ଝାରସୁଗୁଡା, ୯ା୧(ଆଶିଷ ରଞ୍ଜନ ଦାଶ): ଝାରସୁଗୁଡା ଜିଲାର ପାରମ୍ପରିକ ଲୋକକଳା ଓ ସଂସ୍କୃତିର ମହାକୁମ୍ଭ ’ଦୁଲଦୁଲି-୨୦୨୬’ ଚଳିତ ବର୍ଷ ବାଣିଜି୍ୟକ କ୍ଷେତ୍ରରେ ଏକ ନୂତନ ଅଧ୍ୟାୟ ସୃଷ୍ଟି କରିଛି। ଝାରସୁଗୁଡ଼ା ଜିଲା ପ୍ରଶାସନ ଏବଂ ଓର୍ମାସର ମିଳିତ ଆନୁକୁଲ୍ୟରେ ଆୟୋଜିତ ଦୁଲଦୁଲି-୨୦୨୬ ପଲ୍ଲୀଶ୍ରୀ ମେଳା ଜାନୁଆରୀ ୧ ରୁ ୫ ତାରିଖ ପର୍ଯ୍ୟନ୍ତ ବିଟିଏମ ପଡ଼ିଆରେ ଅନୁଷ୍ଠିତ ଏହି ମହୋତ୍ସବରେ ପଲ୍ଲୀଶ୍ରୀ ଏବଂ ସ୍ୱଦେଶୀ ମେଳାର ସାମଗ୍ରିକ ବିକ୍ରି ଗତ ବର୍ଷ ତୁଳନାରେ ପ୍ରାୟ ଦ୍ୱିଗୁଣିତ ହୋଇଛି।
୨୦୨୫ରେ ମୋଟ କାରବାର ୧.୫୦ କୋଟି ଟଙ୍କା ଥିବା ବେଳେ, ଏବର୍ଷ ଏହା ୨କୋଟି ୭୮ଲକ୍ଷରୁ ଅଧିକ ଟଙ୍କାରେ ପହଞ୍ଚିଛି। ମେଳାର ପ୍ରଥମ ଦିନରୁ ହିଁ ବିକ୍ରିର ଧାରା ଊର୍ଦ୍ଧ୍ୱମୁଖୀ ରହିଥିଲା। ତଥ୍ୟ ଅନୁଯାୟୀ, ପ୍ରଥମ ଦିନରେ ପ୍ରାୟ ୨୭ ଲକ୍ଷ ୨୮ହଜାର ୯୬୦ ଟଙ୍କାର କାରବାର ହୋଇଥିବା ବେଳେ ଦ୍ୱିତୀୟ ଦିନରେ ଏହା ବୃଦ୍ଧି ପାଇ ୪୧ଲକ୍ଷ ୬୭ହଜାର ୬୭୫ ଟଙ୍କା ହୋଇଥିଲା। ତୃତୀୟ ଓ ଚତୁର୍ଥ ଦିନରେ ବ୍ୟବସାୟ ଯଥାକ୍ରମେ ୫୧ଲକ୍ଷ ୬୧ହଜାର ୨୦ ଟଙ୍କା ଏବଂ ୭୩ଲକ୍ଷ ୭୦ହଜାର ୯୮୦ ଟଙ୍କାର ବ୍ୟବସାୟ ହୋଇଥିଲା। ମେଳାର ଅନ୍ତିମ ଦିନ ଅର୍ଥାତ୍ ୫ ଜାନୁଆରୀରେ ସର୍ୱାଧିକ ୮୩ଲକ୍ଷ ୭୯ହଜାର ୬୬୦ ଟଙ୍କାର ସାମଗ୍ରୀ ବିକ୍ରି ହୋଇ ଏକ ନୂଆ ରେକର୍ଡ ସ୍ଥାପନ କରିଛି।
ମୋଟ ୨୩୦ଟି ଷ୍ଟଲ ମଧ୍ୟରୁ କେବଳ ପଲ୍ଲୀଶ୍ରୀ ମେଳାରୁ ୧.୭୨ କୋଟିରୁ ଅଧିକ ଏବଂ ସ୍ୱଦେଶୀ ମେଳାରୁ ପ୍ରାୟ ୩୩ ଲକ୍ଷ ଟଙ୍କାର ବ୍ୟବସାୟ ହୋଇଛି। ରାଜ୍ୟର ୩୦ଟି ଜିଲାରୁ ଆସିଥିବା ପ୍ରାୟ ୨୫୦ଟି ସ୍ୱୟଂ ସହାୟକ ଗୋଷ୍ଠୀ ଏବଂ ୫୩୦ରୁ ଅଧିକ ମହିଳା ସଦସ୍ୟାଙ୍କ ହାତ ତିଆରି ସାମଗ୍ରୀ ଯେପରିକି କନ୍ଧମାଳର ହଳଦୀ, ରାୟଗଡାର ଝାଡୁ, ସମ୍ୱଲପୁରୀ ହସ୍ତତନ୍ତ ଏବଂ ପୁରୀର ଚାନ୍ଦୁଆ ଭଳି ପାରମ୍ପରିକ ଉତ୍ପାଦ ଗ୍ରାହକଙ୍କୁ ଆକୃଷ୍ଟ କରିଥିଲା।
