ଭୁବନେଶ୍ୱର,୨୪ା୮(ବ୍ୟୁରୋ): ଓଡ଼ିଶା ପ୍ରଦେଶ କଂଗ୍ରେସ କମିଟି(ପିସିସି) ସଭାପତି ପରିବର୍ତ୍ତନ ନେଇ ଚର୍ଚ୍ଚା ଜୋର ଧରିଛି। ଯଦିଓ ସୋମବାର ନୂଆଦିଲ୍ଲୀରେ ବସିବାକୁ ଥିବା ସିଡବ୍ଲ୍ୟୁସି ବୈଠକରେ ଏନେଇ ଆଲୋଚନା ହୋଇ ନ ପାରେ ବୋଲି ଜଣାଅଛି, ତଥାପି ଓଡିଶା ପ୍ରସଙ୍ଗ ଉଠୁ ବୋଲି ରାଜ୍ୟସ୍ତରରେ ପରୋକ୍ଷରେ ମତ ପ୍ରକାଶ ପାଉଛି। ଅନ୍ୟପଟେ ବିଧାୟକ ତାରା ପ୍ରସାଦ ବାହିନୀପତି ପିସିସି ସଭାପତି ପଦ ମିଳିଲେ ଛାଡିବେ ନାହିଁ ବୋଲି କହିଛନ୍ତି। ରବିବାର ତାରାଙ୍କ ଘରେ ଦୁଇ ବିଧାୟକଙ୍କ ସମେତ, ଆଉ ୩ ଜଣ ନେତା ଏକାଠି ବସିଥିଲେ। ସେମାନଙ୍କ ଏକାଠିକୁ ନେଇ ସଭାପତି ପରିବର୍ତ୍ତନ ଲାଗି ଆଲୋଚନା ହେଉଥିବା ଚର୍ଚ୍ଚା ହେଉଛି।
ସୂଚନାନୁସାରେ, ସିଡବ୍ଲ୍ୟୁସି ବୈଠକରେ କରୋନାର ସାମ୍ପ୍ରତିକ ସ୍ଥିତି, ଦେଶର ଅର୍ଥନୀତି, ଦଳର ସାଙ୍ଗଠନିକ ସ୍ଥିତି ବିଷୟରେ ଆଲୋଚନା ହେବାକୁ ରହିଛି। ପିସିସି ସଭାପତି କଥାକୁ ଅଧିକ ଗୁରୁତ୍ୱ ଦିଆଯିବ ବୋଲି ବରିଷ୍ଠ ନେତା ରାମଚନ୍ଦ୍ର ଖୁଣ୍ଟିଆ କହିଛନ୍ତି। ରାଜ୍ୟସ୍ତରରେ କିନ୍ତୁ ସିଡବ୍ଲ୍ୟୁସି ବୈଠକ ଆଳରେ ସଭାପତି ପରିବର୍ତ୍ତନ କଥା ଜୋର ଧରିବାରେ ଲାଗିଛି। ଦୀର୍ଘଦିନରୁ ରାଜ୍ୟ କଂଗ୍ରେସରେ ସଭାପତି ପରିବର୍ତ୍ତନ କଥା ଉଠୁଥିବା ବେଳେ କୌଣସି ସମୟରେ ଏହା କରାଯାଇପାରେ ବୋଲି ଚର୍ଚ୍ଚା ହେଉଛି। ପୂର୍ବତନ ପିସିସି ସଭାପତି ଜୟଦେବ ଜେନା କହିଛନ୍ତି, ପିସିସି ସଭାପତି ପରିବର୍ତ୍ତନ ଲାଗି ସମସ୍ତେ ଚାହୁଁଛନ୍ତି। ଦଳ ଭିତରେ କାହାରି ସହଯୋଗ ରହୁନାହିଁ।
ସେହିପରି ବରିଷ୍ଠ ନେତା ଶରତ ରାଉତ କହିଛନ୍ତି, ପୂର୍ବତନ ମୁଖ୍ୟମନ୍ତ୍ରୀ ସ୍ବର୍ଗତ ଜାନକୀ ବଲ୍ଲଭ ପଟ୍ଟନାୟକଙ୍କ ସ୍ଥାନ ନେବା ଭଳି କେହି ନେତା ଆଉ ନାହାନ୍ତି। ନିର୍ବାଚନ ଫଳ ଘୋଷଣା ହେବା ପରେ ପିସିସି ସଭାପତି ନିଜ ତରଫରୁ ଇସ୍ତଫା ଦେଇସାରିଛନ୍ତି। ତାଙ୍କ ସ୍ଥାନରେ କେବଳ ଜଣଙ୍କୁ ଦାୟିତ୍ୱ ନ ମିଳିବା ପର୍ଯ୍ୟନ୍ତ ସେ ସେହି ସ୍ଥାନରେ ରହିବେ।
ଅନ୍ୟପକ୍ଷରେ ନିରଞ୍ଜନଙ୍କୁ ପିସିସି ସଭାପତି କରାଇବାକୁ ସେତେବେଳେ ଦାବି କରି ଆସୁଥିବା କେତେଜଣ ନେତା ବର୍ତ୍ତମାନ ତାଙ୍କ ବିରୋଧରେ ଲାଗି ପଡିଛନ୍ତି। ସେହିପରି ଜୟପୁର ବିଧାୟକ ତାରା ବାହିନୀପତି ଯଦି ସଭାପତି ଦାୟିତ୍ୱ ମିଳେ ଛାଡିବେ ନାହିଁ ବୋଲି କହିଛନ୍ତି। ସେ କହିଛନ୍ତି, କନଷ୍ଟେବଳ ନମ୍ବର ଓ୍ବାନ ଥିଲି, ବିଧାୟକ ନମ୍ବର ଓ୍ବାନ ହେଲି, ସେହିପରି ସଭାପତି ପଦ ମିଳିଲେ ମଧ୍ୟ ସେହି ଫଳ ଆସିବ। ଲବି କରୁ ନାହିଁ କିନ୍ତୁ ମିଳିଲେ ଛାଡିବିନି। ଏଭଳି ସ୍ଥିତିରେ ମୋହନା ବିଧାୟକ ଏବଂ ସାନଖେମୁଣ୍ଡି ବିଧାୟକ ଉଭୟ ତାରା ସଭାପତି ପ୍ରସଙ୍ଗକୁ ସ୍ବାଗତ କରିଛନ୍ତି। ସାନଖେମୁଣ୍ଡି ବିଧାୟକ ରମେଶ ଜେନା କହିଛନ୍ତି, ତାରା ସଭାପତି ହେଲେ ବିଧାୟକଙ୍କ ସଂଖ୍ୟା ୯ରୁ ୯୦ ହୋଇଯିବ।
ପିସିସି ସଭାପତି ନିରଞ୍ଜନ ପଟ୍ଟନାୟକ କହିଛନ୍ତି, ସିଡବ୍ଲ୍ୟୁସି ବୈଠକରେ ପିସିସି ସଭାପତି ପରିବର୍ତ୍ତନ କଥା ପଡିବନାହିଁ। ସଭାପତି ପରିବର୍ତ୍ତନ ଏଆଇସିସି ଅଧ୍ୟକ୍ଷ ଯେବେ ଚାହିଁବେ ସେବେ ହେବ। ୨ରୁ ୩ ବର୍ଷରେ ଥରେ ସଭାପତି ପରିବର୍ତ୍ତନ ହୋଇଥାଏ, ସେହି ଅନୁସାରେ ହେବ। ସେଥିଲାଗି ସେ ବ୍ୟସ୍ତ, ବିବ୍ରତ ନୁହନ୍ତି ବୋଲି କହିଛନ୍ତି।
