କଣାସ,୨୦ା୨(ବିଭୂତି ଭୂଷଣ ତ୍ରିପାଠୀ): ପ୍ରତ୍ୟେକ ବର୍ଷ ଧାନ ଫସଲ ଖାଇବା ପାଇଁ ବରୁଣେଇ ଜଙ୍ଗଲରୁ ହାତୀମାନେ କଣାସ ବ୍ଲକର ବିଭିନ୍ନ ପଞ୍ଚାୟତକୁ ଆସି ବ୍ୟାପକ ଫସଲ କ୍ଷତିଗ୍ରସ୍ତ କରିବା ସହିତ କେତେକ ଜୀବନ ନେଇଛନ୍ତି। ବରୁଣେଇ ଜଙ୍ଗଲରୁ ଏକ ହାତୀ ନିଜ ମେଳଠାରୁ ଅଲଗା ହୋଇ କଣାସ ବ୍ଲକରେ ପ୍ରବାହିତ ହେଉଥିବା ରାଜୁଆ, ମକରାନଦୀ ପାର ହୋଇ କୋଟକଣା ମୌଜାର ଧାନ ବିଲରେ ପଶି ରହିଥିବା ଦେଖିବାକୁ ମିଳିଛି।
ହାତୀଟି ଗଡ଼ସାନପୁଟ, ଗଡ଼ବଡ଼ପୁଟ, କଣାସ ଗୋଲାବଜାର ଦେଇ ସିରେଇ, ଜଙ୍ଘାର, ରୁଢ଼ିପୁର ମୌଜା ଦେଇ କୋଟକଣା ମୌଜାରେ ରହିଛି। କଣାସ, ଡେଲାଙ୍ଗ ବନବିଭାଗ ରେଞ୍ଜର ଓ ବନକର୍ମଚାରୀ ହାତୀ ଚାରିପଟେ ଜଗି ରହିଛନ୍ତି। ଚାଷୀମାନେ ଖରାଟିଆ ଧାନ ଫସଲ ପାଇଁ ଜମିରେ ଆଛାର ପକାଇବା ସହିତ ଧାନ ରୁଆଇଛନ୍ତି। ଅନେକ ଜମିରେ ଧାନ ଥୋଡ଼ ହୋଇଥିବାରୁ ହାତୀ ଖୋଜରେ ଦଳିଦେବାରୁ ବ୍ୟାପକ ଫସଲ କ୍ଷତିଗ୍ରସ୍ତ ହୋଇଛି। ଫଳରେ ଚାଷୀ ମୁଣ୍ଡରେ ହାତଦେଇ ବସିଛନ୍ତି। ପ୍ରତିବର୍ଷ ହାତୀ କଣାସ ଅଞ୍ଚଳକୁ ଆସି ବ୍ୟାପକ ଫସଲ କ୍ଷତି କରିବା ସହିତ ଧନଜୀବନ ନଷ୍ଟ କରୁଥିବାରୁ ଏହାର ସ୍ଥାୟୀ ପ୍ରତିକାର ପାଇଁ ବନବିଭାଗ ଅଧିକାରୀ ଧ୍ୟାନଦେବାକୁ କଣାସ ଅଞ୍ଚଳବାସୀ ଦାବି କରିଛନ୍ତି।
