ଦିଗପହଣ୍ଡି,୧୯।୨(ଅଶେଷ ନାଥ ମିଶ୍ର): ଗଞ୍ଜାମ ଜିଲା କୁକୁଡ଼ାଖଣ୍ଡି ବ୍ଲକ ମହୁଡ଼ା ଗ୍ରାମ ନିକଟରେ ହାଇୱା ଟ୍ରକ (ନଂ. ଓଡ଼ି ୩୨ ଏଲ – ୧୧୦୭) ଧକ୍କାରେ ଜଣେ ଯୁବକଙ୍କ ମୃତ୍ୟୁ ଘଟିଛି। ମୃତକ ଜଣଙ୍କ ହେଲେ କଟକ ଜିଲା ଟାଙ୍ଗୀ ଗ୍ରାମର ଶରତ ଚନ୍ଦ୍ର ମହାନ୍ତି(୪୬)। ତଦନ୍ତକାରୀ ଅଧିକାରୀ ଦିଗପହଣ୍ଡି ଥାନା ଏସ୍ଆଇ ରାଜ କିଶୋର ପାତ୍ର ମୃତଦେହ ଜବତ କରି ଗୁରୁବାର ସକାଳେ ବ୍ରହ୍ମପୁର ବଡ଼ ଡାକ୍ତରଖାନାରେ ବ୍ୟବଚ୍ଛେଦ କରାଇବା ପରେ ପରିବାର ଲୋକଙ୍କୁ ହସ୍ତାନ୍ତର କରିଥିଲେ। ପୁରୀ ସ୍ବର୍ଗଦାରରେ ତାଙ୍କ ଶେଷକୃତ୍ୟ କରାଯାଇଛି।
ସୂଚନାନୁଯାୟୀ, ବୁଧବାର ସାରେ ଦୁର୍ଘଟଣା ଘଟିଥିଲା। ଏନେଇ ଦିଗପହଣ୍ଡି ଥାନାରେ ଏତଲା ହେବା ପରେ ଭାରପ୍ରାପ୍ତ ଆଇଆଇସି ତଥା ଡିଏସ୍ପି ପ୍ରଶାନ୍ତ ପାତ୍ର ମାମଲା ନଂ.୬୧/୨୬ ଅନୁଯାୟୀ ମକଦ୍ଦମା ରୁଜୁ କରିଥିଲେ। ଶରତ ମହୁଡା ନିକଟ ଗ୍ରାମବିକାଶ ସଂସ୍ଥାରେ ଗଞ୍ଜାମ ଜିଲା ମୁଖ୍ୟ ମ୍ୟାନେଜର ଭାବେ କାମ କରୁଥିଲେ। ସେ ତାଙ୍କ ବାଇକରେ ଯାଉଥିବା ବେଳେ ହାଇୱା ଟ୍ରକଟି ତାଙ୍କୁ ଧକ୍କା ଦେଇଥିଲା। ସ୍ଥାନୀୟ ଲୋକେ ତାଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ବ୍ରହ୍ମପୁର ବଡ଼ ଡାକ୍ତରଖାନାରେ ଭର୍ତ୍ତି କରିଥିଲେ। ରାତି ପ୍ରାୟ ୮ ଟାରେ ଚିକିତ୍ସାଧୀନ ଅବସ୍ଥାରେ ତାଙ୍କ ମୃତ୍ୟୁ ଘଟିଥିଲା। ଦୁର୍ଘଟଣା ଘଟାଇଥିବା ହାଇୱା ଟ୍ରକକୁ ପୋଲିସ ଜବତ କରିବା ସହ ରମ୍ଭାର ଟ୍ରକ ଚାଳକ ଜଗନ୍ନାଥ ଗୌଡ଼ଙ୍କୁ ଥାନାରେ ଅଟକ ରଖି ତଦନ୍ତ ଚଳାଇଛନ୍ତି।
