ଓ୍ବାଶିଂଟନ୍,୨୧।୧: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ବିଶ୍ୱ ଅର୍ଥନୈତିକ ଫୋରମରେ ଯୋଗଦେବା ପାଇଁ ସ୍ବିଜରଲାଣ୍ଡର ଡାଭୋସ ଅଭିମୁଖେ ଯାତ୍ରା କରୁଥିଲେ। କିନ୍ତୁ, ଉଡ଼ାଣ ଆରମ୍ଭ ହେବାର କିଛି ସମୟ ପରେ ତାଙ୍କର ସ୍ବତନ୍ତ୍ର ବିମାନ ଏୟାର ଫୋର୍ସ ୱାନରେ ବୈଦ୍ୟୁତିକ ତ୍ରୁଟି ଦେଖାଦେଇଥିଲା।
ହ୍ବାଇଟ ହାଉସ ଅନୁଯାୟୀ, ସୁରକ୍ଷା ଦୃଷ୍ଟିରୁ, ବିମାନଟିକୁ ତୁରନ୍ତ ମେରିଲ୍ୟାଣ୍ଡର ଜଏଣ୍ଟ ବେସ ଆଣ୍ଡ୍ରୁଜକୁ ଫେରାଇ ଦିଆଯାଇଥିଲା ଯାହାଦ୍ୱାରା ରାଷ୍ଟ୍ରପତି କୌଣସି ବିପଦ ବିନା ଅନ୍ୟ ଏକ ବିମାନରେ ଯାତ୍ରା କରିପାରିବେ। ହ୍ବାଇଟ ହାଉସ ପ୍ରେସ ସଚିବ କାରୋଲିନ ଲେଭିଟ ସ୍ପଷ୍ଟ କରିଛନ୍ତି ଯେ ରାଷ୍ଟ୍ରପତି ଟ୍ରମ୍ପଙ୍କ ଡାଭୋସ ଯାତ୍ରା ବାତିଲ କରାଯାଇ ନାହିଁ। ସେ କହିଛନ୍ତି ଯେ ଯାନ୍ତ୍ରିକ ସମସ୍ୟା ଯୋଗୁ ବିମାନକୁ କେବଳ ପରିବର୍ତ୍ତନ କରାଯାଇଛି ଏବଂ ରାଷ୍ଟ୍ରପତି ନୂତନ ବିମାନରେ ସ୍ବିଜରଲାଣ୍ଡ ଯିବେ।
