଟକାର, ବୁଲୁ ବେଟକାରଙ୍କ ଘରର କାନ୍ଥ ଭାଙ୍ଗିବା ସହିତ ଘରେ ରହିଥିବା ଧାନ ଚାଉଳକୁ ଖାଇ ଯାଇଥିବା ଦେଖିବାକୁ ମିଳିଛି। ତାକୁ ଆକଳନ କରି କ୍ଷୟକ୍ଷତି ପ୍ରଦାନ କରାଯିବ ବୋଲି ବନପାଳ ସୂଚନା ପ୍ରଦାନ କରିଛନ୍ତି। ହାତୀପଲ ମଣଦା ଗ୍ରାମରୁ ବାହାରୀ ସୋଲଗୋଡ ଜଙ୍ଗଲରେ ଭୋର ସମୟରେ ପ୍ରବେଶ କରିଥିଲେ। ସୋଲଗୋଡା ଗ୍ରାମର ବନ୍ଦ ବେଟକାର(୫୨) ଜଙ୍ଗଲରୁ ଭୋର ସମୟରେ ଛତୁ ସଂଗ୍ରହ କରିବା ପାଇଁ ଯାଇଥିବା ସମୟରେ ହାତୀ ଦଳ ସହିତ ମୁହିଁମୁହିଁ ହୋଇଯାଇଥିଲେ। ନନ୍ଦ ବେଟକାରଙ୍କୁ ହାତୀ ପଲ ଶୁଣ୍ଢରେ କଚାଡି ଦେବା ଫଳରେ ତାଙ୍କୁ ଗଭୀର ଆଘାତ ଲାଗିଛି । ବନ ବିଭାଗ ଆହତ ବ୍ୟକ୍ତିଙ୍କୁ ଚମ୍ପୁଆ ଉପଖଣ୍ଡ ଚିକିତ୍ସାଳୟରେ ଭର୍ତ୍ତି କରାଯାଇଛି।
