ନୂଆଦିଲ୍ଲୀ, ୪।୪ : ଡ୍ରୋନର ବ୍ୟବହାରକୁ ପ୍ରୋତ୍ସାହିତ କରିବା ପାଇଁ କେନ୍ଦ୍ର ସରକାର ନୂଆ ଯୋଜନା ଆଣିବାକୁ ଯାଉଛନ୍ତି। ଅନେକ କ୍ଷେତ୍ରରେ ଡ୍ରୋନ ବ୍ୟବହାରକୁ ମଧ୍ୟ ଅନୁମୋଦନ କରାଯାଇଛି। ୨୦୨୨ ବଜେଟ ଉପସ୍ଥାପନ କରିବାବେଳେ କେନ୍ଦ୍ର ସରକାର ଡ୍ରୋନ ସହ ଜଡିତ ଏକ ବଡ ଘୋଷଣା କରିଥିଲେ। ମୋବାଇଲ ଏବଂ କମ୍ପ୍ୟୁଟର ପରି ବୈନନ୍ଦିନ ଜୀବନରେ ଡ୍ରୋନ ମଧ୍ୟ ଅନ୍ତର୍ଭୁକ୍ତ କରାଯିବ ବୋଲି କୁହାଯାଉଥିଲା। ଯେଉଁଥିପାଇଁ ବହୁ ସଂଖ୍ୟକ ଡ୍ରୋନ ପାଇଲଟ ମଧ୍ୟ ଆବଶ୍ୟକ ହେବେ।
ଏହି ଯୋଜନା ଅନ୍ତର୍ଗତ ୧୦ ରାଜ୍ୟରେ ଡ୍ରୋନ ପାଇଲଟ୍ଙ୍କ ତାଲିମ ପାଇଁ ୧୮ ସ୍କୁଲ ଖୋଲାଯାଇଛି। ଅଧିକାଂଶ ସ୍ଥାନରେ ବିଦ୍ୟାଳୟ ଖୋଲିବା ପାଇଁ କେବଳ ପ୍ରାଇଭେଟ ଫ୍ଲାଇଙ୍ଗ କ୍ଲବଗୁଡ଼ିକୁ ଅନୁମୋଦନ କରାଯାଇଛି। ସେଥିମଧ୍ୟରୁ ଉତ୍ତରପ୍ରଦେଶରେ ଦୁଇଟି ଏବଂ ହରିୟାଣାରେ ଚାରିଟି ସ୍କୁଲ ଖୋଲିଛି। ଡ୍ରୋନ ସମ୍ବନ୍ଧୀୟ ଅଧିକ ସୂଚନା ଡିଜିଟାଲ ସ୍କାଏ ନାମକ ଏକ ପ୍ଲାଟଫର୍ମରେ ଡିଜିସିଏର ୱେବସାଇଟରେ ପ୍ରଦାନ କରାଯାଇଛି।
ଉତ୍ତରପ୍ରଦେଶର ଆଲିଗଡର ଧାନିପୁର ଏୟାରଷ୍ଟ୍ରିପରେ ଦୁଇଟି ଡ୍ରୋନ ପାଇଲଟ ଟ୍ରେନିଂ ସ୍କୁଲ ଖୋଲାଯାଇଛି। ହରିୟାଣାରେ ଗୁରୁଗ୍ରାମରେ ତିନୋଟି ଏବଂ ବାହାଦୂରଗଡରେ ଗୋଟିଏ ସ୍କୁଲ ରହିଛି। ମଧ୍ୟପ୍ରଦେଶର ଗ୍ବାଲିଅର୍, ଗୁଜୁରାଟର ଅହମ୍ମଦାବାଦ, ହିମାଚଳ ପ୍ରଦେଶର ଶାହପୁର, ଝାଡଖଣ୍ଡର ଜାମସେଦପୁର, କର୍ନାଟକର ବେଙ୍ଗାଲୁରୁ, ମହାରାଷ୍ଟ୍ରର ପୁଣେରେ ୪ ଟି, ମୁମ୍ବାଇରେ ଗୋଟିଏ ଏବଂ ବାରାମତିରେ ଗୋଟିଏ ଖୋଲାଯାଇଛି। ତେଲେଙ୍ଗାନାର ସିକନ୍ଦରାବାଦ ଏବଂ ହାଇଦ୍ରାବାଦରେ ଗୋଟିଏ ଲଖାଏଁ ଖୋଲାଯାଇଛି । ତାମିଲନାଡୁର ଚେନ୍ନାଇରେ ଗୋଟିଏ ଟ୍ରେନିଂ ସ୍କୁଲ ଖୋଲା ଯାଇଛି।
କେନ୍ଦ୍ର ସରକାରଙ୍କ ଅନୁଯାୟୀ ଡାକ୍ତରୀ, କୃଷି, ପଞ୍ଚାୟତରାଜ, ପ୍ରତିରକ୍ଷା ମନ୍ତ୍ରଣାଳୟ, ସ୍ବରାଷ୍ଟ୍ର ମନ୍ତ୍ରଣାଳୟ, ଗୃହ ଓ ସହରାଞ୍ଚଳ, ଖଣି, ପରିବହନ, ବିଦ୍ୟୁତ୍, ପେଟ୍ରୋଲିୟମ ଏବଂ ଗ୍ୟାସ, ପରିବେଶ ଏବଂ ସୂଚନା କ୍ଷେତ୍ରରେ ଡ୍ରୋନ ବ୍ୟବହାର କରିବାକୁ ଅନୁମୋଦନ ଦିଆଯାଇଛି। ସେହିପରି କରୋନା ଟିକା ଯୋଗାଣ ପାଇଁ ମେଘାଳୟରେ ଡ୍ରୋନ ବ୍ୟବହାର କରିବାକୁ ଅନୁମତି ଦିଆଯାଇଛି।
