ତିହିଡି଼,୨୨।୮(ସଞ୍ଜିତ ବଳ):ଭଦ୍ରକ ଜିଲା ତିହିଡି଼ ଥାନା ଭାଟପ ପଞ୍ଚାୟତ ଅଧୀନ ବଉଳପାଳ ଗ୍ରାମର ମାୟାଧର ତ୍ରିପାଠୀ (୬୫)ନାମକ ଜଣେ ବୃଦ୍ଧଙ୍କ ତ୍ରୁଟିପୂର୍ଣ୍ଣ ଚିକିତ୍ସା ପାଇଁ ମୃତ୍ୟୁ ଘଟିଥିବା ଅଭିଯୋଗ ହୋଇଛି l ମୃତ ବୃଦ୍ଧଙ୍କ ପରିବାର ଲୋକେ ଏହି ଅଭିଯୋଗ କରିବା ସହ ମୃତଦେହକୁ ଭଦ୍ରକ-ଚାନ୍ଦବାଲି ମୁଖ୍ୟ ରାସ୍ତାରେ ରଖି ଏହାର ପ୍ରତିବାଦ ଜଣାଇଛନ୍ତି l ତେବେ ଚିକିତ୍ସା ଦାୟିତ୍ୱରେ ଥିବା ଡାକ୍ତର ବୃଦ୍ଧଙ୍କ ମୃତ୍ୟୁ ପରେ ତାଙ୍କୁ ଭଦ୍ରକ ଜିଲା ମୁଖ୍ୟ ଚିକିତ୍ସାଳୟକୁ ରେଫର କରିଥିବା ତାଙ୍କ ପରିବାର ପକ୍ଷରୁ ଅଭିଯୋଗ କରାଯିବା ସହ ତ୍ରୁଟିପୂର୍ଣ୍ଣ ଚିକିତ୍ସା କରିଥିବା ଡାକ୍ତରଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ପାଇଁ ଦାବି କରିଛନ୍ତି l
ଘଟଣାରୁ ପ୍ରକାଶ ଯେ, ଶନିବାର ଭୋର ସମୟରେ ବଉଳପାଳ ଗ୍ରାମର ମାୟାଧର ଛାତିରେ ଯନ୍ତ୍ରଣା ଅନୁଭବ କରିବାରୁ ତାଙ୍କୁ ଚିକିତ୍ସା ପାଇଁ ତିହିଡି଼ ଡାକ୍ତରଖାନାରେ ଭର୍ତ୍ତି କରାଯାଇଥିଲା। ମାତ୍ର ପୂର୍ବାହ୍ନ ୧୧ଟା ସମୟରେ ମାୟାଧରଙ୍କ ମୃତ୍ୟୁ ଘଟିବାରୁ ତାଙ୍କ ପରିବାର ଲୋକଙ୍କର ଚିକିତ୍ସା ନେଇ ସନ୍ଦେହ ଉପୁଜିଥିଲା l ସେମାନେ ଡାକ୍ତରଙ୍କୁ ଭେଟିକି ଔଷଧ ଓ ଇଞ୍ଜେକ୍ସନ ଦେଇଛ ବୋଲି ପଚାରିବାରୁ ଡାକ୍ତର ପ୍ରେସକ୍ରିପସନକୁ ଫିଙ୍ଗି ଦେଇଥିବା ଏବଂ ସେମାନେ ଡଷ୍ଟବିନରୁ ଏହାକୁ ଉଦ୍ଧାର କରିଥିବା ତାଙ୍କ ପରିବାର ପକ୍ଷରୁ କୁହାଯାଇଛିl
ଏହି ଘଟଣାକୁ ନେଇ ମାୟାଧରଙ୍କ ପରିବାର ସଦସ୍ୟ ଏବଂ ଗ୍ରାମବାସୀଙ୍କ ମଧ୍ୟରେ ଉତ୍ତେଜନା ପ୍ରକାଶ ପାଇଥିଲା ଏବଂ ସେମାନେ ପାଟିତୁଣ୍ଡ କରିଥିଲେ l ଖବର ପାଇ ତିହିଡି଼ ଥାନା ଏସଆଇ ପ୍ରକାଶ ନାୟକ, ଏଏସଆଇ ଲଷ୍ମଣ ମାରାଣ୍ଡି ଘଟଣାସ୍ଥଳରେ ପହଞ୍ଚି ଉତ୍ତ୍ୟକ୍ତ ଲୋକଙ୍କୁ ବୁଝାଶୁଝା କରିଥିଲେ। ପରେ ଭାଟପ ସରପଞ୍ଚ ଶୁଭ୍ରନାରାୟଣ ସେଠୀ ସ୍ବାସ୍ଥ୍ୟକେନ୍ଦ୍ରରେ ପହଞ୍ଚି ଘଟଣାର ଅନୁଧ୍ୟାନ କରୁଥିବା ଜଣାଯାଇଛି l ତେବେ ବୃଦ୍ଧଙ୍କ ଚିକିତ୍ସା କରିଥିବା ଡାକ୍ତର ଫେରାର ହୋଇଯାଇଥିବା ଜଣାଯାଇଛି l