ପୁରୀ ଅଫିସ,୨୫।୭: ଚୂନରା ସେବାୟତ ପ୍ରତିଦିନ ଜୀବନକୁ ବାଜି ଲଗାଇ ଶ୍ରୀମନ୍ଦିର ଉପରକୁ ଚଢ଼ି ବାନା ଲଗାଇଥାନ୍ତି। ସେହିପରି ରତ୍ନବେଦି ଉପରକୁ ପ୍ରାୟ ୪୦ ଫୁଟ୍ ଉପରେ ଚାନ୍ଦୁଆ ବାନ୍ଧିବା କାର୍ଯ୍ୟଠାରୁ ଆରମ୍ଭ କରି ଗରୁଡ଼ସ୍ତମ୍ଭ ଓ ଅରୁଣସ୍ତମ୍ଭର ସ୍ନାନ ନୀତି ମଧ୍ୟ ସମ୍ପାଦନ କରିଥାନ୍ତି। ଏହାସତ୍ତ୍ୱେ ଶ୍ରୀମନ୍ଦିର ପ୍ରଶାସନ ତରଫରୁ ଏମାନଙ୍କ ପାଇଁ ଜୀବନ ବୀମା ଯୋଗାଇ ଦିଆଯାଇନାହିଁ। ଅନ୍ୟ ସେବାୟତଙ୍କ ଭଳି ଚୂନରା ସେବାୟତଙ୍କର କେବଳ ସ୍ବାସ୍ଥ୍ୟ ବୀମା ରହିଛି। ପ୍ରଭୁ ସେବାରେ ନିଜକୁ ସମର୍ପି ଦେଇଥିବା ଏହି ସେବାୟତମାନେ କେବେହେଲେ ଏଥିପାଇଁ ଦାବି ରଖି ନ ଥିଲେ ମଧ୍ୟ ଶ୍ରୀମନ୍ଦିର ପ୍ରଶାସନ ସେମାନଙ୍କ ଜୀବନ ସୁରକ୍ଷା ପାଇଁ ବ୍ୟବସ୍ଥା କରିବାର ଆବଶ୍ୟକତା ରହିଛି।
ଏ ସମ୍ପର୍କରେ ଚୂନରା ସେବାୟତ ନିଯୋଗ ସମ୍ପାଦକ କୃଷ୍ଣମୋହନ ମହାପାତ୍ର କହିଛନ୍ତି, ଚୂନରା ସେବକ ଭାବେ ଶ୍ରୀମନ୍ଦିରରେ ଚୂନ ଲଗାଇବା ହେଉଛି ଆମର ପ୍ରମୁଖ କାମ। ଏବେ ଭାରତୀୟ ପ୍ରନତ୍ତତ୍ତ୍ବ ବିଭାଗ ଏହି କାର୍ଯ୍ୟ ସମ୍ପାଦନ କରୁଛି। ତେଣୁ ଶ୍ରୀମନ୍ଦିର ଉପରକୁ ମହାଦୀପ ଉଠିବା, ବାନା ଲାଗିବା, ଅରୁଣସ୍ତମ୍ଭ ଓ ଗରୁଡ଼ସ୍ତମ୍ଭ ଉପରେ ଚଢ଼ିବା କାର୍ଯ୍ୟ କରିଥାଉ। ଉଚ୍ଚ ନୀଳଚକ୍ର ପାଖରେ ପହଞ୍ଚତ୍ ବାନା ଲଗାଇବାବେଳେ ଶ୍ରୀମନ୍ଦିରରେ ପଥର ଉପରେ ପାଦ ରଖି ରଖି ଚୂନରାମାନେ ମୁଣ୍ଡି ପର୍ଯ୍ୟନ୍ତ ଚଢ଼ନ୍ତି। ଏଭଳି କାର୍ଯ୍ୟ କରିବା ଖଣ୍ଡା ଧାରରେ ଚାଲିବା ସହ ସମାନ। ତଥାପି ଜୀବନ ବୀମା ନେଇ କୌଣସି ଆଶା ରଖିନାହୁଁ। ମହାପ୍ରଭୁଙ୍କ କାର୍ଯ୍ୟ ସମ୍ପାଦନ କରିବାବେଳେ ମହାପ୍ରଭୁ ହିଁ ଆମକୁ ସାହା। ଆଜି ପର୍ଯ୍ୟନ୍ତ କୌଣସି ବିଶେଷ ଦୁର୍ଘଟଣା ହୋଇନାହିଁ। ୨୦୧୪ରେ ରନତ୍ବେଦି ଉପରେ ଚାନ୍ଦୁଆ ବାନ୍ଧିବାବେଳେ ବିଶ୍ୱଜିତ ମହାପାତ୍ର ଦୁର୍ଘଟଣାର ସମ୍ମୁଖୀନ ହୋଇ ଆହତ ହୋଇଥିଲେ। ସମସ୍ତ ଚିକିତ୍ସା ଖର୍ଚ୍ଚ ବ୍ୟକ୍ତିଗତ ଭାବେ ବିଶ୍ୱଜିତଙ୍କ ପରିବାର ବହନ କରିଥିଲେ। ସେହିଭଳି ୨୦୧୨ରେ ମଧ୍ୟ ଶ୍ରୀମନ୍ଦିର ଉପରକୁ ଚଢ଼ିବାବେଳେ ଏଭଳି କିଛି ବିଶେଷ ଦୁର୍ଘଟଣା ଘଟିଥିଲେ ମଧ୍ୟ ମୋର ମନେ ପଡ଼ୁନାହିଁ। ଦୁର୍ଘଟଣା ହେବା ପୂର୍ବରୁ ଜୀବନ ବୀମା କରାଯିବା ଉଚିତ। ତେବେ ଏଥିପାଇଁ ଦାବି ନୁହେଁ, ବରଂ ନିବେଦନ କରିପାରିବୁ। ଏହା ହେଲେ ଭଲ ହୁଅନ୍ତା ବୋଲି ସେ କହିଛନ୍ତି। ସେହିଭଳି ଚୂନରା ସେବାୟତ ନୃସିଂହ ମହାପାତ୍ର କହିଛନ୍ତି, ସବୁ ସେବାୟତଙ୍କୁ ସମାନ ସ୍ବାସ୍ଥ୍ୟ ବୀମା ଅନ୍ତର୍ଗତ କରାଯାଇଛି। ଜୀବନ ବୀମା ରହିବା ଉଚିତ। ଏକଥା ସତ ଯେ ପ୍ରଶାସନ ପାଖରେ ଆମେ ଦୃଢ଼ ଭାବେ ଏକଥା ରଖିବାକୁ ପସନ୍ଦ କରିବୁ ନାହିଁ। ଏହାର ସବୁଠାରୁ ବଡ଼ କାରଣ ହେଉଛି, ଆମେ ଅତି ଭକ୍ତିପୂର୍ଣ୍ଣ ମନୋଭାବ ନେଇ ସେବା କରୁଛୁ। ଏସବୁ ଭିତରେ ଜୀବନକୁ ପାଣି ଛଡ଼େଇ ସାରିଛୁ। ମହାପ୍ରଭୁଙ୍କ ସେବା ଆଗରେ ଜୀବନର ସୁରକ୍ଷା ପାଇଁ ଯୁକ୍ତି କରିବା ଠିକ୍ ହେବ ନାହିଁ। ମହାପ୍ରଭୁଙ୍କ ସେବା ଆମ ପ୍ରାଥମିକତା। ଅନ୍ୟପକ୍ଷରେ ଶ୍ରୀମନ୍ଦିର ନୀତି ପ୍ରଶାସକ ଜିତେନ୍ଦ୍ର କୁମାର ସାହୁ ଏହି ପ୍ରସଙ୍ଗରେ ଉତ୍ତର ରଖି କହିଛନ୍ତି, ସ୍ବାସ୍ଥ୍ୟବୀମା ସମେତ ୫ଲକ୍ଷ ଟଙ୍କା ପର୍ଯ୍ୟନ୍ତ ଦୁର୍ଘଟଣା ସହାୟତା ରାଶି ମଧ୍ୟ ରହିଛି। ଚୂନରା ସେବାୟତଙ୍କ ଜୀବନ ବୀମାର ଆବଶ୍ୟକତାକୁ ନେଇ ଆଗାମୀ ଦିନରେ ସମୀକ୍ଷା କରାଯିବ ବୋଲି ସେ କହିଛନ୍ତି।
