ଓ୍ବାଶିଂଟନ, ୨୭।୬: ପୃଥିବୀ ସୃଷ୍ଟି ନେଇ ରହିଥିବା ତଥ୍ୟ ବେଶ୍ ରୋଚକ। ଏକ ତଥ୍ୟ ଅନୁସାରେ ୬ କୋଟି ୬୦ ଲକ୍ଷ ବର୍ଷ ତଳେ ଏକ ବିରାଟ ଉଲ୍କାପିଣ୍ଡ ପୃଥିବୀକୁ ଧକ୍କା ଦେଇଥିଲା। ସେତେବେଳେ ପୃଥିବୀ ପୃଷ୍ଠରେ ଭୟଙ୍କର ଭୂକମ୍ପ ସହିତ ଆଗ୍ନେୟଗିରିରୁ ଅଗ୍ନି ଉଦ୍ଗୀରଣ ହୋଇଥିଲା। ଫଳରେ ୭୫ ପ୍ରତିଶତ ଜୀବଜନ୍ତୁ ଲୋପ ପାଇଥିଲେ। ଆଗ୍ନେୟଗିରିରୁ ଅଗ୍ନି ଉଦ୍ଗୀରଣ ଯୋଗୁ ସୃଷ୍ଟି ହୋଇଥିବା ବହଳ ଧୂଆଁ ବାୟୁମଣ୍ଡଳରେ ବ୍ୟାପି ଯାଇଥିଲା। ଏହାକୁ ଭେଦ କରି ସୂର୍ଯ୍ୟ ରଶ୍ମୀ ଭୂପୃଷ୍ଠକୁ ଆସିପାରି ନ ଥିଲା। ଫଳରେ ଅବଶିଷ୍ଟ ଜୀବଜଗତ ତଥା ଉଦ୍ଭିଦ ଜଗତ ଧ୍ୱଂସ ହୋଇଯାଇଥିଲା। ଏହାପରେ ସାଧାରଣ ସ୍ଥିତି ଫେରି ଆସିବା ପରେ ପୁଣି ପୃଥିବୀରେ ଜୀବନ ସୃଷ୍ଟି ଆରମ୍ଭ ହୋଇଥିଲା। ସେହିପରି ୩କୋଟି ୬୦ ଲକ୍ଷ ବର୍ଷ ତଳେ ଓଜନସ୍ତରର ସାନ୍ଦ୍ରତା କମି ଯିବା ଯୋଗୁ ପୃଥିବୀରେ ଅତ୍ୟଧିକ ଉତ୍ତାପ ସୃଷ୍ଟି ହୋଇଥିଲା। ଏଥିରେ ସମଗ୍ର ଜୀବଜଗତ ଜଳି ଯାଇଥିଲା। ଏନେଇ ହୋଇଥିବା ଏକ ଗବେଷଣାରୁ ଜଣାପଡ଼ିଛି। ଏହାର ରିପୋର୍ଟ ସାଇନ୍ସ୍ ଆଡଭାନ୍ସ ପତ୍ରିକାରେ ପ୍ରକାଶ ପାଇଛି। ଗବେଷକଙ୍କୁ ପଥରରେ ତଳେ ଚାପି ହୋଇରହିଥିବା କିଛି ଉଦ୍ଭିଦର ଜୀବାଶ୍ମ ମିଳିଥିଲା। ଏହାର ଅନୁଧ୍ୟାନ କରିବା ସମୟରେ ଜଣାପଡ଼ିଥିଲା ଯେ, ଉଦ୍ଭିଦଗୁଡ଼ିକ ସୂର୍ଯ୍ୟର ଅଲ୍ଟାଭାୟୋଲେଟ ରଶ୍ମୀ ପ୍ରଭାବରେ ଜଳି ଯାଇଥିଲା। ଉଦ୍ଭିଦଗୁଡ଼ିକର ଡିଏନ୍ଏ ପରୀକ୍ଷା ସମୟରେ ଏହି ତଥ୍ୟ ଜଣାପଡ଼ିଥିଲା। ଯାହାକି ପ୍ରାୟ କୋଟି ୬୦ ଲକ୍ଷ ବର୍ଷ ତଳେ ହୋଇଥିବା ଅନୁମାନ କରାଯାଇଥିଲା। ଓଜନସ୍ତରର ସାନ୍ଦ୍ରତା କମି ଯିବାରୁ ଏଭଳି ଘଟିଥିବା ଗବେଷକ କହିଛନ୍ତି। ଏବେ ମଧ୍ୟ ଧୀରେଧୀରେ ମଧ୍ୟ ସେଭଳି ସ୍ଥିତି ଜାରିରହିଛି। ମେରୁ ଅଞ୍ଚଳରେ ଓଜନସ୍ତରର ସାନ୍ଦ୍ରତା କମୁଥିବାରୁ ସମସ୍ୟା ଦେଖାଦେଇଛି। ଏଥିରେ ସୁଧାର ନ ଆସିଲେ ପୃଥିବୀ ପୁଣି ଥରେ ଧ୍ୱଂସ ହେବ ବୋଲି ବୈଜ୍ଞାନିକ ଚେତାବନୀ ଦେଇଛନ୍ତି।
