ଧର୍ମଗଡ଼,୨୦।୬(ଘାସିରାମ ଜଗତ): କଳାହାଣ୍ଡି ଜିଲାରେ ଏକ ଅଭାବନୀୟ ଘଟଣା ସାମ୍ନାକୁ ଆସିଛି। ଧର୍ମଗଡ଼ ଉପଖଣ୍ଡ ଚିକିତ୍ସାଳୟରେ ରକ୍ତ ନ ମିଳିବାରୁ ଜଣେ ଶିଶୁଙ୍କ ମୃତ୍ୟୁ ଘଟିଥିବା ପରିବାର ଲୋକେ ଅଭିଯୋଗ କରିଛନ୍ତି। ଏନେଇ ପରିବାର ଲୋକଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି। ପରିବାର ଲୋକେ ଘଟଣାର ଉଚ୍ଚସ୍ତରୀୟ ତଦନ୍ତ ସହ କ୍ଷତିପୂରଣ ଦାବିରେ ଶନିବାର ସନ୍ଧ୍ୟାରେ ଧର୍ମଗଡ଼ ଉପଖଣ୍ଡ ଚିକିତ୍ସାଳୟ ସମ୍ମୁଖ ୧୩୦ ନମ୍ବର ଜାତୀୟ ରାଜପଥ ଅବରୋଧ କରିଛନ୍ତି। ଫଳରେ ବଳଦିଆମାଳ-ରାୟପୁର ଜାତୀୟ ରାଜପଥରେ ଯାନବାହାନ ଚଳାଚଳ ବନ୍ଦ ରହିଛି।
ମିଳିଥିବା ସୂଚନା ମୁତାବକ, କଳାହାଣ୍ଡି ଜିଲା କୋକସରା ବ୍ଲକ ଛତାଗହିରା ଗାଁର ଟିକଚନ ଦୁର୍ଗାଙ୍କ ୩ ବର୍ଷର ପୁଅ ପ୍ରିୟାଂଶୁ ଦୁର୍ଗାଙ୍କ ରକ୍ତ ହୀନତା ଯୋଗୁ ଶୁକ୍ରବାର ଧର୍ମଗଡ଼ ଉପଖଣ୍ଡ ଚିକିତ୍ସାଲୟରେ ଭର୍ତ୍ତି ହୋଇଥିଲେ। ତେବେ ହସ୍ପିୟ ଥିବା ରକ୍ତ ଭଣ୍ଡାରର ଭିତ୍ତିଭୂମି ଅଭାବ ଦର୍ଶାଇ ବୈଷୟିକ ଟିମ୍ ସପ୍ତାହେ ପୂର୍ବରୁ ବ୍ଲଡ ବ୍ୟାଙ୍କକୁ ବନ୍ଦ କରି ଦେଇଥିଲା।
ଫଳରେ ପ୍ରିୟାଂଶୁଙ୍କୁ ଠିକ୍ ସମୟରେ ରକ୍ତ ମିଳିପାରି ନ ଥିଲା। ଅନ୍ୟପକ୍ଷେ ଚିକିତ୍ସା କରୁଥିବା ସମ୍ପୃକ୍ତ ଡାକ୍ତର ଶିଶୁଙ୍କୁ ଭବାନୀପାଟଣା ଜିଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରିଥିଲେ। ହେଲେ ରକ୍ତ ପାଇଁ ୫୦ କିମି ଦୂର ଭବାନୀପାଟଣା ଗଲା ବେଳେ ଶିଶୁଙ୍କ ମୃତ୍ୟୁ ଘଟିଥିଲା।
ଶିଶୁର ମୃତ୍ୟୁ ପରେ ହସ୍ପିଟାଲରେ ପରିବାର ଲୋକେ ହୋହଲ୍ଲା କରିବା ସହ ଅଶାନ୍ତ ପରିବେଶ ସୃଷ୍ଟି ହୋଇଥିଲା। ଏପରିକି ପରିବାର ଲୋକେ ହସ୍ପିଟାଲ ଆଗରେ ମୃତଦେହ ରଖି ରାଜପଥ ଅବରୋଧ କରିଛନ୍ତି। ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ଲୋକଙ୍କୁ ବୁଝାଶୁଝା କରୁଛି। ହେଲେ ପରିବାର ଲୋକେ ନିଜ ଜିଦ୍ରେ ଅଟଳ ଥିବା ସୂଚନା ମିଳିଛି।
