ଭଦୋଦରା,୧୧।୧: ନ୍ୟୁଜିଲାଣ୍ଡ ବିପକ୍ଷ ପ୍ରଥମ ଦିନିକିଆ ମ୍ୟାଚ୍ରେ ଭାରତ ବିଜୟୀ ଇନିଂସ ଖେଳି ମଧ୍ୟ ଖୁସି ନାହାନ୍ତି ବିରାଟ କୋହଲି। ପଡ଼ିଆରେ ଦର୍ଶକଙ୍କ ଆଚରଣକୁ ନେଇ ଅସନ୍ତୋଷ ପ୍ରକାଶ କରିଛନ୍ତି ଷ୍ଟାର ବ୍ୟାଟର ବିରାଟ। ରୋହିତ ଶର୍ମା ଆଉଟ୍ ହେବା ପରେ କୋହଲି ପଡ଼ିଆକୁ ଆସିବା ସମୟରେ ଦର୍ଶକଙ୍କ ପ୍ରବଳ ଉତ୍ସାହ ଓ ଚିତ୍କାରକୁ ସେ ସହଜରେ ଗ୍ରହଣ କରିପାରିନାହାନ୍ତି।
ମ୍ୟାଚ୍ ଶେଷରେ କୋହଲି କହିଛନ୍ତି ଯେ, “ମୋତେ ଏହା ଆଦୌ ଭଲ ଲାଗୁନାହିଁ। ମୁଁ ପୂର୍ବରୁ ଏମ୍.ଏସ୍ ଧୋନିଙ୍କ କ୍ଷେତ୍ରରେ ମଧ୍ୟ ସମାନ ଘଟଣା ଦେଖିଛି। ମୁଁ ବୁଝିପାରୁଛି ଯେ ଦର୍ଶକମାନେ ଉତ୍ସାହିତ ହୋଇଥାନ୍ତି, କିନ୍ତୁ ଜଣେ ଖେଳାଳି ଆଉଟ୍ ହେବା ପରେ ଏଭଳି ଉତ୍ସବ ମନାଇବା ଠିକ୍ ନୁହେଁ। ଲୋକମାନେ ମୋତେ ଦେଖିବାକୁ ଆସୁଛନ୍ତି, ଏହା ମୋ ପାଇଁ ଏକ ଆଶୀର୍ବାଦ ଏବଂ ସେମାନଙ୍କୁ ଖୁସି ଦେଖିଲେ ମୋତେ ମଧ୍ୟ ଖୁସି ଲାଗେ, କିନ୍ତୁ ମୁଁ କେବଳ ମ୍ୟାଚ୍ ଉପରେ ଧ୍ୟାନ ରଖିବାକୁ ଚେଷ୍ଟା କରେ।”
ସୂଚନାଯୋଗ୍ୟ ଯେ, ଆଇପିଏଲ୍ ସମୟରେ ଚେନ୍ନାଇ ସୁପର କିଙ୍ଗସର ଦର୍ଶକମାନେ ମଧ୍ୟ ଧୋନିଙ୍କୁ ବ୍ୟାଟିଂ ପାଇଁ ଦେଖିବାକୁ ଅନ୍ୟ ଖେଳାଳିଙ୍କ ଆଉଟ୍କୁ ସେଲିବ୍ରେଟ୍ କରିବା ନଜରକୁ ଆସିଥାଏ।
ଏହି ମ୍ୟାଚ୍ରେ କୋହଲି ସଚିନ ତେନ୍ଦୁଲକରଙ୍କୁ ପଛରେ ପକାଇ ଦ୍ରୁତତମ ୨୮,୦୦୦ ଆନ୍ତର୍ଜାତୀୟ ରନ୍ ପୂରଣ କରିଛନ୍ତି। ସେ ମାତ୍ର ୬୨୪ଟି ଇନିଂସରେ ଏହି ମାଇଲଖୁଣ୍ଟ ଛୁଇଁଛନ୍ତି। ତେବେ କୋହଲି ୯୩ ରନ୍ର ଏକ ଦମଦାର ଇନିଂସ ଖେଳିଥିଲେ ମଧ୍ୟ ନିଜର ୮୫ତମ ଆନ୍ତର୍ଜାତୀୟ ଶତକରୁ ବଞ୍ଚିତ ହୋଇଛନ୍ତି।
ନ୍ୟୁଜିଲାଣ୍ଡର ୩୦୦ ରନ୍ର ପିଛା କରି ଭାରତ ୬ ୱିକେଟ୍ ହରାଇ ବିଜୟ ଲକ୍ଷ୍ୟ ହାସଲ କରିଛି। କେ.ଏଲ୍. ରାହୁଲ (ଅପରାଜିତ ୨୯ ରନ୍) ଶେଷ ମୁହୂର୍ତ୍ତରେ ଗୁରୁତ୍ୱପୂର୍ଣ୍ଣ ବ୍ୟାଟିଂ କରି ଦଳକୁ ଜିତାଇଥିଲେ। ଅନ୍ୟମାନଙ୍କ ମଧ୍ୟରେ ଶୁଭମନ ଗିଲ୍ ୫୬ ରନ୍ ଏବଂ ଶ୍ରେୟସ ଆୟର ୪୯ ରନ୍ କରିଥିବା ବେଳେ ନ୍ୟୁଜିଲାଣ୍ଡ ପକ୍ଷରୁ ଡାରିଲ୍ ମିଚେଲ୍ ସର୍ବାଧିକ ୮୪ ରନ୍ ସଂଗ୍ରହ କରିଥିଲେ।
