ଇସଲାମାବାଦ,୨୬।୨: ଆର୍ଥିକ ସଂକଟ ଦେଇ ଗତି କରୁଥିବା ପାକିସ୍ତାନ ଏବେ ଔଷଧ ପାଇଁ ସଂଘର୍ଷ କରୁଛି। ଗଣମାଧ୍ୟମ ରିପୋର୍ଟ ମୁତାବକ, ପାକିସ୍ତାନରେ ଅସ୍ତ୍ରୋପ୍ରଚାର ପାଇଁ ଆବଶ୍ୟକ ହେଉଥିବା ଔଷଧ ବିଶେଷ ମହଜୁଦ ନ ଥିବା ବେଳେ ଆଉ ମାତ୍ର ୨ ସପ୍ତାହ ମଧ୍ୟରେ ଶେଷ ହୋଇଯିବ ବୋଲି ଏକ ବିଶେଷ ସୂତ୍ରରୁ ଖବର ମିଳିଛି।
ପାକିସ୍ତାନର ବିଦେଶୀ ମୁଦ୍ରା ଭଣ୍ଡାର କମୁଥିବାରୁ ଆବଶ୍ୟକ ଔଷଧ ଏବଂ ଔଷଧ ନିର୍ମାଣ ସାମଗ୍ରୀ କିଣିବାରେ ଅସମର୍ଥ ହେଉଛି । ଫଳରେ ସ୍ଥାନୀୟ ଔଷଧ ପ୍ରସ୍ତୁତକାରୀ କମ୍ପାନୀ ଔଷଧ ତିଆରି କରିବା ବନ୍ଦ କରିଦେଇଛି। ଅନ୍ୟପକ୍ଷେ ଔଷଧ ଅଭାବ କାରଣରୁ ଡାକ୍ତରଖାନାରେ ଜଟିଳ ରୋଗରେ ଆକ୍ରାନ୍ତ ଥିବା ରୋଗୀଙ୍କ ଅସ୍ତ୍ରୋପଚାରକୁ ହସ୍ପିଟାଲ ପକ୍ଷରୁ ବନ୍ଦ କରି ଦିଆଯାଉଛି। ଫଳରେ ଗୁରୁତର ରୋଗୀ ଔଷଧ ଅଭାବରୁ ମୃତ୍ୟୁମୁଖରେ ପଡୁଥିବା ଖବର ସାମ୍ନାକୁ ଆସୁଛି।
ଅନ୍ୟପକ୍ଷେ ପାକିସ୍ତାନର ଔଷଧ ପ୍ରସ୍ତୁତକାରୀ କମ୍ପାନୀଙ୍କ କହିବା ମୁତାବକ, ମୁଦ୍ରାର ଦାମ ହ୍ରାସ ପାଇବା ଫଳରେ ଔଷଧ ପ୍ରସ୍ତୁତ ପାଇଁ ଆବଶ୍ୟକ ହେଉଥିବା କଞ୍ଚାମାଳ କିଣିବା ମହଙ୍ଗା ହୋଇଛି । ତେଣୁ ସରକାର ତୁରନ୍ତ ଔଷଧର ଦାମ ବୃଦ୍ଧି ନ କଲେ ସେମାନେ ଉତ୍ପାଦନ ବନ୍ଦ କରିଦେବାକୁ ଧମକ ଦେଇଛନ୍ତି ।
