ନୂଆଦିଲ୍ଲୀ,୧୯।୨: ଦିଲ୍ଲୀ ଅବକାରୀ ଦୁର୍ନୀତି ସହ ଜଡ଼ିତ ମନିଲଣ୍ଡରିଂ ମାମଲାରେ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲ ସୋମବାର ଷଷ୍ଠ ଥର ପାଇଁ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) କାର୍ଯ୍ୟାଳୟରେ ଜେରା ପାଇଁ ହାଜର ହୋଇ ନାହାନ୍ତି। ଇଡିର ସମନ ବେଆଇନ ବୋଲି ଆମ୍ ଆଦ୍ମୀ ପାର୍ଟି (ଏଏପି) କହିଛି। ପ୍ରବର୍ତ୍ତନ ନିର୍ଦ୍ଦେଶାଳୟ ବାରମ୍ବାର ସମନ ଜାରି କରିବା ପରିବର୍ତ୍ତେ ଅଦାଲତଙ୍କ ନିଷ୍ପତ୍ତିକୁ ଅପେକ୍ଷା କରିବା ଆବଶ୍ୟକ ବୋଲି ଦଳ କହିଛି।
ଅନ୍ୟପକ୍ଷରେ କ୍ରମାଗତ ୬ ଥର କେଜ୍ରିଓ୍ବାଲ ସମନକୁ ଏଡ଼ାଇଯାଇଥିବାରୁ ଏହା ବିରୋଧରେ ଇଡି ମାମଲା ରୁଜୁ କରିଛି। ଏଏପି ଆବାହକ ଜାଣିଶୁଣି ସମନକୁ ଏଡ଼ାଇ ଯାଉଥିବା ତଦନ୍ତକାରୀ ସଂସ୍ଥା ଅଭିଯୋଗ କରିଛି। ଅଦାଲତ ଏହା ଉପରେ ନିଷ୍ପତ୍ତି ନେବ ବୋଲି ଇଡି କହିଛି।
