ବଲିଉଡର ଭେଟେରାନ ଅଭିନେତା ଦିଲୀପ କୁମାରଙ୍କ ବୁଧବାର ସକାଳୁ ଦେହାନ୍ତ ହୋଇଛି। ସେ ଗତ କିଛି ଦିନ ହେବ ସ୍ବାସ୍ଥ୍ୟଗତ ସମସ୍ୟାର ସମ୍ମୁଖୀନ ହୋଇଥିଲେ। ୯୮ ବର୍ଷ ବୟସରେ ସେ ଦୁନିଆକୁ ସବୁଦିନ ପାଇଁ ବିଦାୟ ନେଇଛନ୍ତି। କିଛି ଦିନ ପୂର୍ବରୁ ତାଙ୍କୁ ମୁମ୍ବାଇର ହିନ୍ଦୁଜା ହସ୍ପିଟାଲରେ ଭର୍ତ୍ତି କରାଯାଇଥିଲା।
ଦିଲୀପ କୁମାର ୧୧ ଡିସେମ୍ବର ୧୯୨୨ ରେ ପାକିସ୍ତାନରେ ଜନ୍ମଗ୍ରହଣ କରିଥିଲେ ଏବଂ ତାଙ୍କର ପ୍ରଥମ ନାମ ଥିଲା ୟୁସୁଫ ଖାନ। ପରେ ସେ ଦିଲୀପ କୁମାର ଭାବରେ ପରଦାରେ ସୁନାମ ଅର୍ଜନ କରିଥିଲେ। ଜଣେ ନିର୍ମାତାଙ୍କ ନିର୍ଦ୍ଦେଶରେ ସେ ତାଙ୍କ ନାମ ବଦଳାଇଲେ, ଯାହା ପରେ ଲୋକମାନେ ତାଙ୍କୁ ପରଦାରେ ଦିଲୀପ କୁମାର ଭାବରେ ଜାଣିବାକୁ ପାଇଲେ। ଦିଲୀପ କୁମାରଙ୍କ ପ୍ରାଥମିକ ଶିକ୍ଷା ନାଶିକରେ ହୋଇଥିଲା। ପରେ ସେ ଚଳଚ୍ଚିତ୍ରରେ ଅଭିନୟ କରିବାକୁ ନିଷ୍ପତ୍ତି ନେଇଥିଲେ ଏବଂ ୧୯୪୪ ଚଳଚ୍ଚିତ୍ର ଜୁଆର ଭଟାରେ ଡେବ୍ୟୁ କରିଥିଲେ। ପ୍ରାରମ୍ଭିକ ଚଳଚ୍ଚିତ୍ର ନ ଚାଲିବା ପରେ ଅଭିନେତ୍ରୀ ନୁର ଜାହାନଙ୍କ ସହ ତାଙ୍କର ଯୋଡି ହିଟ ହୋଇଥିଲା। ଚଳଚ୍ଚିତ୍ର ଜୁଗୁନ୍ ଦିଲୀପ କୁମାରଙ୍କ ପ୍ରଥମ ହିଟ ଫିଲ୍ମ ହେଲ। ତାଙ୍କର ଚଳଚ୍ଚିତ୍ର ମୁଗଲ-ଏ-ଆଜମ ସେହି ସମୟର ସର୍ବାଧିକ ଆୟ କରିଥିବା ଚଳଚ୍ଚିତ୍ର ଥିଲା। ଅଗଷ୍ଟ ୧୯୬୦ରେ ମୁକ୍ତିଲାଭ କରିଥିବା ଏହି ଚଳଚ୍ଚିତ୍ରଟି ସେତେବେଳେ ସବୁଠାରୁ ମହଙ୍ଗା ଚଳଚ୍ଚିତ୍ର ଥିଲା।
ଦିଲୀପ କୁମାର ଆଠଟି ଫିଲ୍ମଫେୟାର ପୁରସ୍କାର ଜିତିଛନ୍ତି। ୧୯୯୧ରେ ଦିଲୀପ କୁମାରଙ୍କୁ ପଦ୍ମ ଭୂଷଣ ଏବଂ ୨୦୧୫ରେ ପଦ୍ମଭୂଷଣ ପ୍ରଦାନ କରାଯାଇଥିଲା। ୧୯୯୪ରେ, ତାଙ୍କୁ ଦାଦାସାହେବ ଫାଲକେ ପୁରସ୍କାର ପ୍ରଦାନ କରାଯାଇଥିଲା। ସେ ୨୦୦୦ ରୁ ୨୦୦୬ ପର୍ଯ୍ୟନ୍ତ ରାଜ୍ୟ ସଭାର ସଦସ୍ୟ ମଧ୍ୟ ଥିଲେ। ତାଙ୍କୁ ୧୯୯୮ ରେ ପାକିସ୍ତାନର ସର୍ବୋତ୍ତମ ନାଗରିକ ସମ୍ମାନ ନିଶାନ-ଇ-ଇମତିଆଜ ମଧ୍ୟ ପ୍ରଦାନ କରାଯାଇଥିଲା।
ଦିଲୀପ କୁମାରଙ୍କ ପରଲୋକରେ ଫିଲ୍ମ ଇଣ୍ଡଷ୍ଟ୍ରିରେ ଶୋକର ଛାୟା ଖେଳିଯାଇଛି। ସେଲିବ୍ରିଟିମାନେ ସୋସିଆଲ ମିଡିଆ ପୋଷ୍ଟ ଶେୟାର କରି ତାଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରୁଛନ୍ତି। ଗତ ବର୍ଷ ଦିଲୀପ କୁମାର ତାଙ୍କର ଦୁଇ ସାନଭାଇ ଅସଲମ ଖାନ (୮୮) ଏବଂ ଏହସାନ ଖାନ (୯୦) କରୋନାରେ ପ୍ରାଣ ହରାଇଥିଲେ। ଏହା ପରେ ସେ ନିଜ ଜନ୍ମଦିନ ଏବଂ ବିବାହ ବାର୍ଷିକୀ ମଧ୍ୟ ପାଳନ କରି ନ ଥିଲେ।
