ଭୁବନେଶ୍ୱର,୨।୧୨(ବ୍ୟୁରୋ): ଓଡ଼ିଶା ପର୍ଯ୍ୟଟନ କ୍ଷେତ୍ରରେ ଇକୋ ରିଟ୍ରିଟ୍ ଏକ ବେଞ୍ଚ୍ମାର୍କ ସ୍ଥାପନ କରିବ। ପର୍ଯ୍ୟଟକଙ୍କୁ ପ୍ରାକୃତିକ ସୌନ୍ଦର୍ଯ୍ୟର ଭରପୂର ତଥା ଚମତ୍କାର ଅନୁଭୂତି ପ୍ରଦାନ କରିବ। ପର୍ଯ୍ୟଟନ ଓ ଆତିଥେୟତା କ୍ଷେତ୍ରର ସର୍ବୋତ୍ତମତାକୁ ଆବିଷ୍କାର କରିବା ପାଇଁ ପର୍ଯ୍ୟଟକଙ୍କ ଲାଗି ଏହା ଏକ ଗେଟ୍ୱେ ଭାବେ କାର୍ଯ୍ୟ କରିବ। ଓଡିଶା ଏବେ ଭାରତର ଏକ ଅଗ୍ରଣୀ ଦାୟିତ୍ୱସମ୍ପନ୍ନ ପର୍ଯ୍ୟଟନ ଗନ୍ତବ୍ୟସ୍ଥଳୀ ଭାବେ ସ୍ପଟ୍ଲାଇଟ୍ରେ ରହିଛି ବୋଲି ଗୁରୁବାର ଓଡ଼ିଶା ପର୍ଯ୍ୟଟନର ଶ୍ରେଷ୍ଠ ୩ଟି ଫ୍ଲାଗ୍ଶିପ୍ ଇଭେଣ୍ଟକୁ ଭର୍ଚ୍ଚୁଆଲରେ ଉଦ୍ଘାଟନ କରି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହା କହିଛନ୍ତି। ପ୍ରଥମେ କୋରାପୁଟ ଜିଲାର ପୁତସିଲ୍, ଗଞ୍ଜାମ ଜିଲାର ସୋନାପୁର, କଟକ ଜିଲାର ସାତକୋଶିଆ, କେନ୍ଦ୍ରାପଡ଼ା ଜିଲାର ଭିତରକନିକା, ସମ୍ବଲପୁର ଜିଲାର ହୀରାକୁଦ ଓ କନ୍ଧମାଳ ଜିଲାର ଦାରିଙ୍ଗବାଡ଼ି ଇକୋ ରିଟ୍ରିଟ୍କୁ ମୁଖ୍ୟମନ୍ତ୍ରୀ ଉଦ୍ଘାଟନ କରିଥିଲେ। ପରେ ଅନ୍ତର୍ଜାତୀୟ ବାଲୁକା କଳା ମହୋତ୍ସବର ଦ୍ୱାଦଶ ସଂସ୍କରଣ ଓ ସନ୍ଧ୍ୟାରେ କୋଣାର୍କ ମହୋତ୍ସବର ୩୩ତମ ସଂସ୍କରଣକୁ ଉଦ୍ଘାଟନ କରି ମୁଖ୍ୟମନ୍ତ୍ରୀ ପଟ୍ଟନାୟକ ଓଡ଼ିଶାର ଶ୍ରେଷ୍ଠ ପର୍ଯ୍ୟଟନ ପ୍ରୟାସର ସଫଳତା କାମନା କରିଥିଲେ।
ସେ କହିଲେ, ପର୍ଯ୍ୟଟନ କ୍ଷେତ୍ରରେ ଏହି ସ୍ବତନ୍ତ୍ର ପ୍ରୟାସର ଆକାର ଓ ବ୍ୟାପକତାକୁ ପ୍ରତି ବର୍ଷ ବୃଦ୍ଧି କରାଯାଉଛି। ଇକୋ ରିଟ୍ରିଟ୍ ମାଧ୍ୟମରେ ଓଡ଼ିଶାର ସ୍ଥାୟୀ ଇକୋ ଟୁରିଜମ୍କୁ ପ୍ରୋତ୍ସାହିତ କରାଯିବା ଉଲ୍ଲେଖନୀୟ ପଦକ୍ଷେପ। କ୍ରମାଗତ ଭାବରେ ସଫଳତାର ସହିତ ତିନୋଟି ସଂସ୍କରଣର ଆୟୋଜନ କରିବା ପରେ ଓଡିଶା ସରକାରଙ୍କ ଫ୍ଲାଗସିପ୍ ଇକୋ ରିଟ୍ରିଟ ଏହାର ପରିବେଶ ନିରନ୍ତର ମଡେଲ ପାଇଁ ପର୍ଯ୍ୟଟନ ତଥା ପର୍ଯ୍ୟଟନ ଭ୍ରାତୃଭାବ ଦ୍ୱାରା ବହୁ ପ୍ରଶଂସା କରାଯାଇଛି। ଚଳିତ ବର୍ଷ ଇକୋ ରିଟ୍ରିଟ ପର୍ଯ୍ୟଟକଙ୍କ ପାଇଁ ଓଡିଶାର ପର୍ଯ୍ୟଟନ ତଥା ଆତିଥ୍ୟର ସର୍ବୋତ୍ତମ ସ୍ଥାନ ଅନୁସନ୍ଧାନ କରିବ ବୋଲି ମୁଖ୍ୟମନ୍ତ୍ରୀ କହିଛନ୍ତି। ସୂଚନାଯୋଗ୍ୟ, ଚଳିତ ପର୍ଯ୍ୟଟନ ଋତୁରେ ରାଜ୍ୟର ୭ଟି ସ୍ଥାନରେ ଇକୋ ରିଟ୍ରିଟ୍କୁ ପରିଚାଳନା କରାଯାଉଥିବାବେଳେ କୋଣାର୍କ ଇକୋ ରିଟ୍ରିଟ୍ ଆସନ୍ତା ୮ ତାରିଖରେ ଆରମ୍ଭ ହେବାକୁ ଯାଉଛି। ଏହା ୩ ମାସ ପାଇଁ ପର୍ଯ୍ୟଟକଙ୍କ ଲାଗି ଖୋଲା ରହିବ। ଏଠାରେ ସାଂସ୍କୃତିକ କାର୍ଯ୍ୟକ୍ରମ ସହ ଅତିଥି ପର୍ଯ୍ୟଟକଙ୍କୁ ପ୍ରକୃତିର ନିକଟସ୍ଥ ଗନ୍ତବ୍ୟସ୍ଥଳୀ, ସଂସ୍କୃତି, ଐତିହାସିକ ଓ ସ୍ଥାପତ୍ୟଗୁଡିକୁ ଭ୍ରମଣ ପାଇଁ ମାର୍ଗଦର୍ଶନ ଦିଆଯିବ। ଏଥିସହିତ ଆଡ୍ରେନାଲାଇନ୍-ଇଣ୍ଡ୍ୟୁସିଙ୍ଗ୍ ୱାଟର ସ୍ପୋର୍ଟସ୍, ଏଟିଭି ରାଇଡ୍, ବିଚ୍ ଭଲିବଲ, ଆର୍ଚେରୀ ଆଦିର ସୁବିଧା ପ୍ରଦାନ କରାଯିବ।
