ଭୁବନେଶ୍ୱର,୩।୧ : ଭାରତୀୟ ରେଲଓ୍ବେର ପ୍ରମୁଖ ଜୋନ ପୂର୍ବତଟ ରେଳପଥ ୨୦୨୨ ବର୍ଷରେ ଉଭୟ ପଣ୍ୟ ବୋଝେଇ ଏବଂ ଭିତ୍ତିଭୂମି ବିକାଶ କ୍ଷେତ୍ରରେ ଅନେକ ସଫଳତା ହାସଲ କରିଛି। ଏପରିକି ପୂର୍ବତଟ ରେଳପଥର ବିଭିନ୍ନ ରେଳ କାର୍ଯ୍ୟକ୍ରମରେ ରେକର୍ଡ ପ୍ରଦର୍ଶନ ହାସଲ କରି ବର୍ଷ ଶେଷ କରିଥିବା ଜଣାପଡିଛି। ବିଶେଷକରି ରେଳମନ୍ତ୍ରୀ ଅଶ୍ୱିନୀ ବୈଷ୍ଣବ ନିୟମିତ ଭାବେ ରେଳପଥର ବିଭିନ୍ନ କାର୍ଯ୍ୟ ସମ୍ବନ୍ଧରେ ନଜର ରଖିଛନ୍ତି। ସେହିଭଳି ରେଳମନ୍ତ୍ରୀ ଅଶ୍ୱିନୀ ବୈଷ୍ଣବଙ୍କ କ୍ରମାଗତ ପ୍ରକଳ୍ପ ସମୀକ୍ଷା ଏବଂ ମହାପ୍ରବନ୍ଧକ ରୂପ ନାରାୟଣ ସୁନକରଙ୍କ ଉପଦେଶ ଯୋଗୁଁ ଏହା ସମ୍ଭବ ହୋଇଛି। ଅପରପକ୍ଷରେ ଚଳିତ ଆର୍ଥିକ ବର୍ଷ (୨୦୨୨-୨୩) ର ଡିସେମ୍ବର ମାସ ପର୍ଯ୍ୟନ୍ତ ପୂର୍ବତଟ ରେଳପଥ ୧୭୫.୩୨ ନିୟୁତ ଟନ୍ ମାଲ ପରିବହନ କରିଛି, ଯାହା ଗତ ଆର୍ଥିକ ବର୍ଷର ୧୬୯.୩୯ ନିୟୁତ ଟନ ତୁଳନାରେ ୫.୯୩ ନିୟୁତ ଟନ ଅଧିକ ଏବଂ ପ୍ରାୟ ୩.୫% ଅଭିବୃଦ୍ଧି ହୋଇଛି। ସେହିପରି ମାଲ ପରିବହନର ଆୟ ଦୃଷ୍ଟିରୁ ପୂର୍ବତଟ ରେଳପଥ ଏହି ସମୟ ମଧ୍ୟରେ ୧୪,୨୪୭.୮୮କୋଟି ଟଙ୍କା ଆୟ କରିଛି, ଯାହା ୧୩,୧୩୪.୯୮ କୋଟି ଟଙ୍କା ତୁଳନାରେ ଗତ ଆର୍ଥିକ ବର୍ଷ ତୁଳନାରେ ୮.୪୭% ବୃଦ୍ଧି ପଞ୍ଜିକରଣ କରି ୧,୧୧୨.୯ କୋଟି ଟଙ୍କା ବୃଦ୍ଧି କରିଛି। ସେହିଭଳି ଯାତ୍ରୀ ପରିବହନ କ୍ଷେତ୍ରରୁ ପୂର୍ବତଟ ରେଳପଥ ୨୦୨୨ ଡିସେମ୍ବର ଶେଷ ସୁଦ୍ଧା ୫୩.୧୧ ନିୟୁତ ଯାତ୍ରୀ ପରିବହନ କରିଛି, ଯାହା ଗତ ଆର୍ଥିକ ବର୍ଷର ୨୧.୩୭ ମିଲିୟନ ତୁଳନାରେ ୧୪୮.୫% ଅଭିବୃଦ୍ଧି ପଞ୍ଜିକରଣ କରିଛି, ଯାତ୍ରୀମାନଙ୍କଠାରୁ ଆୟ କ୍ଷେତ୍ରରେ ପୂର୍ବତଟ ରେଳପଥ ୮୨.୧୭% ବୃଦ୍ଧି ପଞ୍ଜିକରଣ କରି ଗତ ବର୍ଷର ଆୟ ୭୭୦.୪୫ କୋଟି ତୁଳନାରେ ଚଳିତ ବର୍ଷ ୧,୪୦୩.୫୮ କୋଟି ଆୟ କରିଛି।
