ନନ୍ଦପୁର/ ପାଡୁଆ,୨୬।୫(ତୁଷାର କାନ୍ତ ମହାନ୍ତି/ଶଙ୍କର ପୂଜାରୀ): କୋରାପୁଟ ଜିଲା ନନ୍ଦପୁର ବ୍ଲକର ବ୍ୟବସାୟିକ କେନ୍ଦ୍ରସ୍ଥଳୀ ଭାବେ ପରିଚିତ ପାଡୁଆ ବଜାର ଦୁର୍ଗନ୍ଧରେ ଫାଟି ପଡୁଛି । ରାସ୍ତାର ଦୁଇପାର୍ଶ୍ୱରେ ଥିବା ଡ୍ରେନରେ ଅଳିଆ ଆବର୍ଜନା ସାଙ୍ଗକୁ ମଇଳା ପାଣିର ଜମାଟ ବାନ୍ଧିଛି । ଡ୍ରେନର ମଇଳା ପାଣି ରାସ୍ତା ଉପରେ ପ୍ରବାହିତ ହେଉଛି । ଫଳତଃ ଜୟପୁର-ବିଶାଖାପାଟଣା ସଂଯୋଗୀ ରାଜ୍ୟ ରାଜପଥରେ ଥିବା ପାଡୁଆ ବଜାର ବର୍ତ୍ତମାନ ଦୁର୍ଗନ୍ଧମୟ ହୋଇଛି ।
ବଜାରରେ ଟିକେ ସମୟ ଛିଡା ହେଲେ ମୁସ୍କିଲ ବୋଲି କୌଣସି ସାମଗ୍ରୀ କିଣିବାକୁ ଆସୁଥିବା ଗ୍ରାହକ ଓ ଗାଡ଼ି ମୋଟର ଅପେକ୍ଷାରେ ଥିବା ଯାତ୍ରୀ ଅଭିଯୋଗ କରିଛନ୍ତି। ରାସ୍ତାର ଦୁଇ ପାର୍ଶ୍ୱ ଡ୍ରେନକୁ କିଛି ବ୍ୟବସାୟୀ ଜବର ଦଖଲ କରି ଦୋକାନ ସାମଗ୍ରୀ ରଖୁଥିବା କହିଛନ୍ତି। ଅଳିଆ ଆବର୍ଜନା ଗୋଟିଏ ଜାଗାରେ ଏକାଠି ସଂଗ୍ରହ କରିବାକୁ ପଞ୍ଚାୟତ ଓ ବ୍ଲକ ପ୍ରଶାସନ ତରଫରୁ ପାଡୁଆ ବଜାର କ୍ଷେତ୍ରରେ ଡଷ୍ଟବିନ ରଖିବା ବ୍ୟବସ୍ଥା କରାଯାଇ ନାହିଁ।
ଫଳତଃ ବ୍ୟବସାୟୀ, ଗ୍ରାହକ, ପଥଚାରୀ ଓ ଗ୍ରାମବାସୀ ରାସ୍ତା କଡ଼ର ଡ୍ରେନରେ ଅଳିଆ ପକାଇ ଥିବାରୁ ଡ୍ରେନ ଜାମ୍ ହୋଇ ରହିଛି। ରାସ୍ତା ଦେଖାରଖା କରୁଥିବା ପୂର୍ତ୍ତବିଭାଗ ମଧ୍ୟ ଡ୍ରେନ୍ ନିଷ୍କାସନ ପାଇଁ କୌଣସି ବ୍ୟବସ୍ଥା କରୁନଥିବାରୁ ଡ୍ରେନ ପାଣି ରାସ୍ତାରେ ପ୍ରବାହିତ ହୋଇ ଦୁର୍ଗନ୍ଧମୟ ପରିବେଶ ସୃଷ୍ଟି କରୁଥିବା ଯାତ୍ରୀ, ଗ୍ରାହକ ଓ ବ୍ୟବସାୟୀ କହିଛନ୍ତି । ପାଡୁଆ ପଞ୍ଚାୟତ, ନନ୍ଦପୁର ବ୍ଲକ ଓ ଜିଲ୍ଲା ପୂର୍ତ୍ତବିଭାଗ କର୍ତ୍ତୃପକ୍ଷ ଏଥିପ୍ରତି ଦୃଷ୍ଟି ଦେଇ ବ୍ୟବସାୟିକ କେନ୍ଦ୍ର ପାଡୁଆ ବଜାରର ପରିମଳ ବ୍ୟବସ୍ଥାକୁ ସୁଦୃଢ଼ କରନ୍ତୁ ବୋଲି ବୁଦ୍ଧିଜୀବୀ ମତପ୍ରକାଶ କରିଛନ୍ତି।
