ଯାଜପୁର,୩୧(ହର୍ଷବର୍ଦ୍ଧନ ବେହେରା): ରେଳ ବିଭାଗର ପୂର୍ବତଟ ରେଳ ଡିଭିଜନ ପକ୍ଷରୁ ଗତ ୩ା୪ା୨୦୨୧ରୁ ଯାତ୍ରୀଙ୍କଠାରୁ ଦୁଇଗୁଣା ଭଡ଼ା ଆଦାୟ କରାଯାଉଛି। ସମସ୍ତ ପାସେଞ୍ଜର ଓ ମେମୁ ଟ୍ରେନଗୁଡ଼ିକୁ ଦ୍ରୁତଗାମୀ ସ୍ପେଶିଆଲ ଟ୍ରେନ ଘୋଷଣା କରି ଗରିବ, ଖଟିଖିଆ, ରୋଗୀ, ଛାତ୍ରୀଛାତ୍ର, ବରିଷ୍ଠ ନାଗରିକଙ୍କୁ ଶୋଷଣ କରାଯାଉଛି। ସମସ୍ତ ଷ୍ଟେଶନ ଓ ପାସେଞ୍ଜର ହଲ୍ଟରେ ଅଟକୁଥିବା ପାସେଞ୍ଜର ଟ୍ରେନରେ ଯାତ୍ରା କଲେ ବି ଦ୍ରୁତଗାମୀ ଟ୍ରେନର ଭଡ଼ା ଦେବାକୁ ପଡୁଛି। ଏପରିକି ଗୋଟିଏ ଷ୍ଟପେଜରୁ ଅନ୍ୟ ଷ୍ଟପେଜକୁ ଯିବାକୁ ସର୍ବନିମ୍ନ ୩୦ଟଙ୍କା ଦ୍ରୁତଗାମୀ ଟ୍ରେନ ଆଳରେ ଭଡ଼ା ଅସୁଲି ହେଉଛି। ଏହାବାଦ୍ ମାଲଦା ଟାଉନରୁ ବାଙ୍ଗାଲୁରୁ ଯାଉଥିବା ଅମ୍ରିତ ଭାରତ ଏକ୍ସପ୍ରେସ ଟ୍ରେନକୁ ଯାଜପୁର-କେନ୍ଦୁଝର ରୋଡ ଷ୍ଟେଶନରେ ରହିଣୀ ଦାବି କରି ବନ୍ଦେ ବ୍ୟାସନଗର ପକ୍ଷରୁ କେନ୍ଦ୍ର ରେଳମନ୍ତ୍ରୀ ଅଶ୍ୱିନୀ ବୈଷ୍ଣବଙ୍କୁ ଟୁଇଟ୍ ଏବଂ ସ୍ପିଡ୍ ପୋଷ୍ଟ ଜରିଆରେ ଦାବି କରାଯାଇଛି।
ଉକ୍ତ ଦାବିପତ୍ରରେ ଆହୁରି ଦର୍ଶାଯାଇଛି, ଯାଜପୁର-କେନ୍ଦୁଝର ରୋଡରୁ ଭୁବନେଶ୍ୱର ପର୍ଯ୍ୟନ୍ତ ୨୪ଟି ଷ୍ଟପେଜରେ ଅଟକୁଥିବା ପାସେଞ୍ଜର ଓ ମେମୁ ଟ୍ରେନଗୁଡ଼ିକର ଭଡା ୨୫ ଟଙ୍କା ସ୍ଥାନରେ ୫୦ ଟଙ୍କା ଦ୍ରୁତଗାମୀ ଟ୍ରେନ୍ ଭଡ଼ା ଆଦାୟ କରାଯାଉଛି। ଏହି କରୋନା କାଳର ସ୍ବତନ୍ତ୍ର ନିଷ୍ପତ୍ତି ରେଳ ବିଭାଗର ଅନ୍ୟ ଡିଭିଜନଗୁଡ଼ିକରେ ପ୍ରତ୍ୟାହାର ହୋଇଥିଲେ ବି ଏଠାରେ ଗତ ୩ ବର୍ଷ ମଧ୍ୟରେ ଯାତ୍ରୀମାନେ ଶୋଷିତ ହେଉଛନ୍ତି। ଭାରତ ଅମୃତ ମହୋତ୍ସବ ତଥା ରାମ ମନ୍ଦିର ପ୍ରତିଷ୍ଠା ଉପଲକ୍ଷେ ୩୦ା୧୨ା୨୦୨୩ରେ ୧୬ଟି ସ୍ବତନ୍ତ୍ର ଟ୍ରେନ ଶୁଭାରମ୍ଭ କରିଥିବାବେଳେ ଓଡ଼ିଶା ଦେଇ ଚାଲିଥିବା ଅମ୍ରିତ ଭାରତ ସାପ୍ତାହିକ ଟ୍ରେନ କଳିଙ୍ଗନଗର ଶିଳ୍ପାଞ୍ଚଳର ମୁଖଶାଳା ଭାବେ ପରିଚିତ ଯାଜପୁର-କେନ୍ଦୁଝର ରୋଡ ଷ୍ଟେଶନରେ ରହଣୀ ନାହିଁ। ଏହି ଷ୍ଟେଶନ ୧୯୯୬ରୁ ଯାଜପୁର, କେନ୍ଦୁଝର ଓ ଢେଙ୍କାନାଳବାସୀଙ୍କୁ ସେବା ଦେଇ ଆସୁଥିବାବେଳେ ଏହା ରେଳଯାତ୍ରୀମାନଙ୍କୁ ଅସନ୍ତୋଷ କରିଛି। ତେଣୁ ଏହି ଷ୍ଟେଶନର ପରାମର୍ଶଦାତା ପରିଷଦର ଭାଗିରଥି ଆଚାର୍ଯ୍ୟ, ବିଦ୍ୟାଧର ପଲାର, ବ୍ରଜବାହୁ ସୀମାନ୍ତ କେଶରୀ ସାମଲ, ପବିତ୍ର ମୋହନ ସାହୁ, ଶିବରଞ୍ଜନ ମସକରା, ଅକ୍ଷୟ କୁମାର ପଣ୍ଡା. ଏସ୍.ମଜୁବୁର ରହମାନ ଉପରୋକ୍ତ ଦାବିଗୁଡିକୁ ତୁରନ୍ତ ସମାଧାନ କରିବାକୁ ଟୁଇଟ୍, ଇ-ମେଲ ଓ ସ୍ପିଡ୍ପୋଷ୍ଟ ଜରିଆରେ ରେଳମନ୍ତ୍ରୀଙ୍କ ଦୃଷ୍ଟି ଆକର୍ଷଣ କରିଛନ୍ତି।
