ଦିଗପହଣ୍ଡି,୨୭।୧୧(ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡି ବ୍ଲକ କୈଠଖଣ୍ଡି ଗ୍ରାମର ଶ୍ରୀ ଗଣେଶ ମହିଳା ସୟଂ ସହାୟିକା ଗୋଷ୍ଠୀର ପ୍ରମୁଖ ସଦସ୍ୟା ବିନୁ କୁମାରୀ ଗୌଡ଼ ରାଜ୍ୟସ୍ତରରେ ସମ୍ମାନିତ ହୋଇଛନ୍ତି।
ଭୁବନେଶ୍ୱର ସ୍ଥିତ ବହୁମୁଖି କଲ୍ୟାଣ ମଣ୍ଡପ ପରିସରରେ ରାଜ୍ୟ ସୁଭଦ୍ରା ଶକ୍ତି ପକ୍ଷରୁ ପଞ୍ଚମ ଅଡିଟ ସପ୍ତାହ ୨୦୨୫ ଉପଲକ୍ଷେ ଆୟୋଜିତ କାରିଗରୀ ମେଳା ଓ ଖାଦ୍ୟ ମେଳାରେ ବିନୁଙ୍କୁ ସମ୍ମାନିତ କରାଯାଇଛି। ଉଦ୍ୟୋଗୀ ମହିଳା ବିନୁ ଅନ୍ୟ ମହିଳା ସ୍ବୟଂ ସହାୟିକା ଗୋଷ୍ଠୀର ସଦସ୍ୟାଙ୍କୁ ନେଇ ଗତ କିଛି ବର୍ଷ ହେଲା ଦିଗପହଣ୍ଡି ବ୍ଳକ କାର୍ଯ୍ୟାଳୟ ପରିସରରେ ମିଶନ ଶକ୍ତି କାଫେ ଖୋଲି ଲୋକଙ୍କୁ ବିଭିନ୍ନ ବ୍ୟଞ୍ଜନର ସୁସ୍ବାଦିଷ୍ଟ ଖାଦ୍ୟ ପରିବେଷଣ କରି ଲୋକଙ୍କ ମନ ଜିଣିଛନ୍ତି।
ଏପରିକି ଗଞ୍ଜାମ ଜିଲାର ବିଭିନ୍ନ ଅଞ୍ଚଳରେ ନିଜ ପ୍ରସ୍ତୁତ ସୁସ୍ବାଦୁ ଖାଦ୍ୟ ପରିବେଷଣ କରି ସମ୍ମାନିତ ହେବା ସହ ପୁରସ୍କୃତ ମଧ୍ୟ ହୋଇଥିବାରୁ ତାଙ୍କୁ ରାଜ୍ୟସ୍ତରୀୟ ଖାଦ୍ୟ ମେଳାରେ ଅଂଶଗ୍ରହଣ ପାଇଁ ମନୋନୀତ କରାଯାଇଥିଲା। ଖାଦ୍ୟ ମେଳାରେ ସେ ୧ ଶହରୁ ଊଦ୍ଧର୍ବ ଖାଦ୍ୟ ବ୍ୟଞ୍ଜନ ପରିବେଷଣ କରି ଶ୍ରେଷ୍ଠ ବିବେଚିତ ହୋଇ ଉପସ୍ଥିତ ଅତିଥିଙ୍କ ଦ୍ୱାରା ସମ୍ମାନିତ ହେବା ସହ ପୁରସ୍କୃତ ହୋଇଛନ୍ତି। ରାଜ୍ୟସ୍ତରୀୟ ପୁରସ୍କାର ପାଇବା ପରେ ବିଡ଼ିଓ ଅନାମିକା ପାଣ୍ଡେଙ୍କ ସମେତ ବ୍ଳକର ସମସ୍ତ ଅଧିକାରୀ, କର୍ମଚାରୀ ତାଙ୍କୁ ଶୁଭେଚ୍ଛା ଜଣାଇଛନ୍ତି ।
