ଦାରିଙ୍ଗବାଡି, ୬।୧୨ (ଅରୁଣ ସାହୁ)-କନ୍ଧମାଳ ଜିଲା ଦାରିଙ୍ଗବାଡି ବ୍ଲକ ଅଞ୍ଚଳରେ କଚ୍ଚା ଘରକୁ ପକ୍କାଘର କରିବା ପାଇଁ ସରକାରଙ୍କ ପ୍ରଧାନମନ୍ତ୍ରୀ ଆବାସ ଯୋଜନାରେ ପ୍ରଶାସନ ପକ୍ଷରୁ ପଦକ୍ଷେପ ନିଆଯାଉଛି। କିନ୍ତୁ ତାହା କେତେ ସଫଳ ରୂପାୟନ ହେଉଛି ତାର ତଦାରଖ କରିବା ପାଇଁ ପଞ୍ଚାୟତ ଓ ବ୍ଲକ କାର୍ଯ୍ୟାଳୟ ପକ୍ଷରୁ ନିୟୋଜିତ ଅଧିକାରୀମାନଙ୍କ ମନମୁଖୀ ହେଉ କି ବୈମାତୃକ ମନୋଭାବ ହେଉ ତାହା ତୃଣମୂଳ ସ୍ତରରେ ଫେଲ ମାରିଛି।
ଏଭଳି ଘଟଣା ଦେଖିବାକୁ ମିଳିଛି ଉକ୍ତ ବ୍ଲକ ସିମନବାଡି ପଞ୍ଚାୟତ ଦଡିବାଡି ଗ୍ରାମରେ। ଉକ୍ତ ଗ୍ରାମର ସୁକୁମାରି ବିନ୍ଧାଣିଙ୍କୁ ଗତ ୨୦୨୩ ଜୁନ ମାସ ୧୯ରେ ପ୍ରଶାସନ ପକ୍ଷରୁ ପ୍ରଧାନମନ୍ତ୍ରୀ ଆବାସ ଯୋଜନାରେ ଗୃହ ନିର୍ମାଣ ପାଇଁ କାର୍ଯ୍ୟାଦେଶ ଦିଆଯିବା ସହ ଆଗୁଆ ୪୦ ହଜାର ଅନୁଦାନ ପ୍ରଦାନ କରାଯାଇଥିଲା। ତେବେ ସେହି ଗ୍ରାମର ଜଣେ ଯୁବକ ଘର ନିର୍ମାଣ କରିଦେବି କହି ପ୍ରଲୋଭନ ଦେଖାଇ ଉକ୍ତ ଅର୍ଥ ନେବା ସହ କାର୍ଯ୍ୟ ଆରମ୍ଭ କରିଥିଲେ। ପୁଣି ସୁକୁମାରୀଙ୍କ ଦିତୀୟ କିସ୍ତି ୬୫ ହଜାର ଆସିବା ପରେ ଘରର କାର୍ଯ୍ୟ ସମ୍ପୂର୍ଣ୍ଣ କରିବି କହି ଉକ୍ତ ଅର୍ଥକୁ ମଧ୍ୟ ଯୁବକ ଜଣଙ୍କ ସୁକୁମାରୀଙ୍କଠାରୁ ନେଇଗଲେ। ସେହିଦିନ ଠାରୁ ଆଉ ଉକ୍ତ ଯୁବକ ନା ଘର କାର୍ଯ୍ୟ ଶେଷ କରୁଛନ୍ତି ନା ସୁକୁମାରୀଙ୍କ ଅର୍ଥ ଫେରାଉଛନ୍ତି। ଫଳରେ ସୁକୁମାରୀ ଏବେ ଗୁହାଳ ଘରେ ଛେଳି ଗହଣରେ ରହିବା ସହ ତାଙ୍କ ପରିବାର ଓ ଛେଳି ଏକାଠି ମୁଣ୍ଡ ଗୁଞ୍ଜୁଛନ୍ତି। ଗୁହାଳ ଘରେ ରୋଷେଇ, ଖାଇବା, ପିଲାଙ୍କ ପାଠପଢା ଆଦି କରିବା ସହ ରାତିରେ ସେହି ଅଧାପନ୍ତରିଆ ଘରେ ପରିବାର ନେଇ ଶୋଇବାକୁ ପଡୁଛି। ଖରା ଦିନ ପରେ ବର୍ଷା ଗଲା ଏବେ ଶୀତରେ ମଧ୍ୟ ଉକ୍ତ ଘରେ ଦିନ ରାତି ବିତାଉଛନ୍ତି।
ସୁକୁମାରୀ ଅନେକ ସ୍ବପ୍ନ ଦେଖିଥିଲେ ଘର ଟିଏ ହେଲା ପରେ ପରିବାର ନେଇ କୋଠା ଘରେ ରହିବେ। ହେଲେ ସ୍ବପ୍ନ ତାଙ୍କର ଧୂଳିସାତ ହୋଇଯାଇଛି। କେବଳ ସୁକୁମାରୀ ନୁହଁନ୍ତି ସେହି ଗ୍ରାମର ଶିବ ବିନ୍ଧାଣି ଏବଂ ନମିତା ପ୍ରଧାନଙ୍କୁ ମଧ୍ୟ ସେହି ଗୋଟିଏ ଦିନରେ କାର୍ଯ୍ୟାଦେଶ ମିଳିଥିଲା ଓ ଯୁବକ ଜଣଙ୍କ ସମସ୍ତଙ୍କ ଘର ଶୀଘ୍ର ନିର୍ମାଣ କରିଦେବି କହି ୨ଟି କିସ୍ତିର ୧ ଲକ୍ଷ ଟଙ୍କାରୁ ଉର୍ଦ୍ଧ୍ୱ ଟଙ୍କା ନେଇ ସମସ୍ତ ଘର ଅଧାପନ୍ତାରିଆ କରି ଛାଡି ଲୋକଙ୍କ ଅର୍ଥକୁ ହଡପ କରିଦେଇଛନ୍ତି।
ବର୍ତ୍ତମାନ ଦେଢ଼ ବର୍ଷରୁ ଅଧିକ ସମୟ ହେଲା ସୁକୁମାରୀ, ନମିତା ଏବଂ ଶିବ ବିନ୍ଧାଣୀଙ୍କ ଘର ନିର୍ମାଣ କାର୍ଯ୍ୟ ସରିନଥିବା ବେଳେ ଅତି ଚଞ୍ଚକତାର ସହ ଅର୍ଥ ହଡପ ସହ ଅତି ନିମ୍ନମାନର କାର୍ଯ୍ୟ୍କୁ ନେଇ ପ୍ରଧାନମନ୍ତ୍ରୀ ଆବାସ ଯୋଜନାର ହିତାଧିକାରୀମାନେ ଚିନ୍ତିତ ଅଛନ୍ତି। କେବେ ଓ କେମିତି ତାଙ୍କ ଘର କାର୍ଯ୍ୟ ସମ୍ପୂର୍ଣ୍ଣ କରଯାଇପାରିବ ସେନେଇ ପ୍ରଶାସନ ହସ୍ତକ୍ଷେପ କରିବାକୁ ହିତାଧିକାରୀମାନେ ନିବେଦନ କରିଛନ୍ତି।
