ଢେଙ୍କାନାଳ ଅଫିସ,୧୨।୬: ଢେଙ୍କାନାଳ ଜିଲାରେ ହାତୀ-ମଣିଷ ସଂଘର୍ଷ ରୋକିବାରେ ବିଫଳ ହୋଇଛି ବନ ବିଭାଗ। ଏହାକୁ ନେଇ ଅସନ୍ତୋଷ ତୀବ୍ର ରୂପ ଧାରଣ କଲାଣି। ବାରମ୍ବାର ଦାବି ସତ୍ତ୍ୱେ ସମସ୍ୟାର ସମାଧାନ ହେଉ ନ ଥିବାରୁ ଧନଜୀବନ ହାନି ବଢ଼ିବାରେ ଲାଗିଛି। ଏହାର ପ୍ରତିବାଦରେ ଆନ୍ଦୋଳନାତ୍ମକ ପନ୍ଥା ଗ୍ରହଣ କରିବାକୁ ଉପଦ୍ରୁତ ଅଞ୍ଚଳବାସୀ ସଜବାଜ ହେଲେଣି।
ଢେଙ୍କାନାଳ ଜିଲାର ହିନ୍ଦୋଳ, କପିଳାସ, ସଦର ରେଞ୍ଜରେ ହାତୀ ଉପଦ୍ରବ ଚରମସୀମାରେ ପହଞ୍ଚତ୍ଛି। ଜଙ୍ଗଲ ଛାଡ଼ି ଜନବସତିରେ ଦଳବଦ୍ଧ ହୋଇ ବୁଲୁଛନ୍ତି ହାତୀ। ଗଁାମୁହଁା ହୋଇଥିବା ଗୋଠଛଡ଼ା ଦନ୍ତା ହିଂସ୍ର ଆଚରଣ ପ୍ରଦର୍ଶନ କରୁଛନ୍ତି। ସ୍ଥିତି ଏମିତି ହୋଇଛି ଯେ, ଦିନବେଳା ମଧ୍ୟ ରାସ୍ତାରେ ଯିବାକୁ ଲୋକେ ଭୟ କରିବା ଆରମ୍ଭ କଲେଣି। ଗତ ମାସକ ମଧ୍ୟରେ ହାତୀ ଆକ୍ରମଣରେ ୧୧ ଜଣଙ୍କ ଜୀବନ ଯିବା ସ୍ଥିତିର ଗମ୍ଭୀରତାକୁ ଦର୍ଶାଉଛି। ଜନବସତିମୁହଁା ଦନ୍ତାଙ୍କୁ ଜଙ୍ଗଲକୁ ଘଉଡ଼ାଇବାରେ ବନ ବିଭାଗ ବିଫଳ ହୋଇଥିବାବେଳେ ମାନବାଧିକାର କର୍ମୀ ରାଜକିଶୋର ବେହେରା ଏଥିରେ ରାଜ୍ୟ ସରକାରଙ୍କ ହସ୍ତକ୍ଷେପ ଲୋଡ଼ିଛନ୍ତି। ଏ ନେଇ ସେ ମୁଖ୍ୟମନ୍ତ୍ରୀ, ୫-ଟି ସଚିବ, ମୁଖ୍ୟ ବନ୍ୟପ୍ରାଣୀ ସଂରକ୍ଷକକୁ ଟୁଇଟ୍ କରି ଜଣାଇଛନ୍ତି। ଏଥିସହ ଢେଙ୍କାନାଳ ଜିଲାପାଳ, ଜିଲା ବନଖଣ୍ଡ ଅଧିକାରୀ ସ୍ଥିତିର ଗମ୍ଭୀରତା ହୃଦୟଙ୍ଗମ କରି ଆବଶ୍ୟକ ପଦକ୍ଷେପ ନେବାକୁ ନିବେଦନ କରିଛନ୍ତି।
କିଛିଦିନ ହେଲା କପିଳାସ ରେଞ୍ଜ ଅଧୀନ ନେଉଳପୋଇ, ଦେଓଗଁା, ଗୋପାଳପୁର, ମହୁଲଖୋଳି ଆଦି ଗ୍ରାମରେ ଦନ୍ତା ଉପଦ୍ରବ ଚରମ ସୀମାରେ ପହଞ୍ଚତ୍ଛି। ହାତୀପଲ ବ୍ୟାପକ ଫସଲ ନଷ୍ଟ କରୁଛନ୍ତି। ମୂଲ୍ୟବାନ ଧନଜୀବନ ହାନି ହେଉଛି। ସନ୍ଧ୍ୟା ହେଲେ ତାଟିକବାଟ ପଡ଼ିଯାଉଛି। ଲୋକମାନେ ଗୃହବନ୍ଦୀ ଜୀବନ ବିତାଇବାକୁ ବାଧ୍ୟ ହେଉଛନ୍ତି। ଏପରି କି ଜରୁରୀ ଚିକିତ୍ସା ଲାଗି ରୋଗୀ, ଗର୍ଭବତୀ, ପ୍ରସୂତି ଡାକ୍ତରଖାନା ଯିବାକୁ ଭୟ କରୁଛନ୍ତି। ବାରମ୍ବାର ଅଭିଯୋଗ ସତ୍ତ୍ୱେ ଜିଲା ପ୍ରଶାସନ, ବନ ବିଭାଗ ନୀରବଦ୍ରଷ୍ଟା ସାଜିଛି। ବନ ବିଭାଗର ଅସହାୟତା ଯୋଗୁ ଆଇନଶୃଙ୍ଖଳା ପରିସ୍ଥିତି ସୃଷ୍ଟି ହେଉଛି। ତେଣୁ ହିଂସ୍ର ଦନ୍ତାକୁ ଅନ୍ୟତ୍ର ଘଉଡ଼ାଇବା ପାଇଁ ଦାବି କରାଯାଇଛି। ଏହାର ସମାଧାନ ନ ହେଲେ ଆନ୍ଦୋଳନାତ୍ମକ ପନ୍ଥା ଗ୍ରହଣ କରାଯିବ ବୋଲି ମାନବାଧିକାର କର୍ମୀ ବେହେରା ଟୁଇଟ୍ କରି ଚେତାବନୀ ଦେଇଛନ୍ତି।
