ଖୋର୍ଦ୍ଧା,୨୦ା୧(ଖୋର୍ଦ୍ଧା ପାଣିଗ୍ରାହୀ): ଚିଲିକା ଡିଭିଜନ ବନ୍ୟପ୍ରାଣୀ ବିଭାଗ (ବାଲୁଗାଁ) ପକ୍ଷରୁ ସମଗ୍ର ଚିଲିକାରେ ଡଲ୍ଫିନ୍ ଗଣନା ଆରମ୍ଭ ହୋଇଛି। ଚିଲିକାରେ ଦେଖା ଯାଉଥିବା ଇରାଓ୍ବ।ଡି ( Irrawaddy ) ଡଲ୍ଫିନ୍ ଏବଂ ଚିଲିକା-ସମୁଦ୍ର ମୁହାଣରେ ଦେଖା ଦେଉଥିବା ବଟଲ-ନୋଚ ଡଲଫିନ୍ର ଗଣନା କରାଯାଉଛି । ଏଥିପାଇଁ ସାତପଡ଼ା ରେଞ୍ଜରେ ୮ ଟି ଟିମ୍ ଏବଂ ବାଲୁଗାଁ ରେଞ୍ଜ ଇଲାକାରେ ୧୦ଟି ଟିମ୍ ମୋଟ୍ ୧୮ଟି ଟିମ୍ ଗଠନ ହୋଇଛି। ଗଣନା ପାଇଁ ପ୍ରତି ଟିମ୍ରେ ୫ରୁ ୬ ଜଣ ଗଣନାକାରୀଙ୍କ ସହିତ ଗବେଷକ ଓ ରସର୍ଚ୍ଚ ପର୍ସନ ଅଛନ୍ତି। ଏଥିରେ ୧୮ଟି ଡଙ୍ଗା ନିୟୋଜିତ ହୋଇଛି। ଏହି ଗଣନା ପାଇଁ ଶହେରୁ ଉଦ୍ଧର୍ବ ଗଣନାକାରୀ ନିୟୋଜିତ ହୋଇଛନ୍ତି। ଏହି ଗଣନା କାର୍ଯ୍ୟରେ ସିଡିଏର ରିସର୍ଚ୍ଚ ପର୍ସନ ଏବଂ ବନ୍ୟପ୍ରାଣୀ ବିଭାଗର କର୍ମଚାରୀଙ୍କ ସହିତ ବିଭିନ୍ନ ବନ୍ୟପ୍ରାଣୀ ସୁରକ୍ଷା ସଂଗଠନର କର୍ମକର୍ତ୍ତା, ପରିବେଶବିତ୍ ଓ ଗବେଷକ ସାମିଲ ହୋଇଛନ୍ତି ବୋଲି ଚିଲିକା ବନ୍ୟପ୍ରାଣୀ ବିଭାଗର ଡିଏଫ୍ଓ ଅମ୍ଲାନ କୁମାର ନାୟକ ସୂଚନା ଦେଇଛନ୍ତି।
୩ ଦିନ ଧରି ଏହି ଗଣନା କାର୍ଯ୍ୟ କରାଯିବ। ଅର୍ଥାତ ୨୦ , ୨୧ , ୨୨ ତାରିଖ ପର୍ଯ୍ୟନ୍ତ ଏହି ଡଲ୍ଫିନ୍ ଗଣନା କାର୍ଯ୍ୟ କରାଯିବ। ଆଜି ମିଳିତ ଭାବେ ସମସ୍ତ ଗଣନାକାରୀ ଗଣନା କରି ସାରିବା ପରେ ଅବଶିଷ୍ଟ ଦୁଇ ଦିନ କେବଳ ବନ୍ୟପ୍ରାଣୀ ବିଭାଗର କର୍ମଚାରୀମାନେ ପୁନଃ ଗଣନା କରିଲେ। ସକାଳ ୬ଟା ଦିବା ୧୨ଟା ପର୍ଯ୍ୟନ୍ତ ଏହି ଡଲ୍ଫିନ୍ ଗଣନା କରାଯିବ। ଗଣନା ସମୟରେ ଏପରିକି ଡଲ୍ଫିନ୍ ଚଳପ୍ରଚଳ କରୁଥିବା ସ୍ଥାନରେ ଅନ୍ୟାନ୍ୟ ଡଙ୍ଗା ଚଳାଚଳ ଉପରେ ରୋକୋ ଲଗାଇବା ସହିତ ପର୍ଯ୍ୟଟକଙ୍କୁ ପ୍ରଶାସନ ପକ୍ଷରୁ ବାରଣ କରାଯାଇଛି। ପ୍ରତିବର୍ଷ ପରି ଚଳିତ ବର୍ଷ ଚିଲିକାରେ ଡଲ୍ଫିନ୍ ଗଣନା କରୁଛି ଚିଲିକା ଡିଭିଜନ ବନ୍ୟପ୍ରାଣୀ ବିଭାଗ। ଜିପିଆର୍ ଟ୍ରାକ୍ରେ ବାଇନକୁଲାର୍ ଦ୍ୱାରା ଏହି ଗଣନା କରାଯାଉଛି। ଚିଲିକା ଡିଭିଜନ ବନ୍ୟପ୍ରାଣୀ ବିଭାଗ ପକ୍ଷରୁ ସିଡିଏର ସହଯୋଗରେ ଏହି ଇରାଓ୍ବାଡି ଓ ବଟଲ ନୋଜ ପ୍ରଜାତିର ଡଲ୍ଫିନ୍ ଗଣନା କରାଯାଉଛି ବୋଲି ଚିଲିକା ଡିଭିଜନ ବନ୍ୟପ୍ରାଣୀ ବିଭାଗ (ବାଲୁଗାଁ)ର ଡିଏଫ୍ଓ ଅମ୍ଲାନ କୁମାର ନାୟକ କହିଛନ୍ତି। ଚଳିତ ବର୍ଷ ଚିଲିକାରେ ଡଲ୍ଫିନଙ୍କ ସଂଖ୍ୟା କେତେ ଅଛି ତାହାର ହିସାବ କରାଯାଉଛି।
୨୦୨୧ରେ ଚିଲିକାରେ ୧୬୨ଟି ଇରାଓ୍ବାଡି ଡଲ୍ଫିନ୍ ଏବଂ ୨୬ଟି ବଟଲ-ନୋଜ ଡଲ୍ଫିନ ଥିବା ଚିହ୍ନଟ ହୋଇଥିଲା।
୨୦୨୨ରେ ଚିଲିକାରେ ୧୫୧ଟି ଇରାଓ୍ବାଡି ଡଲ୍ଫିନ୍ ଏବଂ ୧୬ଟି ବଟଲ-ନୋଜ ଡଲ୍ଫିନ୍ ଥିବା ଚିହ୍ନଟ ହୋଇଥିଲା।
୨୦୨୩ରେ ଚିଲିକାରେ ୧୫୪ଟି ଇରାଓ୍ବାଡି ଡଲ୍ଫିନ୍ ଏବଂ ୧୯ଟି ବଟଲ ନୋଜ ପ୍ରଜାତିର ଡଲ୍ଫିନ୍ ଥିବା ଚିହ୍ନଟ ହୋଇଥିଲା।
୨୦୨୪ରେ ଚିଲିକାରେ ୧୫୫ଟି ଇରାଓ୍ବାଡି ଡଲ୍ଫିନ୍ ଏବଂ ୧୯ଟି ବଟଲ ନୋଜ ପ୍ରଜାତିର ଡଲ୍ଫିନ୍ ଥିବା ଚିହ୍ନଟ ହୋଇଥିଲା।
