ଭୁବନେଶ୍ୱର,୧୫।୬ (ରବିନାରାୟଣ ଜେନା): ଭୁବନେଶ୍ୱର ମହାନଗର ନିଗମ(ବିଏମ୍ସି)କୁ ୨୦୩୦ ସୁଦ୍ଧା ଜଳାତଙ୍କ ମୁକ୍ତ କରିବା ପାଇଁ ଜୋରଦାର ଉଦ୍ୟମ ଚାଲିଛି। ଇତିମଧ୍ୟରେ ବିଏମ୍ସି ପକ୍ଷରୁ ୭୫ ପ୍ରତିଶତ ବୁଲା କୁକୁରଙ୍କୁ ଟିକାକରଣ କରାଯାଇଥିବା କୁହାଯାଉଛି। ଏପରି କି ଏହି ତଥ୍ୟକୁ ଆଧାର କରି ବିଏମ୍ସି ମେ’ ୨୮ରେ ଜାତୀୟସ୍ତରରେ ମଧ୍ୟ ପୁରସ୍କୃତ ହୋଇଛି। ହେଲେ ବାସ୍ତବ ସ୍ଥିତି କିନ୍ତୁ ଭିନ୍ନ କଥା କହୁଛି। ବିଏମ୍ସି ଅଞ୍ଚଳରେ ଦିନକୁ ଦିନ କୁକୁର କାମୁଡା ବଢ଼ି ଚାଲିଛି। ସାଧାରଣ ଲୋକଙ୍କଠାରୁ ଆରମ୍ଭ କରି ବରିଷ୍ଠ ଅଧିକାରୀମାନେ ମଧ୍ୟ କୁକୁର କାମୁଡ଼ାର ଶିକାର ହେଉଥିବା ଜଣାଯାଇଛି।
ଏହି ପରିପ୍ରେକ୍ଷୀରେ କ୍ୟାପିଟାଲ ହସ୍ପିଟାଲରୁ ବିଶ୍ୱସ୍ତ ସୂତ୍ରରୁ ମିଳିଥିବା ତଥ୍ୟ ଅନୁଯାୟୀ, ଏପ୍ରିଲ ଏବଂ ମେ’ ମାସରେ ପ୍ରାୟ ୮ହଜାର ବ୍ୟକ୍ତି କେବଳ କୁକୁର କାମୁଡ଼ା ପାଇଁ ଟିକା ନେଇ ସାରିଛନ୍ତି। ଏହି ହାରରେ ଯଦି ଦେଖାଯାଏ ପ୍ରତିଦିନ ୧୩୦ରୁ ୧୪୦ ବ୍ୟକ୍ତି କେବଳ କୁକୁର କାମୁଡ଼ାର ଶିକାର ହୋଇ କ୍ୟାପିଟାଲ ହସ୍ପିଟାଲ ଆସୁଛନ୍ତି। ରାଜଧାନୀର ଯଦି ବିଏମ୍ସି ହସ୍ପିଟାଲ, ଆୟୁଷ୍ମାନ ମନ୍ଦିର, ସହରାଞ୍ଚଳ ପ୍ରାଥମିକ ସ୍ବାସ୍ଥ୍ୟକେନ୍ଦ୍ର ଏବଂ ଅନ୍ୟାନ୍ୟ ହସ୍ପିଟାଲର କୁକୁର କାମୁଡ଼ା ଅଙ୍କ ମିଶାଯାଏ ତେବେ ଏହି ସଂଖ୍ୟା ଢେର ଗୁଣରେ ଅଧିକ ହେବ ବୋଲି ଜଣାଯାଇଛି। ଏ ସଂକ୍ରାନ୍ତରେ ‘ଧରିତ୍ରୀ’ ପକ୍ଷରୁ ହୋଇଥିବା ଅନୁସନ୍ଧାନରୁ ଜଣାଯାଇଛି, କ୍ୟାପିଟାଲ ହସ୍ପିଟାଲକୁ ଚଳିତବର୍ଷ ଏପ୍ରିଲରେ ୪ହଜାର ୧୧୬ଜଣ ବ୍ୟକ୍ତି କେବଳ କୁକୁର କାମୁଡ଼ା ପାଇଁ ଟିକା ନେବାକୁ ଆସିଛନ୍ତି। ପ୍ରତିଦିନ ୧୩୦ରୁ ୧୪୦ ବ୍ୟକ୍ତି ଟିକା ପାଇଁ ଆସୁଥିବାବେଳେ ଦିନେ ଦିନେ ୧୬୪ଜଣ ବ୍ୟକ୍ତି ମଧ୍ୟ ଟିକା ନେଇଛନ୍ତି। ସେହିପରି ମେ’ରେ ଅପେକ୍ଷାକୃତ କୁକୁର କାମୁଡ଼ା କମ୍ ରହିଥିଲେ ହେଁ ୩ ହଜାର ୭୬୯ଜଣ ବ୍ୟକ୍ତି ଟିକା ନେଇଛନ୍ତି। ଏଥିଯୋଗୁ କ୍ୟାପିଟାଲ ହସ୍ପିଟାଲ ଉପରେ ଚାପ ପଡୁଛି। ଅନେକ ସମୟରେ ରୋଗୀଙ୍କୁ ଟିକା ନେବା ପାଇଁ ଘଣ୍ଟା ଘଣ୍ଟା ଧରି ଅପେକ୍ଷା କରିବାକୁ ପଡୁଥିବା ଅଭିଯୋଗ ହୋଇଛି। ଗୋଟିଏ ପଟେ ବିଏମ୍ସି ଟିକାକରଣକୁ ନେଇ ଜାତୀୟସ୍ତରରେ ପ୍ରଶଂସିତ ହେଉଥିବାବେଳେ ବିଏମ୍ସି ଅଞ୍ଚଳରେ କୁକୁର କାମୁଡ଼ାକୁ ନେଇ ଲୋକେ ଆତଙ୍କିତ ଥିବା ଜଣାଯାଇଛି।
ଏ ସଂକ୍ରାନ୍ତରେ ବିଏମ୍ସିର ଡାକ୍ତର ଦେବୀ ରଞ୍ଜନ କୁଣ୍ଡୁଙ୍କ କହିବା କଥା ହେଲା, ରାଜଧାନୀରେ ଭୁବନେଶ୍ୱର ସମେତ ବିଭିନ୍ନ ଜିଲା ତଥା ରାଜ୍ୟର ଲୋକେ ରହୁଛନ୍ତି। ସେମାନଙ୍କ ଅଞ୍ଚଳରେ ଟିକା ନେବାରେ ସମସ୍ୟା ଥିଲେ ଭୁବନେଶ୍ୱରକୁ ଆସି ଟିକା ନେଇଥାନ୍ତି। ତେବେ କୁକୁର କାମୁଡ଼ା ଟିକା ନେଉଥିବା ବ୍ୟକ୍ତିଙ୍କ ଠିକଣାକୁ ବର୍ଗୀକରଣ କରିବାକୁ ହସ୍ପିଟାଲ କର୍ତ୍ତୃପକ୍ଷଙ୍କୁ ପୂର୍ବରୁ ଚିଠି ଲେଖିଥିଲୁ। ଯଦି ଏଭଳି କିଛି ଗୁରୁତର ତଥ୍ୟ ସାମ୍ନାକୁ ଆସିଛି ତେବେ ପୁନର୍ବାର କ୍ୟାପିଟାଲ ହସ୍ପିଟାଲ ଏବଂ ଅନ୍ୟାନ୍ୟ ହସ୍ପିଟାଲ କର୍ତ୍ତୃପକ୍ଷଙ୍କୁ ଅବଗତ କରାଯିବ ଏବଂ ଟିକା ନେଉଥିବା ବ୍ୟକ୍ତିଙ୍କ ବର୍ଗୀକରଣ କରାଯିବ।
ଭୁବନେଶ୍ୱରକୁ ଯଦି କେହି ଟିକା ନେବାପାଇଁ ଗ୍ରାମାଞ୍ଚଳରୁ ଆସୁଛନ୍ତି ତେବେ ସମସ୍ୟା କେଉଁଠି ରହିଲା ବୋଲି ପ୍ରଶ୍ନର ଉତ୍ତରରେ ସେ କହିଛନ୍ତି, ବିଏମ୍ସିକୁ ୨୦୩୦ ସୁଦ୍ଧା ଜଳାତଙ୍କ ମୁକ୍ତ କରିବାକୁ ଲକ୍ଷ୍ୟ ରହିଛି। ଏହାକୁ ନେଇ ଅଦ୍ୟାବଧି ୬୭ ୱାର୍ଡରୁ ୩୫ ହଜାର ୩୯୫ ଗୋଟି ବୁଲା କୁକୁରଙ୍କୁ ଟିକାକରଣ କରାଯାଇଛି। ବିଏମ୍ସିର କେଉଁ ଓ୍ବାର୍ଡର ବୋଲି ଜଣାପଡ଼ିଲେ ସେଦିଗରେ ଆମେ ପଦକ୍ଷେପ ନେଇପାରିବୁ ବୋଲି ଡାକ୍ତର କୁଣ୍ଡୁ କହିଥିଲେ।
