ଦିଗପହଣ୍ଡି,୧୪।୨(ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡି ବ୍ଲକ ସହଦେବ ଟିକରପଡ଼ା ପଞ୍ଚାୟତ ଫାସିବନ୍ଧ ଗ୍ରାମରେ ଗତ ୨୦୧୯-୨୦ ଆର୍ଥିକ ବର୍ଷରେ ବସୁଧା ଯୋଜନାରେ ପ୍ରାୟ ୮୦ ଲକ୍ଷ ଟଙ୍କା ବ୍ୟୟରେ ନିର୍ମିତ ପାନୀୟଜଳ ପ୍ରକଳ୍ପ ଅଚଳ ହୋଇପଡିଛି। ଅଦରକାରୀ ପମ୍ପ ହାଉସରେ ତାଲା ଝୁଲୁଛି। ପ୍ରକଳ୍ପରୁ ୧୭୬ ବାସଗୃହକୁ ପାଇପ ସଂଯୋଗ କରାଯାଇଥିଲେ ମଧ୍ୟ ଲୋକଙ୍କୁ ପାଣି ମୁନ୍ଦାଏ ମିଳୁନି। ଗ୍ରାମର ମହିଳା ମାନେ ପ୍ରାୟ ୫ ଶହ ମିଟର ଦୂରରେ ଥିବା ଟିକରପଡ଼ା ଏବଂ ଜୁଆଣ ପଲ୍ଲୀ ଗାଁ ରାସ୍ତାକଡରେ ଥିବା ନଳକୂଅରୁ ପ୍ରତିଦିନ ପାନୀୟଜଳ ସଂଗ୍ରହ କରୁଥିବା ଦେଖିବାକୁ ମିଳିଛି। ୧ ହଜାରରୁ ଊଦ୍ଧର୍ବ ଜନସଂଖ୍ୟା ବିଶିଷ୍ଟ ଏହି ଗାଁର ଭୋଟର ସଂଖ୍ୟା ୪୮୫। ପାନୀୟଜଳ ପ୍ରକଳ୍ପ ନିର୍ମାଣ ସମୟରେ ସମସ୍ତ ସାହିକୁ ପାଇପ ବିଛାଯାଇ ୪ ଶହ ମିଟର ବିଶିଷ୍ଟ ୨ ଟି ବୋର୍ ଦ୍ୱାରା ପ୍ରାୟ ୪ ଶହ ଫୁଟ ଖୋଳା ଯାଇ ୬୦ ଫୁଟ ପାଇପ ପକାଯାଇ ମୋଟର ଯୋଗେ ଟାଙ୍କିକୁ ପାଣି ଉଠା ଯାଉଥିଲା। କିଛିବର୍ଷ ପରେ ଜଳସ୍ତର କମିଯିବାରୁ ପୁଣି ୧୧୦ ଫୁଟ ପାଇପ ପକାଯାଇ ଲୋକଙ୍କୁ ଆବଶ୍ୟକ ମୁତାବକ ପାଣି ଦିଆଯାଉଥିଲା। କିନ୍ତୁ ଭୂତଳ ଜଳସ୍ତର କ୍ରମାଗତ ହ୍ରାସ ପାଇବା କାରଣରୁ ପୁଣି ଥରେ ୩ ଟି ବୋର୍ ଖୋଳାଯାଇ ପ୍ରକଳ୍ପରୁ ଲୋକଙ୍କୁ ପାଣି ଦିଆଯାଉଥିଲା। ପମ୍ପ ହାଉସ ପରିଚାଳନା ଓ ରକ୍ଷଣାବେକ୍ଷଣ ପାଇଁ ଘରକୁ ପାଇପ ପାଣି ସଂଯୋଗ ନେଇଥିବା ଲୋକେ ପ୍ରତିମାସରେ ୩୦ ଟଙ୍କା ଲେଖାଏ ପାଣି ଟିକସ ଦେଉଥିଲେ। ପଞ୍ଚାୟତ ପକ୍ଷରୁ ଗ୍ରାମର ମିଥୁନ ପ୍ରଧାନଙ୍କୁ ପ୍ରକଳ୍ପର ମୋଟର ଚଳାଇବା ପାଇଁ ମାସିକ ୩୨୦୦ ଟଙ୍କା ପାରିଶ୍ରମିକ ଦିଆଯାଉଛି। ପ୍ରକଳ୍ପ ଅଚଳ ହୋଇପଡ଼ିଥିବା ସଂକ୍ରାନ୍ତରେ ଦିଗପହଣ୍ଡି ବିଡ଼ିଓ ଅନାମିକା ପାଣ୍ଡେ ଏବଂ ବିଭାଗୀୟ ସହକାରୀ ଯନ୍ତ୍ରୀ ଇଂ. ଭୀମା ରାଓ ଙ୍କୁ ଗ୍ରାମବାସୀ ବାରମ୍ବାର ଅଭିଯୋଗ କରିଥିଲେ ମଧ୍ୟ ଅଚଳ ପ୍ରକଳ୍ପ କୁ କାର୍ଯ୍ୟକ୍ଷମ କରାଯାଉନଥିବା ରୁ ଆନ୍ଦୋଳନାତ୍ମକ କାର୍ଯ୍ୟପନ୍ଥା ହାତକୁ ନିଆଯିବ ବୋଲି ସୁଦାମ ଗୌଡ଼,ନିରଞ୍ଜନ ପ୍ରଧାନ,ବୁଦ୍ଧିଆ ପ୍ରଧାନ,ସନ୍ତୋଷ ଗୌଡ଼,ରାଧାକାନ୍ତ ରାହା,ବୃନ୍ଦାବନ ବେହେରା,ଲବ ପାତ୍ର, ଗୋବର୍ଦ୍ଧନ ପ୍ରଧାନ,ଭକ୍ତ ଗୌଡ଼,ଗୋପାଳ ଗୌଡ ପ୍ରମୁଖ ଚେତାବନୀ ଦେଇଛନ୍ତି। ଏନେଇ ବ୍ଲକ ଗ୍ରାମ୍ୟ ପାନୀୟଜଳ ଓ ପରିମଳ ବିଭାଗ ସହକାରୀ ଯନ୍ତ୍ରୀଙ୍କୁ ପଚାରିବାରୁ ଭୂତଳ ଜଳସ୍ତର କମିଯିବାରୁ ମୋଟର ଯୋଗେ ପାଣି ଉଠୁ ନାହିଁ। ମେଗା ପାନୀୟଜଳ ପ୍ରକଳ୍ପ କାର୍ଯ୍ୟକ୍ଷମ ହେଲେ ସେଠାରୁ ପାଇପ ଯୋଗେ ଉକ୍ତ ଅଚଳ ପ୍ରକଳ୍ପକୁ ପାନୀୟ ଜଳ ଯୋଗାଇ ଦିଆଯିବ ବୋଲି ସେ କହିଛନ୍ତି।
