ଢେଙ୍କାନାଳ ଅଫିସ,୧୨।୩: ଢେଙ୍କାନାଳ ସଦର ରେଞ୍ଜ ଓସ୍ତପାଳ ଗ୍ରାମରେ ରବିବାର ସକାଳେ ପରିବା ଚାଷ ବିଲରୁ ଏକ ଦନ୍ତାହାତୀ ମୃତଦେହ ଜବତ ହୋଇଛି। ହାତୀଟିର ବୟସ ୨୦ ବର୍ଷ ହେବ । ହାତୀଟି ଗୋଠ ଛଡ଼ା ହାତୀ ବୋଲି ଜଣାପଡିଛି। ମୃତ୍ୟୁର କାରଣ ବର୍ତ୍ତମାନ ସୁଦ୍ଧା ଅସ୍ପଷ୍ଟ ରହିଛି । ପରିବା ଚାଷ ହୋଇଥିବା ବିଲରୁ ବିଷାକ୍ତ ସାର ଖାଇ ହାତୀଟିର ମୃତ୍ୟୁ ହୋଇଥିବା ସନ୍ଦେହ କରାଯାଉଛି । ଖବରପାଇ ସଦର ରେଞ୍ଜର ବିଭୁଦା ନଦ ମିଶ୍ର ବନ କର୍ମଚାରୀଙ୍କ ସହ ଘଟଣାସ୍ଥଳରେ ପହଞ୍ଚି ତଦନ୍ତ ଜାରି ରଖିଛନ୍ତି । ଭୁବନେଶ୍ୱରରୁ ଏକ ପ୍ରାଣୀଚିକିତ୍ସକ ଦଳ ମଧ୍ୟ ଆସି ସ୍ଥାନୀୟ ପ୍ରାଣୀ ଚିକିତ୍ସକଙ୍କ ସହାୟତାରେ ମୃତ ଦେହକୁ ବ୍ୟବଚ୍ଛେଦ କରିବେ ବୋଲି ରେଞ୍ଜର ସୂଚନା ଦେଇଛନ୍ତି । ବ୍ୟବଚ୍ଛେଦ ରିପୋଟ ମିଳିବା ପରେ ମୂତ୍ୟର କାରଣ ଜଣାପଡ଼ିବ ବୋଲି ସେ କହିଛନ୍ତି। ଏହି ଗୋଠ ଛଡା ହାତୀଟି ଅନେକଦିନ ହେବ ଉକ୍ତ ଅଞ୍ଚଳରେ ଉପଦ୍ରବ କରୁଥିବା ବେଳ ବହୁ ଫସଲ ନଷ୍ଟ କରିଛି । ବହୁ ଘର ଭାଙ୍ଗିଛି ଏବଂ ଏହି ଦନ୍ତା ଆକ୍ରମଣରେ ଉକ୍ତ ଅଞ୍ଚଳର ପ୍ରାୟ ୮ ଜଣଙ୍କ ଜୀବନ ଯାଇଛି ବୋଲି ଗ୍ରାମବାସୀ କୁହନ୍ତି ।
