କଟକ,୪ା୩ (କାର୍ତ୍ତିକ ସାହୁ): ଆଗକୁ ସାଧାରଣ ନିର୍ବାଚନ। ନିର୍ବାଚନକୁ ଶାନ୍ତି, ଶୃଙ୍ଖଳା ସହ ଅବାଧ, ନିରପେକ୍ଷ ପରିଚାଳନା ପାଇଁ କେନ୍ଦ୍ରୀୟ ସୁରକ୍ଷା ବଳ(ସିଆରପିଏଫ୍) ଯବାନମାନେ କଟକରେ ପହଞ୍ଚିଛନ୍ତି। କଟକ କମିସନରେଟ ପୋଲିସ ସହିତ ମିଳିତ ଭାବେ ସିଆର୍ପିଏଫ ଯବାନ ସୋମବାର ସହର ମଧ୍ୟରେ ଫ୍ଲାଗମାର୍ଚ୍ଚ କରିଛନ୍ତି। କଟକ ଡିସିପିଙ୍କ କାର୍ଯ୍ୟାଳୟରେ କମିଶନରେଟ ପୋଲିସ ସହିତ କେନ୍ଦ୍ରୀୟ ଫୋର୍ସର ଏକ ବୈଠକ ଅନୁଷ୍ଠିତ ହୋଇଯାଇଛି। ସହରର ସମ୍ବେଦନଶୀଳ ଅଞ୍ଚଳ ଓ ସୁରକ୍ଷା ବ୍ୟବସ୍ଥା ସମ୍ପର୍କରେ ବୈଠକରେ ଆଲୋଚନା କରାଯାଇଛି।
ସୂଚନା ମୁତାବକ, କମିଶନରେଟ ପୋଲିସ ଓ ସିଆରପିଏଫ ଯବାନମାନେ ସୋମବାର ଅପରାହ୍ନ ୫ଟାରେ ଚଣ୍ଡିମନ୍ଦିର ନିକଟରୁ ଫ୍ଲାଗମାର୍ଚ୍ଚ ଆରମ୍ଭ କରିଥିଲେ। ସଶସ୍ତ୍ର ଫୋର୍ସ ମିଶନ ରୋଡ୍, ସୂତାହାଟ, ଓଡ଼ିଆ ବଜାର, ଗଙ୍ଗାମନ୍ଦିର ଲେନ୍ ରାସ୍ତାରେ ଦରଘାବଜାର ଥାନା ନିକଟରେ ରାତି ପ୍ରାୟ ୭ଟାରେ ପହଞ୍ଚିଥିଲା। ଏଥିରେ ସିଆର୍ପିଏଫର ଗୋଟିଏ କମ୍ପାନୀ(୧୩୫ ଜଣ ଫୋର୍ସ) ସାମିଲ ହୋଇଥିଲେ।
ଅତିରିକ୍ତ ଡିସିପି ତରୁଣ କୁମାର ଦାସ ଏହାର ନେତୃତ୍ୱ ନେଇଥିଲେ। କ୍ୟାଣ୍ଟନମେଣ୍ଟ ଥାନା ଆଇଆଇସି ପ୍ରମୋଦ କୁମାର ପଟ୍ଟନାୟକ, ଲାଲବାଗ ଥାନା ଆଇଆଇସି ଦୟାନିଧି ନାୟକ, ଦରଘାବଜାର ଥାନା ଆଇଆଇସି ଚିନ୍ତେଶ୍ବର ମୁଣ୍ଡ, ଆରଆଇ(ରିଜର୍ଭ ଇନସ୍ପେକ୍ଟର) ଦିଲ୍ଲୀପ କୁମାର ବେହେରା ଏଥିରେ ସାମିଲ ଥିଲେ। ସିଆରପିଏଫ୍ ଯବାନଙ୍କ ସହ ଡିସିପି ଅଫିସରେ ହୋଇଥିବା ବୈଠକରେ କଟକ ସହରରେ ସମ୍ବେଦନଶୀଳ ବୁଥ, ରାସ୍ତା ଓ ଗଳି କନ୍ଦି ସମ୍ପର୍କରେ ଆଲୋଚନା ହୋଇଥିଲା। ସିଆର୍ପିଏଫ୍ ଯବାନମାନଙ୍କୁ ରେଭେନ୍ସା ଦ୍ବିତୀୟ କ୍ୟାମ୍ପସରେ ଅସ୍ଥାୟୀ ଭାବେ ଥଇଥାନ କରାଯାଇଛି।
