ମୁମ୍ବାଇ,୧।୨: ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନେତୃତ୍ୱରେ ଅର୍ଥମନ୍ତ୍ରୀ ନିର୍ମଳା ସୀତାରାମନ ଶନିବାର ଜବରଦସ୍ତ ବଜେଟ ଉପସ୍ଥାପନ କରିଛନ୍ତି। ଏହି ବଜେଟ ମଧ୍ୟବିତ୍ତଙ୍କ ପାଇଁ ଡ୍ରିମ୍ ବଜେଟ କୁହାଯାଇପାରିବ। ସେଥିପାଇଁ ଅର୍ଥମନ୍ତ୍ରୀଙ୍କୁ ଧନ୍ୟବାଦ ଜଣାଉଛି ବୋଲି ମହାରାଷ୍ଟ୍ର ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସ ପ୍ରକାଶ କରିଛନ୍ତି।
ଅର୍ଥମନ୍ତ୍ରୀ ସୀତାରାମନ ବଜେଟ ଉପସ୍ଥାପନ କରି ମଧ୍ୟବିତ୍ତଙ୍କ ପାଇଁ ଅନେକ ବଡ଼ ଘୋଷଣା କରିଛନ୍ତି। ତେବେ ଆୟକର ସ୍ଲାବକୁ ନେଇ ବଡ଼ ଘୋଷଣା କରିଛନ୍ତି। ଏଣିକି ୧୨ ଲକ୍ଷ ଟଙ୍କା ପର୍ଯ୍ୟନ୍ତ ଆୟ ଉପରେ କୌଣସି ଟିକସ୍ ଦେବାକୁ ପଡିବ ନାହିଁ। ବଜେଟରେ ଚାଷୀମାନଙ୍କୁ ଅନେକ ଉପହାର ଦିଆଯାଇଛି। କେସିସି (କିଷାନ କ୍ରେଡିଟ କାର୍ଡ)ର ସୀମା ଏବେ ୫ଲକ୍ଷ ଟଙ୍କାକୁ ବୃଦ୍ଧି କରାଯାଇଛି।
ଏପରିକି ବିହାର ପାଇଁ ଅନେକ ବଡ଼ ଘୋଷଣା କରାଯାଇଛି। ଏଠାରେ ମାଖାନା ବୋର୍ଡ ଗଠନ ଘୋଷଣା କରାଯାଇଛି। ସେହିପରି କ୍ୟାନସର ରୋଗ ଭଳି ଗମ୍ଭୀର ରୋଗର ୩୬ଟି ଔଷଧକୁ କଷ୍ଟମ ଶୁଳ୍କରୁ ମୁକ୍ତ କରାଯାଇଛି।
ବଜେଟରେ କାହାକୁ କ’ଣ ମିଳିଛି, ଆସନ୍ତୁ ଜାଣିବା…
– ପ୍ରଧାନମନ୍ତ୍ରୀ ଧନଧାନ୍ୟ କୃଷି ଯୋଜନା: ଅର୍ଥମନ୍ତ୍ରୀ ଘୋଷଣା କରିଛନ୍ତି ଯେ, ସରକାର ରାଜ୍ୟଗୁଡ଼ିକରେ ପ୍ରଧାନମନ୍ତ୍ରୀ ଧନଧାନ୍ୟ କୃଷି ଯୋଜନା ଆରମ୍ଭ କରିବେ। ଏହି ଯୋଜନାରେ ୧୦୦ଟି ଜିଲାକୁ ଅନ୍ତର୍ଭୁକ୍ତ କରାଯିବ। ଏଥିରେ ୧.୭ କୋଟି ଚାଷୀଙ୍କୁ ସାହାଯ୍ୟ କରିବାର ସମ୍ଭାବନା ଅଛି।
– ପ୍ରତିରକ୍ଷା: ବଜେଟରେ ପ୍ରତିରକ୍ଷା ପାଇଁ ୬.୮୧ ଲକ୍ଷ କୋଟି ବ୍ୟୟ ବରାଦ ହୋଇଛି। ପ୍ରତିରକ୍ଷା କ୍ଷେତ୍ରରେ ମେକ୍ ଇନ ଇଣ୍ଡିଆ ଓ ଆତ୍ମନିର୍ଭରତାକୁ ଗୁରୁତ୍ୱ ଦିଆଯାଇଛି। ୨୦୨୯ ସୁଦ୍ଧା ୩ ଲକ୍ଷ କୋଟିର ପ୍ରତିରକ୍ଷା ସାମଗ୍ରୀ ଉତ୍ପାଦନ ପାଇଁ ଲକ୍ଷ୍ୟ ରଖାଯାଇଛି।
– ଆସାମରେ ୟୁରିଆ ପ୍ଲାଣ୍ଟ: ଆସାମର ନାମରୂପରେ ବାର୍ଷିକ ୧୨.୭ ଲକ୍ଷ ମେଟ୍ରିକ ଟନ କ୍ଷମତା ବିଶିଷ୍ଟ ଏକ ପ୍ଲାଣ୍ଟ ସ୍ଥାପନ କରାଯିବ। ପୂର୍ବ ଅଞ୍ଚଳରେ ବନ୍ଦ ଥିବା ତିନୋଟି ୟୁରିଆ ପ୍ଲାଣ୍ଟ ପୁନଃଖୋଲି ଦିଆଯାଇଛି। ଏହା ୟୁରିଆ ଉତ୍ପାଦନରେ ଆତ୍ମନିଭରଶୀଳତା ଦିଗରେ ଏକ ପଦକ୍ଷେପ।
– ଉଦ୍ୟୋଗ: ଷ୍ଟାର୍ଟଅପ୍ ଗୁଡ଼ିକୁ ପାଣ୍ଠି ଯୋଗାଇବା ପାଇଁ ନୂତନ ପାଣ୍ଠି ବ୍ୟବସ୍ଥା କରାଯିବ। ବର୍ତ୍ତମାନର ୧୦,୦୦୦ କୋଟି ଟଙ୍କାର ସରକାରୀ ଅବଦାନ ଦିଆଯିବ।
– ଚପଲ ଏବଂ ଚମଡ଼ା କ୍ଷେତ୍ର: ଏହି କ୍ଷେତ୍ର ପାଇଁ ଉତ୍ପାଦ ଯୋଜନା ଆରମ୍ଭ କରାଯିବ। ଯାହା ଦ୍ୱାରା ଚପଲ ଏବଂ ଚମଡା କ୍ଷେତ୍ରରେ ଉତ୍ପାଦକତା, ଗୁଣବତ୍ତା ଏବଂ ପ୍ରତିଯୋଗିତାକୁ ପ୍ରୋତ୍ସାହିତ କରାଯାଇପାରିବ।
– ବିହାର ପାଇଁ: ବିହାରରେ ଜାତୀୟ ଖାଦ୍ୟ ପ୍ରଯୁକ୍ତିବିଦ୍ୟା, ଉଦ୍ୟୋଗୀତା ଏବଂ ପରିଚାଳନା ପ୍ରତିଷ୍ଠାନ ଖୋଲିବ। ଏହା କୃଷକମାନଙ୍କ ଉତ୍ପାଦର ଗୁଣବତ୍ତା ବୃଦ୍ଧି କରି ସେମାନଙ୍କ ଆୟ ବୃଦ୍ଧି କରିବ। ଏହା ଯୁବକମାନଙ୍କ ପାଇଁ ନିଯୁକ୍ତି ସୁଯୋଗ ସୃଷ୍ଟି କରିବ।
