ସିଂହପୁର,୧୧।୧(ଡି.ଏନ.ଏ.): ବିଞ୍ଝାରପୁର ଥାନାଞ୍ଚଳର ଜଣେ ଯୁବକ ବିଶ୍ୱଜିତ୍ ନାୟକଙ୍କ ସନ୍ଦେହଜନକ ମୃତ୍ୟୁ ଘଟଣାକୁ ପ୍ରାୟ ୩ ମାସ ବିତିବାକୁ ବସିଲାଣି। ହେଲେ ପୋଲିସ ଘଟଣା ଉପରୁ ପରଦା ଉଠାଇପାରୁନାହିଁ। ଏଭଳିସ୍ଥଳେ ବିଶ୍ୱଜିତ୍ଙ୍କ ମା’ ସାବିତ୍ରୀ ନାୟକ ପୋଲିସ ବିରୋଧରେ ସଙ୍ଗିନ ଅଭିଯୋଗ ଆଣିଛନ୍ତି। ପୋଲିସ ପ୍ରମାଣ ନଷ୍ଟ କରି ହତ୍ୟାକାରୀମାନଙ୍କୁ ଖସାଇବାକୁ ଉଦ୍ୟମ ଚାଲିଥିବା ରବିବାର ବିଶ୍ୱଜିତ୍ଙ୍କ ମା’, ଭାଇ, ଦାଦା ବିଞ୍ଝାରପୁର ଥାନା ସମ୍ମୁଖରେ ଗଣମାଧ୍ୟମ ପ୍ରତିନିଧିମାନଙ୍କୁ ସୂଚନା ଦେଇଛନ୍ତି।
ସାବିତ୍ରୀଙ୍କ କହିବା ଅନୁଯାୟୀ, ପୁଅର ହତ୍ୟା ଘଟଣାରେ ନ୍ୟାୟ ପାଇବା ଆଶାରେ ମାସ ମାସ ଧରି ଥାନାଠାରୁ ଆରମ୍ଭ କରି ଏସ୍ଡିପିଓ, ଏସ୍ପିଙ୍କ କାର୍ଯ୍ୟାଳୟକୁ ସେ ଧାଉଁଛନ୍ତି। ଗତ ୭ ତାରିଖରେ ଅତିରିକ୍ତ ଏସ୍ପି ନାରାୟଣ ବାରିକ ବିଞ୍ଝାରପୁର ଥାନାରେ ପହଞ୍ଚତ୍ ଘଟଣା ସମ୍ପର୍କରେ ଅଧିକ ପଚରାଉଚରା ପାଇଁ ତାଙ୍କ ପରିବାର ଲୋକଙ୍କୁ ଡକାଇଥିଲେ। ସେଠାରେ ପଚରାଉଚରା ସମୟରେ ପରିବାର ଲୋକେ କହିଥିଲେ ଯେ, ପୋଲିସ ଜବତ କରିଥିବା ବିଶ୍ୱଜିତ୍ଙ୍କ ମୋବାଇଲ ଫୋନରୁ ଅଧିକ ତଥ୍ୟ ମିଳିବ। ତୁରନ୍ତ ଅତିରିକ୍ତ ଏସ୍ପି ବାରିକ ସେହି ମୋବାଇଲ ଫୋନକୁ ମଗାଇଥିଲେ। ଉକ୍ତ ମୋବାଇଲର ପାସ୍ୱାର୍ଡକୁ ପରିବାର ଲୋକେ ବହୁପୂର୍ବରୁ ତଦନ୍ତ କରୁଥିବା ଏସ୍ଆଇ ଭାଗ୍ୟଶ୍ରୀ ବେହେରାଙ୍କୁ ଦେଇଥିଲେ। ମାତ୍ର ପାସ୍ଓ୍ବାର୍ଡରେ ମୋବାଇଲ ଫୋନକୁ ଖୋଲିବାକୁ ଏସ୍ଆଇ ଭାଗ୍ୟଶ୍ରୀଙ୍କୁ ଅତିରିକ୍ତ ଏସ୍ପି କହିଥିଲେ ମଧ୍ୟ ସେ ଖୋଲିପାରି ନ ଥିଲେ। ଏହି ହତ୍ୟା ପଛରେ ପ୍ରେମଜନିତ କାରଣ ଧୀରେ ଧୀରେ ଚର୍ଚ୍ଚା ପରିସରକୁ ଆସୁଥିବାବେଳେ ମୋବାଇଲ୍ରେ ପ୍ରେମିକାଙ୍କ ଚାଟିଂ ଥିବା କୁହାଯାଉଛି। ତାହାକୁ ହଟାଇବା ପାଇଁ ପୋଲିସ ଉଦ୍ୟମ କରି ପାସ୍ୱାର୍ଡ ବଦଳାଇଥିବା ସାବିତ୍ରୀ ଅଭିଯୋଗ କରିଛନ୍ତି।
ଏନେଇ ଏସ୍ଆଇ ଭାଗ୍ୟଶ୍ରୀଙ୍କୁ ପଚାରିବାରୁ ସେ କୁହନ୍ତି, ବ୍ୟକ୍ତିଗତ କାରଣରୁ କିଛିଦିନ ଛୁଟିରେ ଥିଲେ। ନିକଟରେ କାର୍ଯ୍ୟରେ ଯୋଗଦେବା ପରେ ଗତ ୭ ତାରିଖରେ ସେମାନଙ୍କୁ ପଚରାଉଚରା ସମୟରେ ଯେଉଁ ମୋବାଇଲ ଫୋନ ମଗାଯାଇଥିଲା, ତାହା ବଦଳରେ ଭୁଲ୍ବଶତଃ ଆଉ ଏକ ମୋବାଇଲ ଫୋନ ଦିଆଯାଇଥିଲା। ଫଳରେ ବିଶ୍ୱଜିତ୍ଙ୍କ ମୋବାଲଇ ଫୋନର ପାସ୍ୱାର୍ଡରେ ତାହା ଖୋଲି ନ ଥିଲା। ବିଶ୍ୱଜିତ୍ରଙ୍କ ମୋବାଇଲ ସୁରକ୍ଷିତ ରହିଥିବା ସେ କହିଛନ୍ତି। ସୂଚନାଥାଉ କି, ବିଶ୍ୱଜିତ୍ଙ୍କ ନିର୍ବନ୍ଧ ପୂର୍ବ ରାତି ଅର୍ଥାତ୍ ଗତ ଅକ୍ଟୋବର ୧୭ରେ ନିଜ ସମ୍ପର୍କୀୟ ଦାଦା ବିଞ୍ଝାରପୁର ଥାନା ଅନ୍ତର୍ଗତ ସୁନ୍ଦରପୁର ଗ୍ରାମର ବିଜୟ ନାୟକଙ୍କ ଘର ଛାତ ଉପରୁ ମୃତଦେହ ଜବତ ହୋଇଥିଲା।
