ମାଥିଲି,୨୬।୧୧(ଡି.ଏନ.ଏ.): ରାଜ୍ୟ ସରକାର ବହୁ ବିକାଶମୂଳକ ଯୋଜନା କାର୍ଯ୍ୟକାରୀ କରୁଛନ୍ତି। ମାତ୍ର ଏହକୁ କାର୍ଯ୍ୟକାରିତାରେ ଅବହେଳା ଯୋଗୁ ହିତାଧିକାରୀମାନେ ସେଥିରୁ ସୁଫଳ ପାଇବାରୁ ବଞ୍ଚତ୍ତ ହେଉଛନ୍ତି। ତୃଣମୂଳ ସ୍ତରରେ ଯୋଜନାଗୁଡ଼ିକ ପହଞ୍ଚୁ ନ ଥିବାରୁ ସେଥିରୁ ସୁଫଳ ମିଳୁ ନ ଥିବା ଅଭିଯୋଗ ହେଉଛି। ଏହାର ଉଦାହରଣ ହେଉଛନ୍ତି ମାଲକାନଗିରି ଜିଲା ମାଥିଲି ବ୍ଲକ ମେକ୍କା ପଞ୍ଚାୟତ ସଦର ଗ୍ରାମର ୭୫ ବର୍ଷୀୟା ବେସାହାରା ବିଧବା ବୃଦ୍ଧା ଡମେ ନାୟକ। ତାଙ୍କ ସ୍ବାମୀ ଦୀର୍ଘବର୍ଷ ହେବ ମୃତ୍ୟୁବରଣ କରିସାରିଛନ୍ତି। ତାଙ୍କର ଗୋଟିଏ ଝିଅ, ଗୋଟିଏ ପୁଅ । ପୁଅଟିର କୌଣସି ଖୋଜ ଖବର ନ ଥିବା ବେଳେ ଡମେ ଏବେ ପାଙ୍ଗାମ ପଞ୍ଚାୟତ ଅନ୍ତର୍ଗତ ସାନ ନାୟକଗୁଡ଼ା ଗ୍ରାମରେ ଝିଅ ସମାରୀଙ୍କ ଘରେ ଆଶ୍ରୟ ନେଇଛନ୍ତି। ଡମେଙ୍କ ଆଧାର ଓ ଭୋଟର କାର୍ଡ ନାହିଁ। ଏଥିଯୋଗୁ ସେ ସରକାରଙ୍କ ସବୁ ଯୋଜନାରୁ ସୁଫଳ ପାଉନାହାନ୍ତି। ଏଯାଏ ତାଙ୍କୁ ଭତ୍ତା ମିଳିନାହିଁ। ଏ ସମ୍ପର୍କରେ ସରପଞ୍ଚ ରଞ୍ଜିତା ପୂଜାରୀ ଜାଣିବା ପରେ ତାଙ୍କୁ ମାତ୍ର ୫ କେଜି ପିଡିଏସ୍ ଚାଉଳ ଦେଇଛନ୍ତି। ସମୟ ମିଳିଲେ ଡମେଙ୍କ ଆଧାର ଓ ଭୋଟର କାର୍ଡ କରିଦେବେ ବୋଲି ପ୍ରତିଶ୍ରୁତି ଦେଇଛନ୍ତି। ତେବେ ବ୍ଳକ ଓ ଜିଲା ପ୍ରଶାସନ ଡମେଙ୍କୁ ଆଧାରକାର୍ଡ ଓ ଭୋଟର ପରିଚୟପତ୍ର ଯୋଗାଇ ଦେବାକୁ ଗ୍ରାମବାସୀ ଦାବି କରିଛନ୍ତି। ପଞ୍ଚାୟତ କାର୍ଯ୍ୟନିର୍ବାହୀ ଅଧିକାରୀ ଭୋଳାନାଥ ବିଶ୍ୱାସଙ୍କୁ ଏନେଇ ପଚାରିବାରୁ ସେ କହିଥିଲେ, ଏ ବିଷୟରେ ଅବଗତ ନ ଥିଲେ। ଯଥା ସମ୍ଭବ ବୃଦ୍ଧାଙ୍କୁ ଆଧାର କେନ୍ଦ୍ରକୁ ପଠାଇ ଆଧାର କାର୍ଡ କରିବା ବ୍ୟବସ୍ଥା କରିବେ। ପରେ ତାଙ୍କୁ ସମସ୍ତ ପ୍ରକାର ସରକାରୀ ସହାୟତା ମିଳିିବ ।
