କେନ୍ଦୁଝର,୧୦ା୪(ନରେଶ ଚନ୍ଦ୍ର ପଟ୍ଟନାୟକ): ବାଂଶପାଳ ବ୍ଲକ ବରଗୋଡ଼ା ଗ୍ରାମର ବଳ ଦେହୁରୀ ଦନ୍ତା ହାତୀ ଆକ୍ରମଣରେ ଗୁରୁତର ହୋଇଛନ୍ତି। ବୁଧବାର ଅପରାହ୍ନରେ ବରଗୋଡ଼ା ଗାଁ ନିକଟ ଚମ୍ପାଝର ନିକଟରେ ଖରାଟିଆ ଧାନଚାଷ ଜଗି ଥିବା ବେଳେ ଏକ ଗୋଟିକିଆ ଦନ୍ତାହାତୀ ହଠାତ୍ ବରଗୋଡ଼ା ଗ୍ରାମର ବଳ ଦେହୁରୀ(୬୦)ଙ୍କୁ ଆକ୍ରମଣ କରି ଶୁଣ୍ଢରେ କଚାଡ଼ି ଫିଙ୍ଗି ଦେଇଥିଲା। ଉକ୍ତ ସମୟରେ ବରଗୋଡ଼ା-ପାଲଲହଡ଼ା ରାସ୍ତାରେ ଏକ ଟ୍ରାକ୍ଟର ଆସି ଯିବାରୁ ଦନ୍ତା ହାତୀଟି ଉକ୍ତ ସ୍ଥାନ ଛାଡ଼ି ପଳାଇ ଯିବାରୁ ମରଣ ମୁହଁରୁ ବଞ୍ଚି ଯାଇଥିଲେ। ଘଟଣା ଘଟିଥିବା ସ୍ଥାନଠାରୁ ଅଳ୍ପ ଦୂରରେ ଥିବା ତଳ ବିରିକଳା ଖେସରା ଜଙ୍ଗଲରେ ୧୪ ଟିକିଆ ହାତୀପଲ ଅଛନ୍ତି। ବନ ବିଭାଗ କର୍ମଚାରୀ ଖବର ପାଇ ଘଟଣାସ୍ଥଳକୁ ଯାଇ ୧୦୮ ଆମ୍ବୁଲାନ୍ସରେ ପ୍ରଥମେ ବାଂଶପାଳ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଏବଂ ପରେ ଗୁରୁତର ହେବାରୁ କେନ୍ଦୁଝର ମୁଖ୍ୟ ଚିକିତ୍ସାଳୟ ପଠାଇଥିଲେ। ଉକ୍ତ ସମୟରେ ତୁମ୍ବାଡିହି ନାଳକୁ ପାଣି ପାଇଁ ଯାଉଥିବା ୧୦ଜଣ ମହିଳାଙ୍କୁ ହାତୀ ଘଉଡ଼ାଇବାରୁ ସେମାନେ ଘରକୁ ଧାଇଁ ପଳାଇ ଆସି ଜୀବନ ରକ୍ଷା କରିଥିଲେ। ଖବର ପାଇ ଭୂୟାଁ ଜୁଆଙ୍ଗ ପୀଢ଼ ରେଞ୍ଜର ନୟନକାନ୍ତ ସାହୁ,ଶୁଆକାଟି ସେକ୍ସନ ଫରେଷ୍ଟର ଜ୍ୟୋତିର୍ମୟୀ ପଟ୍ଟନାୟକ ଏବଂ ତରମାକାନ୍ତ ବିଟ୍ ଫରେଷ୍ଟ ଗାର୍ଡ ସରୋଜ ନାୟକ କେନ୍ଦୁଝର ମୁଖ୍ୟ ଚିକିତ୍ସାଳୟରେ ପହଞ୍ଚି ଆହତଙ୍କ ସ୍ବାସ୍ଥ୍ୟାବସ୍ଥା ପଚାରି ବୁଝିଛନ୍ତି। ଆହତଙ୍କୁ ସରକାରୀ ନିୟମ ମୁତାବକ କ୍ଷତିପୂରଣ ରାଶି ପ୍ରଦାନ କରାଯିବ ବୋଲି ରେଞ୍ଜର ପ୍ରକାଶ କରିଛନ୍ତି।
