ଜଟଣୀ,୧୬ ।୨(ଡି.ଏନ୍.ଏ.) ଖୋର୍ଦ୍ଧା ଜିଲା ଜଟଣୀ ସହରରେ ଅନେକ ନୂତନ ଆପାର୍ଟମେଣ୍ଟ ଓ ସାହିବସ୍ତି ଗଢ଼ିଉଠିଛି। ଏଠାରେ ଗୃହ ନିର୍ମାଣ ପୂର୍ବରୁ ସରକାରୀ ନିୟମ ଉଲ୍ଲଂଘନ କରାଯାଉଛି। ରାସ୍ତା ଏବଂ ଡ୍ରେନ୍ ଉପରେ ଅବରୋଧ ଯୋଗୁ ଲୋକେ ଅସୁବିଧାର ସମ୍ମୁଖୀନ ହେଉଛନ୍ତି। ଜଟଣୀ ପୌରାଞ୍ଚଳ ରାମଚନ୍ଦ୍ରପୁର ମୌଜାର ୧୦ନଂ. ଓ୍ବାର୍ଡ ଅଧୀନ କୃପାସିନ୍ଧୁନଗର ରାସ୍ତାରେ ଡ୍ରେନ୍ ପାଣି ଜମି ରହି ଅସ୍ବାସ୍ଥ୍ୟକର ପରିବେଶ ସୃଷ୍ଟି କରୁଛି। ଏଥିସହ ଲୋକେ ଯାତାୟାତରେ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଥିବା ଅଭିଯୋଗ ହୋଇଛି। ସୂଚନା ମୁତାବକ, କୃପାସିନ୍ଧୁନଗରରେ ବସବାସ କରୁଥିବା ୨୦୦ରୁ ଊର୍ଦ୍ଧ୍ୱ ଲୋକ ପ୍ରାୟ ୧ମାସ ହେବ ରାସ୍ତାରେ ଥିବା ଡ୍ରେନ ପାଣିରେ ଯାତାୟାତ କରୁଛନ୍ତି। ସ୍ଥାନୀୟ ଅଞ୍ଚଳର ଉପର ମୁଣ୍ଡରୁ ଡ୍ରେନ ମଇଳା ପାଣି ତଳମୁଣ୍ଡ ଅଞ୍ଚଳକୁ ଆସୁଥିବାରୁ ଏଭଳି ପରିସ୍ଥିତି ଉପୁଜୁଛି। କୃପାସିନ୍ଧୁନଗର ଅଞ୍ଚଳରେ ଡ୍ରେନ ନିର୍ମାଣ କରିବା ପାଇଁ ସ୍ଥାନୀୟ ଲୋକେ ପୌର କାର୍ଯ୍ୟନିର୍ବାହୀ ଅଧିକାରୀଙ୍କ ନିକଟରେ ଦାବି କରିଛନ୍ତି। ଏନେଇ କାର୍ଯ୍ୟନିର୍ବାହୀ ଅଧୀକାରୀ ଦିଲ୍ଲୀପ ମହାନ୍ତି କହିଛନ୍ତି, ଚାଷଜମିରେ ପ୍ରଶାସନ ପକ୍ଷରୁ ଡ୍ରେନ ନିର୍ମାଣ ହୋଇପାରିବ ନାହିଁ। ଉପଭୋକ୍ତାମାନେ ସୋସାଇଟି ଗଠନ କରି ସେମାନେ ନିଜ ଜାଗା ପୌର ପ୍ରଶାସନକୁ ଆଇନତଃ ହସ୍ତାନ୍ତର କରିବେ, ତେବେ ପୌର ପ୍ରଶାସନ ପକ୍ଷରୁ ସେଠାରେ ଡ୍ରେନ ନିର୍ମାଣ କରାଯିବ ବୋଲି କହିଛନ୍ତି।
