ନୂଆଦିଲ୍ଲୀ,୨୧।୧ : ୩ ରାଜ୍ୟରେ ହେବାକୁ ଥିବା ବିଧାନସଭା ନିର୍ବାଚନ ଏବଂ ବିଭିନ୍ନ ଉପ-ନିର୍ବାଚନ ପୂର୍ବରୁ ର୍ନିବାଚନ ଆୟୋଗ ରାଜନୈତିକ ଦଳମାନଙ୍କୁ ଆଇନର ଧାରା ଏବଂ ଆଦର୍ଶ ଆଚରଣ ବିଧି ବିଷୟରେ ମନେ ପକାଇ ଦେଇଛନ୍ତି। ପ୍ରଚାରରେ ପୂଜାପାଠ ସ୍ଥଳର ବ୍ୟବହାରକୁ ଆୟୋଗ ବାରଣ କରିଛନ୍ତି।
ଜାନୁୟାରୀ ୧୯ରେ ସମସ୍ତ ରାଜ୍ୟ ତଥା କେନ୍ଦ୍ରଶାସିତ ଅଞ୍ଚଳର ମୁଖ୍ୟ ନିର୍ବାଚନ ଅଧିକାରୀଙ୍କୁ ଆୟୋଗ ଏକ ଚିଠି ଲେଖିଥିଲେ। ଏଥିରେ ନିର୍ବାଚନ ଆୟୋଗ ୨୦୧୨ର ଏହି ନିର୍ଦ୍ଦେଶନାମାକୁ ମନେ ପକାଇ ଦେଇଛନ୍ତି ଯେଉଁଥିରେ ଦର୍ଶାଯାଇଛି ଯେ ଆଦର୍ଶ ଆଚରଣ ବିଧିର ବିଦ୍ୟମାନ ବ୍ୟବସ୍ଥା କୌଣସି ପ୍ରକାରେ ନିର୍ବାଚନ ପ୍ରଚାର ପାଇଁ ଏକ ପ୍ଲାଟଫର୍ମ ଭାବରେ ଉପାସନା ସ୍ଥଳ ବ୍ୟବହାରକୁ ବାରଣ କରିଥାଏ।
ଅଧିକନ୍ତୁ, ଧାର୍ମିକ ଅନୁଷ୍ଠାନ (ଅପବ୍ୟବହାର ରୋକିବା) ଅଧିନିୟମ, ୧୯୮୮ ର ଧାରା ୩, ୫ ଏବଂ ୬ କୌଣସି ରାଜନୈତିକ ଦଳର ଲାଭ ପାଇଁ ଅବା ରାଜନୈତିକ ଚିନ୍ତାଧାରା କିମ୍ବା ରାଜନୈତିକ କାର୍ଯ୍ୟକଳାପ କିମ୍ବା ଧାର୍ମିକ ଅନୁଷ୍ଠାନରେ ପ୍ରଚାର କିମ୍ବା ପ୍ରସାରକୁ ବାରଣ କରିଥାଏ କିମ୍ବା ପାଣ୍ଠିର ବ୍ୟବହାରକୁ ବାରଣ କରିଥାଏ। ଏଥିରେ ଦର୍ଶାଯାଇଛି ଯେ ଏହି ନିୟମକୁ ଉଲ୍ଲଂଘନ କଲେ ପାଞ୍ଚ ବର୍ଷ ପର୍ଯ୍ୟନ୍ତ ଜେଲ ଦଣ୍ଡ ସହ ଜରିମାନା କରାଯିବ। ଚିଠିର ଏକ ନକଲ ସମସ୍ତ ସ୍ବୀକୃତିପ୍ରାପ୍ତ ଜାତୀୟ ତଥା ରାଜ୍ୟ ସ୍ତରୀୟ ଦଳର ନେତାଙ୍କ ନିକଟକୁ ପଠାଯାଇଛି।
