ଭୁବନେଶ୍ୱର, ୧୬।୭ (ଅଭୟ ଦାଶ): ପ୍ରତି ବର୍ଷ ଭଳି ଚଳିତ ବର୍ଷ ମଧ୍ୟ ଡାଲମିଆ ଭାରତ ଲିମିଟେଡ (ଡିବିଏଲ୍)ର ବହୁ ପ୍ରତୀକ୍ଷିତ ‘ସାଲ୍ୟୁଟିଂ ଦି ଏକ୍ସପର୍ଟ’ କାର୍ଯ୍ୟକ୍ରମ ମାଧ୍ୟମରେ ଓଡ଼ିଶାର କୁଶଳୀ ରଥ ଶିଳ୍ପକାରମାନଙ୍କୁ ‘ଡିଏସପି ଏକ୍ସପର୍ଟ ରଥ ଶିଳ୍ପକାର’ ସମ୍ମାନ ପ୍ରଦାନ ସହ ପୁରୀରେ ବିଶ୍ୱପ୍ରସିଦ୍ଧ ରଥଯାତ୍ରା ମହୋତ୍ସବ ପାଳନ କରିଛି। ଏପରିକି ଡିଏସପି ଏକ୍ସପର୍ଟ ରଥ ଶିଳ୍ପାକର ସମ୍ମାନ ନାମରେ ନାମିତ ଏହି ସମ୍ମାନରେ ବିଶିଷ୍ଟ ଶିଳ୍ପକାରଙ୍କ ଅସାଧାରଣ କାରିଗରିତ୍ୱକୁ ସମ୍ମାନ ଜଣାଇ ସେମାନଙ୍କୁ ରଥ ନିର୍ମାଣ ଏବଂ କାରିଗରି କ୍ଷେତ୍ରରେ ପ୍ରକୃତ ବିଶେଷଜ୍ଞ ଭାବେ ସ୍ବୀକୃତି ଦିଆଯାଇଛି। ଉଲ୍ଲେଖଯୋଗ୍ୟ, ଡିଏସପି ଏକ୍ସପର୍ଟ ରଥ ଶିଳ୍ପକାର ସମ୍ମାନ ଲକ୍ଷ୍ମଣ ମହାପାତ୍ର ମହାରଣା, ଶ୍ୟାମ ସୁନ୍ଦର ମହାରଣା, ସୁରେନ୍ଦ୍ର ମହାରଣା ଏବଂ ରବି ଭୋଇଙ୍କୁ ପ୍ରଦାନ କରାଯାଇଥିଲାବେଳେ ସେମାନଙ୍କ ଦ୍ୱାରା ଅତ୍ୟନ୍ତ ଯତ୍ନର ସହିତ ପ୍ରସ୍ତୁତ କରାଯାଇଥିବା ଭବ୍ୟ ରଥ ସମ୍ମୁଖରେ ସମ୍ବର୍ଦ୍ଧିତ ହୋଇଛନ୍ତି। ଏପରିକି ସମ୍ବର୍ଦ୍ଧନା ସ୍ବରୂପ ସେମାନଙ୍କୁ ଗୋଟିଏ ଲେଖାଏଁ ଫଳକ, ଗୋଟିଏ ଶାଲ ଓ ନଗଦ ୧୦ ହଜାର ଟଙ୍କା ମଧ୍ୟ ପ୍ରଦାନ କରାଯାଇଛି। ଡାଲମିଆ ଭାରତ ପକ୍ଷରୁ ୨୦୨୨ରେ ଆରମ୍ଭ ହୋଇଥିବା ‘ସାଲ୍ୟୁଟିଂ ଦି ଏକ୍ସପର୍ଟ’ ଏହି କାର୍ଯ୍ୟକ୍ରମ ମହାରଣା ସମ୍ପ୍ରଦାୟକୁ ସମର୍ପିତ ହୋଇଛି। ଯେଉଁମାନଙ୍କର ଦକ୍ଷ ଡିଜାଇନ୍ ଓ ରଥ ନିର୍ମାଣ ଓଡ଼ିଶାର ଅନନ୍ୟ କଳା ପରମ୍ପରାକୁ ସୁରକ୍ଷିତ ରଖିଛି। ସେମାନଙ୍କର ଭକ୍ତି ଓ କାରିଗରି ବିଶ୍ୱପ୍ରସିଦ୍ଧ ଶ୍ରୀଜଗନ୍ନାଥ ରଥଯାତ୍ରାକୁ ବଜାୟ ରଖି ଏହାର ନିରନ୍ତର ମର୍ଯ୍ୟାଦାକୁ ସୁନିଶ୍ଚିତ କରୁଛି।
ଏ ସମ୍ପର୍କରେ କମ୍ପାନୀର ମୁଖପାତ୍ର କହିଛନ୍ତି,ଡାଲମିଆ ଭାରତ ଓଡ଼ିଶାର ମହାନ ରଥ ଶିଳ୍ପୀମାନଙ୍କୁ ସମ୍ମାନିତ କରି ଗର୍ବ ଅନୁଭବ କରୁଛି। ଯେଉଁମାନଙ୍କ ନିଷ୍ଠା ଓ ଦକ୍ଷତା ପ୍ରତିବର୍ଷ ରଥଯାତ୍ରାର ମହାନ ପରମ୍ପରାକୁ ଜୀବନ୍ତ କରିଥାଏ। ଏହି କାରିଗରମାନଙ୍କୁ ଉତ୍ସାହିତ କରି ଆମେ ଆମର ଅଂଶୀଦାର ଐତିହ୍ୟକୁ ବଜାୟ ରଖିବା ଏବଂ ଓଡ଼ିଶାବାସୀଙ୍କ ସହ ଆମର ଗଭୀର ସମ୍ପର୍କକୁ ସୁଦୃଢ଼ କରିବାରେ ସେମାନଙ୍କ ଗୁରୁତ୍ୱପୂର୍ଣ୍ଣ ଭୂମିକାକୁ ସ୍ବୀକାର କରୁଛୁ। ସେହିଭଳି ଏକ ସମାନ୍ତରାଳ ଉତ୍ସବରେ ଓଡ଼ିଶାର ପ୍ରମୁଖ ସହର ଭୁବନେଶ୍ୱର, କଟକ, ବାଲେଶ୍ୱର, ଯାଜପୁର ଓ ବ୍ରହ୍ମପୁରଠାରେ ଡାଲମିଆ ଭାରତ ପକ୍ଷରୁ ଏକ ବିଶେଷ କାର୍ଯ୍ୟକ୍ରମର ଆୟୋଜନ କରାଯାଇଥିଲା।
