ଦଶମନ୍ତପୁର, ୨୩ା୭(ଡି.ଏନ୍.ଏ.): କୋରାପୁଟ ଜିଲା ଦଶମନ୍ତପୁରରେ ଝାଡ଼ାବାନ୍ତି ବ୍ୟାପୀ ସ୍ବାସ୍ଥ୍ୟ ବିଭାଗର ନିଦ ହଜାଇଦେଇଛି। ଏହି ମହାମାରୀ ଦିନକୁ ଦିନ ବୃଦ୍ଧି ପାଇବାରେ ଲାଗିଛି। ୧୪ ଜଣ ଚିକିତ୍ସାଧୀନ ଥିବା ବେଳେ ଆକ୍ରାନ୍ତଙ୍କ ସଂଖ୍ୟା ୩୭କୁ ବୃଦ୍ଧି ପାଇଛି। ଗୁରୁବାର ଏହି ସଂଖ୍ୟା ୩୦ ଥିଲା। ତେବେ ବ୍ଲକ ପ୍ରଶାସନ, ଜଳ ଓ ପରିମଳ ବିଭାଗ ଏବଂ ସ୍ବାସ୍ଥ୍ୟ ବିଭାଗ ଅଧିକାରୀମାନେ ଆକ୍ରାନ୍ତ ଗ୍ରାମକୁ ବାରମ୍ବାର ଗସ୍ତକରି ଚିକିତ୍ସା ସହ ଅନ୍ୟାନ୍ୟ ବ୍ୟବସ୍ଥା କରୁଥିବା ବେଳେ ଶୁକ୍ରବାର ସ୍ଥିତି ଅନୁଧ୍ୟାନ ଲାଗି ଜନସ୍ବାସ୍ଥ୍ୟ ନିର୍ଦ୍ଦେଶକ ନିରଞ୍ଜନ ମିଶ୍ର ଗସ୍ତ କରିଛନ୍ତି। ତାଙ୍କ ସହ ଯୁଗ୍ମ ନିର୍ଦ୍ଦେଶକ ଡାକ୍ତର ଅଶୋକ ପାଇକରାୟ ଥିଲେ। ବ୍ଲକର ଝାଡ଼ାବାନ୍ତି ପ୍ରଭାବିତ ଡୁମ୍ବାଗୁଡା ପଞ୍ଚାୟତର ହାତୀମୁଣ୍ଡା ଗ୍ରାମ ଏବଂ ଗିର୍ଲିଗୁମ୍ମା ପଞ୍ଚାୟତର ଛତାଆମ୍ବ ଗ୍ରାମରେ ଶୁକ୍ରବାର ପହଞ୍ଚତ୍ ଅନୁଧ୍ୟାନକରି ଉପସ୍ଥିତ ଅଧିକାରୀମାନଙ୍କ ସହ ଆଲୋଚନା କରିଥିଲେ। ଏହି ସମୟରେ ଜିଲା ଚିକିତ୍ସା ଅଧିକାରୀ ଡା. ଅରୁଣ ପାଢ଼ୀ, ଦଶମନ୍ତପୁର ସ୍ବାସ୍ଥ୍ୟକେନ୍ଦ୍ର ଅଧିକାରୀ ଡା. ଶ୍ରୀରାମ ପରିଡ଼ା, ବିପିଏମ୍ ଶ୍ରୀକାନ୍ତ ଦାସ, ଡା. ସୁନିତା ଜେନା, ବିଡିଓ ଡମ୍ବରୁଧର ମଲ୍ଲିକ, ଆର୍ଡବ୍ଲ୍ୟୁଏସ୍ଏସ୍ର କନିଷ୍ଠ ଯନ୍ତ୍ରୀ ଡି.କେ.ନାୟକ ଉପସ୍ଥିତ ଥିଲେ। ପ୍ରତ୍ୟେକ ଘରକୁ ଯାଇ ଲୋକଙ୍କୁ ସଚେତନ କରିବା ନେଇ ଡାକ୍ତର ମିଶ୍ର ଗୁରୁତ୍ୱାରୋପ କରିଥିଲେ। ଡୁମ୍ବାଗୁଡ଼ାରେ ଶୁକ୍ରବାର ୨ ଜଣ ଏବଂ ଚିକାମ୍ବ ପଞ୍ଚାୟତର ମାଙ୍କଡାମୁଣ୍ଡି ଗ୍ରାମର ଲୁକିଆ ଜାନି,ହେତୁ ଜାନ,ଫଟକିଜମର ଗ୍ରାମର ଉଷା ବାଗ,ଛତାମ୍ବ ଗ୍ରାମରସମାଇ ମୁଦୁଲି ଓ ରଇବାରି ଜାନି ଝାଡ଼ାବାନ୍ତିରେ ଆକ୍ରାନ୍ତ ହୋଇଥିବା ଡା. ଶ୍ରୀରାମ ପରିଡ଼ା ସୂଚନା ଦେଇଛନ୍ତି। ଫଳରେ ଆକ୍ରାନ୍ତଙ୍କ ସଂଖ୍ୟା ୩୭କୁ ବୃଦ୍ଧି ପାଇଛି। ବର୍ତ୍ତମାନ୧୪ ଜଣ ରୋଗୀ ଡାକ୍ତରଖାନାରେ ଚିକିତ୍ସାଧୀନ ଅଛନ୍ତି। ସମସ୍ତଙ୍କ ସ୍ବାସ୍ଥ୍ୟାବସ୍ଥା ସ୍ଥିର ଥିବା ଡା. ପରିଡ଼ା କହିଛନ୍ତି। ସୂଚନାଯୋଗ୍ୟ, ପୂର୍ବରୁ ଝାଡ଼ାବାନ୍ତିରେ ୨ ଜଣଙ୍କର ମୃତ୍ୟୁ ଘଟିଛି।
