ଅମରପାଲି,୩ା୬(ଡି.ଏନ.ଏ.): ସୁବର୍ଣ୍ଣପୁର ଜିଲା ବୀରମହାରାଜପୁର ବ୍ଲକ ଅନ୍ତର୍ଗତ ଖଣ୍ଡହତା ଗ୍ରାମପଞ୍ଚାୟତର ରାମ୍ଭିପାଲି ଗ୍ରାମରେ ଥିବା ଅଙ୍ଗନୱାଡି କେନ୍ଦ୍ରରେ ଦୀର୍ଘ ଦେଢ଼ବର୍ଷ ହେଲା ତାଲା ପଡିଛି l କେନ୍ଦ୍ରର ବିଭିନ୍ନ ସମସ୍ୟାକୁ ନେଇ କେନ୍ଦ୍ରରେ ଗ୍ରାମର କେତେକ ମହିଳା ତାଲା ପକାଇ ଦେଇଛନ୍ତି। ଫଳରେ ଛାତ୍ରୀଛାତ୍ର ପାଠପଢାରୁ ବଞ୍ଚିତ ହେଉଛନ୍ତି। ଏନେଇ ପୂର୍ବରୁ ଅନେକ ଥର ସମସ୍ୟାର ସମାଧାନ ପାଇଁ ଚେଷ୍ଟା କରାଯାଇଥିଲେ ମଧ୍ୟ କୌଣସି ସୁଫଳ ମିଳିନାହିଁ। ନିକଟରେ ସିଡିପିଓ ଜ୍ୟୋତ୍ସାମୟୀ ପଣ୍ଡା ଓ ସୁପରଭାଇଜର ସୌମ୍ୟସିମା ସାହୁ ଉକ୍ତ ଗ୍ରାମରେ ପହଞ୍ଚି ଗ୍ରାମବାସୀ ଓ ମହିଳାମାନଙ୍କ ସହ ଏନେଇ ଆଲୋଚନା କରିଥିଲେ l ଆଲୋଚନା ବେଳେ ଗ୍ରାମରେ ଥିବା ୪୬ ପରିବାର ମଧ୍ୟରୁ ଗର୍ଭବତୀ ମହିଳା ଓ ଶିଶୁଙ୍କୁ ପୃଷ୍ଟିକର ଖାଦ୍ୟ ଓ ସରକାରୀ ସ୍ବାସ୍ଥ୍ୟ ସେବା ସୁବିଧା ମିଳୁ ନ ଥିବା ଗ୍ରାମବାସୀ ପ୍ରକାଶ କରିଥିଲେ । ପରେ ସିଡିପିଓ କାର୍ଯ୍ୟରତ ଅଙ୍ଗନବାଡି କର୍ମୀଙ୍କୁ ଡକାଇ ସତ୍ୟାସତ୍ୟ ଜାଣିବାକୁ ଚାହିଁଥିଲେ l ଉକ୍ତ ଅଙ୍ଗନବାଡି କର୍ମୀ ବିଭିନ୍ନ ଦୁର୍ନୀତିରେ ଲିପ୍ତ ରହିଥିବା ବେଳେ ରନ୍ଧନ ଖାଦ୍ୟ, ଛତୁଆ ଓ ଅଣ୍ଡା ସଠିକ ଭାବରେ ଦେଉ ନ ଥିବା ଗ୍ରାମବାସୀ ଅଭିଯୋଗ କରିଥିଲେ l ଅଙ୍ଗନୱାଡି କର୍ମୀଙ୍କୁ କାର୍ଯ୍ୟରୁ ଅନ୍ତର କରା ନ ଗଲେ ତାଲା ଖୋଲାଯିବ ନାହିଁ ବୋଲି ଅଡି ବସିଥିଲେ ା l ମାତ୍ର ଅଙ୍ଗନୱାଡି କର୍ମୀ ବିଳାସିନୀ ବିଶ୍ବାଳ ଏହାକୁ ଖଣ୍ଡନ କରିଥିଲେ। ଏହା ଉଦ୍ଦେଶ୍ୟମୂଳକ ଅଭିଯୋଗ ବୋଲି ସେ ପ୍ରକାଶ କରିଛନ୍ତି। ରାମ୍ଭିପାଲି ଗ୍ରାମରେ ଗୋଟିଏ ଅଙ୍ଗନୱାଡି କେନ୍ଦ୍ର ରହିଛି। ଦୀର୍ଘଦିନ ହେଲା ଗ୍ରାମର ବିଳାସିନୀ ବିଶ୍ବାଳ ଉକ୍ତ କେନ୍ଦ୍ରର ଅଙ୍ଗନୱାଡି କର୍ମୀ ଭାବେ କାର୍ଯ୍ୟ କରି ଆସୁଛନ୍ତି। ଗତ ପଞ୍ଚାୟତ ନିର୍ବାଚନରେ ଗ୍ରାମର ସବିତା ବିଶ୍ବାଳ ୱାର୍ଡସଭ୍ୟା ଭାବେ ନିର୍ବାଚିତ ହେଲେ। ନିର୍ବାଚିତ ହେବା ପରେ ଉକ୍ତ ଅଙ୍ଗନୱାଡି କେନ୍ଦ୍ରର ଜଏଣ୍ଟ ପାସବୁକ ୱାର୍ଡ ସଭ୍ୟା ଓ ଅଙ୍ଗନୱାଡି କର୍ମୀଙ୍କ ନାମରେ ଯୁଗ୍ମ ଭାବେ ଖୋଲିବା କଥା। କୌଣସି କାରଣକୁ ନେଇ ଅଙ୍ଗନୱାଡି କର୍ମୀ ୱାର୍ଡ ସଭ୍ୟାଙ୍କ ସହିତ ପାସବୁକ ଖୋଲି ନ ଥିଲେ। ଅଙ୍ଗନୱାଡି କର୍ମୀ ଜଣକ ଖଣ୍ଡହତା ପଞ୍ଚାୟତର ସରପଞ୍ଚ ଜୟଶ୍ରୀ ଦେହୁରୀଙ୍କ ସହିତ ମିଳିତ ଭାବେ ପାସବୁକ ଖୋଲିଥିଲେ। ଗ୍ରାମରେ ୱାର୍ଡ ସଭ୍ୟା ଥିଲେ ମଧ୍ୟ ତାଙ୍କୁ ଉପେକ୍ଷା କରି କାହିଁକି ସରପଞ୍ଚଙ୍କ ସହିତ ପାସବୁକ ଖୋଲିଲ ବୋଲି କହି ଓ୍ବାର୍ଡ ସଭ୍ୟା ଓ ମହିଳାମାନେ ପ୍ରତିରୋଧ କରିଥିଲେ। ଉକ୍ତ ଘଟଣାକୁ ନେଇ ବିବାଦ ବଢିଥିଲା। ଫଳରେ ସେହି ଦିନ ଠାରୁ କେନ୍ଦ୍ରରେ ଗ୍ରାମବାସୀ ତାଲା ପକାଇ ଅଙ୍ଗନୱାର୍ଡି କର୍ମୀଙ୍କୁ ବହିଷ୍କାର କରିବାକୁ ଦାବି କରିଛନ୍ତି।
ଦୀର୍ଘ ଦିନ ଧରି କେନ୍ଦ୍ର ବନ୍ଦ ରହିଥିବାରୁ ପିଲାଙ୍କୁ ଓ ଗର୍ଭବତୀଙ୍କୁ ଛତୁଆ,ଅଣ୍ଡା ଆଦି ଦିଆଯାଉ ନାହିଁ। ମାତ୍ର ସ୍ଥାନୀୟ ସୁପରଭାଇଜର ସୌମ୍ୟାସିମା ସାହୁ ଅନ୍ୟ ଜଣେ ସୁପରଭାଇଜରଙ୍କୁ ଧରି ଉକ୍ତ କେନ୍ଦ୍ରର ଶିଶୁ ଓ ଗର୍ଭବତୀଙ୍କୁ ଅଣ୍ଡା ଓ ଛତୁଆ ମଝିରେ ବଣ୍ଟନ କରିଥିଲେ। ତେବେ କେନ୍ଦ୍ର ନ ଖୋଲିବାରୁ ନିୟମିତ ଭାବେ ଏହା ବଣ୍ଟନ କରାଯାଇ ପାରୁ ନାହିଁ। ପୂର୍ବରୁ ବାରମ୍ବାର ବୈଠକ କରି ଉକ୍ତ କେନ୍ଦ୍ର ଖୋଲିବାକୁ ପ୍ରୟାସ କରି ପ୍ରଶାସନ ମଧ୍ୟ ବିଫଳ ହୋଇଥିଲା l
ନୂତନ ଭାବେ ଯୋଗଦେଇଥିବା ସିଡିପିଓ ପଣ୍ଡା କେନ୍ଦ୍ରକୁ ଆସି କେନ୍ଦ୍ର ଖୋଲିବା ପାଇଁ ଆଲୋଚନା କରିଥିଲେ। ମାତ୍ର ଉକ୍ତ ଆଲୋଚନା ବିଫଳ ହୋଇଛି। ଏହି ଆଲୋଚନା ସମୟରେ ଗ୍ରାମର ଭଦ୍ରବ୍ୟକ୍ତି, ୱାର୍ଡସଭ୍ୟା, ଗ୍ରାମବାସୀ ଓ ମହିଳାମାନେ ଉପସ୍ଥିତ ରହିଥିଲେ l ଜିଲା ପ୍ରଶାସନ ତୁରନ୍ତ ଏହାର ସମାଧାନ କରିବାକୁ ଦାବି ହେଉଛି।
